போய் டவுசரை போட்டு வேலையை பார்க்க சொல்லுங்க.. அண்ணாமலைக்கு செந்தில் பாலாஜி பதிலடி

கோவை: கோவை தெற்கு தொகுதி திமுக வேட்பாளர் செந்தில் பாலாஜி செய்தியாளர்கள் கேட்ட கேள்விக்கு பதில் அளித்த போது, அண்ணாமலை ஏற்கனவே மாநில பொறுப்பில் இருந்தார்.. வாரம் ஒரு முறை பார்த்தாரா.. மாதம் ஒரு முறை மக்களை பார்த்தாரா.. இப்போது மட்டும் டெய்லி பார்க்கிறார்.. அவர் ஒரு வார்த்தை கூறியிருந்தார், அறிவாலயத்தில் அடி செங்கல் வரை உருவுவேன் என்றார்.. அவரு செங்கல் உருவிக்கிடக்கு.. போய் டவுசரை போட்டு வேலையை பார்க்க சொல்லுங்க" என்று கூறினார்.

பாஜக மாநில முன்னாள் தலைவர் அண்ணாமலைக்கும், திமுக முன்னாள் அமைச்சர் செந்தில் பாலாஜிக்கும் எப்போதுமே சண்டை தான் இருக்கும். இருவருக்கும் இடையே அரசியல் ரீதியாக விமர்சனங்கள் அதிகமாகவே இருக்கும். அந்த வகையில் கோவையில் செந்தில் பாலாஜி பேசும்போது, அண்ணாமலை நேர்மையான அரசியல்வாதியா? கடந்த முறை அவர் போட்டியிட்ட அரவக்குறிச்சி தேர்தலில் வாக்காளர்களுக்கு ரூ.1000 பணம் கொடுக்கவில்லையா?, அண்ணாமலை இதற்கு பதில் சொல்லட்டும் என கூறியிருந்தார். மேலும், யார் யார் எங்க இருக்க வேண்டுமோ அவர்கள் இப்போது அங்கே இருக்கிறார்கள் என அண்ணாமலைக்கு சட்டப்பேரவை தேர்தலில் சீட் கிடைக்காதது குறித்த கேள்விக்கும் செந்தில்பாலாஜி பதில் அளித்தார்.

இதனிடையே பாஜக மாநில முன்னாள் தலைவர் அண்ணாமலை கடந்த இரண்டு நாள் முன்பு கோவையில் செய்தியாளர்களிடம் பேசும் போது, "கோவை நாடாளுமன்ற தேர்தலில் யாருக்கும் ஒரு ரூபாய் கூட பணம் கொடுக்காமல் அரசியல் செய்வோம் என்று சொன்னோம். இன்றைக்கு நான் சவால் விடுக்கிறேன். கோயம்புத்தூரில் திராவிட முன்னேற்றக் கழகம் கடந்த 2024 லோக்சபா தேர்தலை எப்படி எதிர்கொண்டது என்பது எல்லாருக்கும் தெரியும்.

செந்தில் பாலாஜி கரூருக்கு செல்கிறார், கோவைக்கு வருகிறார். அவர் என்ன செய்தாலும் இம்முறை தோல்வியை தவிர்க்க முடியாது. செந்தில் பாலாஜி ஒரு நம்பர் 1 ப்ரோக்கர், அவர் 300 நாட்களுக்கும் மேல் சிறையில் இருந்திருக்கிறார். அவரது தம்பி தலைமறைவாக ஓடி ஒளிந்தவர். இப்போது கரூரில் பிரச்சாரம் செய்து கொண்டிருக்கிறார். ஆனால், இந்த தேர்தலில் செந்தில் பாலாஜிக்கு தோல்வி உறுதி. நான் அரவக்குறிச்சி உள்ளிட்ட எந்த தேர்தலில் போட்டியிட்ட போதும் பணம் கொடுக்கவில்லை. நீங்களே கோவை தொகுதியோ அல்லது அரவக்குறிச்சி தொகுதிக்கோ நேரடியாக சென்று மக்களிடம் கேட்டுக் கொள்ளுங்கள். அண்ணாமலையாகிய நான் நேர்மையான அரசியலை முன்னெடுக்கிறேன். திமுக கூட்டணிக்குள் மிகப்பெரிய சிக்கல் இருக்கிறது. ராகுல்காந்தி ஒருமுறைகூட புதுச்சேரியில் ஸ்டாலின் பெயரை பயன்படுத்தவில்லை.

கோவை தெற்கு தொகுதியை பொறுத்தவரை செந்தில்பாலாஜி கரூரில் இருந்து கொண்டு வந்திருக்கக் கூடிய, 18 சுயேச்சை வேட்பாளர்களுக்கு ஒரே நோட்டரி தான் கையெழுத்து போட்டுள்ளார். வேற ஆள் கிடைக்கவில்லையா? திமுகவின் தோல்வி கோவை கொங்கு மண்டலத்தில் தான் ஆரம்பிக்கும். இங்கு தோல்வி ஆரம்பித்து சேப்பாக்கத்தில் முடியும்.

கோவை வடக்கில் வானதி சீனிவாசனுக்காக நிறைய தன்னார்வலர்கள் வேலை செய்யத்தான் போகின்றனர். ஆனால் கரூரில் இருந்து ஆட்களை கொண்டு வந்து,பாக்கெட்டுகளில் பணத்தை வைத்துக் கொண்டு வீதி, வீதியாக நடந்துபோய் பணம் பிடியுங்க, குண்டா, அண்டா வேண்டுமா பிடியுங்க, ஸ்மார்ட் வாட்ச் வேணுமா பிடியுங்க என்று கோவை திமுகவை ஒட்டுமொத்தமாக குத்தகைக்கு எடுத்திருப்பது யார்? செந்தில் பாலாஜி தான். கரூரைச் சேர்ந்தவர்கள், செந்தில் பாலாஜி சேர்த்து வைத்துள்ள சொத்துகளை கந்துவட்டிக்கு கொடுத்திருக்கக் கூடிய அவரின் பினாமிகளை கோவை கொண்டு வந்து வீடு, வீடாக பணத்தை இறைத்துக் கொண்டு இருக்கின்றனர். இதை தான் நாம் குற்றம்சாட்டுகின்றோம்." என்று கூறியிருந்தார்.

இதற்கு பதிலடி கொடுக்கும் வகையில் கோவை தெற்கு தொகுதி திமுக வேட்பாளர் செந்தில் பாலாஜி பேட்டியின் போது கடுமையாக விமர்சித்தார். அப்போது செய்தியாளர்கள் கேட்ட கேள்விக்கு பதில் அளித்த போது, அண்ணாமலை ஏற்கனவே மாநில பொறுப்பில் இருந்தார்.. வாரம் ஒரு முறை பார்த்தாரா.. மாதம் ஒரு முறை மக்களை பார்த்தாரா.. இப்போது மட்டும் டெய்லி பார்க்கிறார்.. அவர் ஒரு வார்த்தை கூறியிருந்தார், அறிவாலயத்தில் அடி செங்கல் வரை உருவுவேன் என்றார்.. அவரு செங்கல் உருவிக்கிடக்கு.. போய் டவுசரை போட்டு வேலையை பார்க்க சொல்லுங்க" என்று கூறினார்.

English summary

There has always been friction between former BJP State President Annamalai and former DMK Minister Senthil Balaji. The two frequently engage in intense political criticism of one another. Let us take a look at what Senthil Balaji—who is contesting from Coimbatore South—had to say about Annamalai today.