ஜம்மு காஷ்மீருக்கு 370-வது பிரிவு தேவை என்பது அரசியல் சாசனத்தை அவமதிப்பது...அமித்ஷா ஆவேசம்
டெல்லி: ஜம்மு காஷ்மீருக்கு சிறப்பு அந்தஸ்து வழங்க வகை செய்யும் அரசியல் சாசனத்தின் 370-வது பிரிவு தேவை என சொல்வது அரசியல் சாசனத்தையும் அரசியல் நிர்ணய சபையையும் அவமதிப்பது என மத்திய உள்துறை அமைச்சர் அமித்ஷா ஆவேசமாக தெரிவித்தார்.
ராஜ்யசபாவில் மத்திய உள்துறை அமைச்சர் அமித்ஷா, ஜம்மு காஷ்மீர் மறுவரையறை 2019- திருத்த மசோதாவை இன்று தாக்கல் செய்தார். ஜம்மு காஷ்மீரில் சட்டசபை இடங்களை அதிகரிப்பது, எஸ்சி, எஸ்டி பிரதிநிதித்துவம் உள்ளிட்டவை இம்மசோதாவில் இடம் பெற்றிருந்தன. முன்னதாக ஜம்மு காஷ்மீருக்கு சிறப்பு அந்தஸ்து வழங்கிய அரசியல் சாசனத்தின் 370-வது பிரிவை மத்திய அரசு ரத்து செய்தது செல்லும் என உச்சநீதிமன்றம் தீர்ப்பு தெரிவித்திருந்தது.
இந்த பின்னணியில் ராஜ்யசபாவில் அமித்ஷா இன்று பேசியதாவது: 370-வது பிரிவு நியாயமானது; தேவையானதாக இருந்திருந்தால் நேருஜி ஏன் 'தற்காலிகமான' ஏற்பாடு செய்திருப்பார்? ஜம்மு காஷ்மீருக்கு 370-வது பிரிவு தேவை என சொல்பவர்கள் அரசியல் நிர்ணய சபையையும் அரசியல் சாசனத்தையும் அவமதிப்பவர்கள்.
உச்சநீதிமன்றமானது 370-வது பிரிவு என்பது தற்காலிகமானது என தெளிவாக தீர்ப்பில் தெரிவித்துள்ளது. அதாவது 370-வது பிரிவை நீக்கவே முடியாது என்கிற மனுதாரரின் வாதத்தை உச்சநீதிமன்றம் நிராகரித்திருக்கிறது. 370-வது பிரிவு என்பது தற்காலிகமானது என்கிற பிரதமர் மோடியின் நிலைப்பாட்டை சரி என சொல்லி இருக்கிறது உச்சநீதிமன்றம்.
பாகிஸ்தான் இப்போது ஆக்கிரமித்துள்ள ஜம்மு காஷ்மீர் பகுதிகள் இந்தியாவுக்குச் சொந்தமானவை. இந்தியாவின் நிலப்பகுதிகளை எவர் ஒருவரும் பறித்துவிட முடியாது. ஜம்மு காஷ்மீரில் இடம் பெயர்ந்த மக்களுக்கான நீதியை மோடி அரசாங்கம் பெற்றுத் தரும்.
உச்சநீதிமன்றத்தின் தீர்ப்பானது ஒட்டுமொத்த எதிர்க்கட்சிகளுக்கு மிகப் பெரும் தோல்வி. 370-வது பிரிவு என்பது பிரிவினைவாதத்தையும் பயங்கரவாதத்தையும்தான் ஊக்குவித்தது. ஜம்மு காஷ்மீருக்கு உரிய நேரத்தில் மாநில அந்தஸ்து வழங்கப்படும் என ஏற்கனவே உறுதி மொழி அளித்திருக்கிறோம். எப்போதுமே காங்கிரஸ் கட்சி நல்ல செயல்பாடுகளை பாராட்டும் பழக்கமே இல்லை. இவ்வாறு அமித்ஷா கூறினார். ராஜ்யசபாவில் 370-வது பிரிவு நீக்கம் தொடர்பாக காரசார விவாதங்கள் இன்று நடைபெற்றன என்பதும் குறிப்பிடத்தக்கது.
Click it and Unblock the Notifications
Sign in with Google