”இந்திய படைகளின் வீரம், கண்ணியத்தில் சமரசம் கூடாது” -அக்னிபாத் திட்டத்தை எதிர்க்கும் ராகுல் காந்தி

டெல்லி: மத்திய பாஜக அரசின் அக்னிபாத் திட்டத்தால் இந்திய படைகளின் செயல்திறன் குறையும் என காங்கிரஸ் எம்பி ராகுல் காந்தி தெரிவித்து உள்ளார்.

இந்திய பாதுகாப்புத் துறையில் அக்னி வீர் என்ற பெயரில் புதிய துறையை உருவாக்கி இருக்கும் மத்திய அரசு, அக்னிபாத் என்ற திட்டத்தை தொடங்கி இருக்கிறது.

இத்திட்டத்தின் மூலம் 4 ஆண்டுகள் ஒப்பந்தத்தின் கீழ் அக்னி வீர் என்ற பெயர் கொண்ட வீரர்கள் பணியமர்த்தப்படுவார்கள்.

பாதுகாப்புத்துறை அமைச்சர் கருத்து

இந்த பணி நியமன முறைக்கு மத்திய அமைச்சரவை நேற்று ஒப்புதல் வழங்கி இருக்கிறது. அக்னிபாத் திட்டத்தின் மூலம் இந்திய ராணுவத்தில் இளைஞர்கள் அதிகளவில் சேருவதற்கு ஆர்வம் காட்டுவார்கள் என்றும், இந்திய ராணுவம் இளமையானதாக இத்திட்டம் உதவும் எனவும் மத்திய பாதுகாப்புத் துறை அமைச்சர் ராஜ்நாத் சிங் தெரிவித்தார்.

தகுதியுடையவர்கள் யார்?

17.5 முதல் 21 வயதுக்கு உட்பட்ட 45 ஆயிரம் பேருக்கு இத்திட்டத்தின் கீழ் பணி வழங்கப்பட இருக்கிறது. இவர்களுக்கு 6 மாத பயிற்சியளிக்கப்பட்டு 4 ஆண்டுகள் ஒப்பந்த பணி வழங்கப்படும். 4 ஆண்டுகளுக்கு பின் 25% பேருக்கு மட்டும் 15 ஆண்டு ஒப்பந்தத்தின் கீழ் மீண்டும் பணி வழங்கப்படும். மீதம் உள்ள 75 சதவீதம் பேர் எந்தவிதமான ஓய்வூதிய பலனும் இன்று பணியிலிருந்து நீக்கப்படுவார்கள்.

பீகாரில் போராட்டம்

இந்த புதிய திட்டத்துக்கு ராணுவத்துக்கு தயாராகி வரும் இளைஞர்கள் மத்தியில் எதிர்ப்பு கிளம்பி இருக்கிறது. மத்திய அரசின் அக்னிபாத் திட்டத்தை கைவிட வலியுறுத்தி பீகாரின் முசாபர்பூர் நகரில் நெடுஞ்சாலையை மறித்து இளைஞர்கள் போராட்டத்தில் ஈடுபட்டனர். அதேபோல், பக்சாரில் ரயில் தண்டவாளங்களில் அமர்ந்து தங்கள் எதிர்ப்பை பதிவு செய்தனர்.

ராகுல் காந்தி எதிர்ப்பு

இதனிடையே மத்திய அரசின் அக்னிபாத் ராணுவ ஆள்சேர்ப்பு திட்டத்துக்கு காங்கிரஸ் எம்.பி. ராகுல் காந்தி கண்டனம் தெரிவித்து உள்ளார். இதுகுறித்து ட்விட்டரில் அவர் வெளியிட்டு உள்ள பதிவில், "இந்தியா இரு முனைகளில் இருந்தும் அச்சுறுத்தல்களை சந்தித்கும்போது அக்னிபாத் திட்டம் நமது ஆயுதப் படைகளின் செயல்பாட்டை குறைக்கும். பாஜக அரசு நமது படைகளின் கண்ணியம், மரபு, வீரம் மற்றும் ஒழுக்கம் ஆகியவற்றில் சமரசம் செய்வதை நிறுத்த வேண்டும்." என்று குறிப்பிட்டு உள்ளார்.

English summary

When India faces threats on two fronts, the uncalled for Agnipath scheme reduces the operational effectiveness of our armed forces. The BJP govt must stop compromising the dignity, traditions, valour & discipline of our forces: