தேர்தலை காரணம் காட்டி.. பைக்கில் பயணிக்க கூடாதுன்னு சொல்றதா? தேர்தல் ஆணையத்திற்கு நீதிமன்றம் குட்டு

டெல்லி: தேர்தலை காரணம் காட்டி, மேற்கு வங்கத்தில் யாரும் பைக்கில் பயணிக்க கூடாது என்று தேர்தல் ஆணையம் சமீபத்தில் உத்தரவு போட்டிருந்தது. இது கடும் விமர்சனங்களை ஏற்படுத்திய நிலையில், இப்படியெல்லாம் தடை போட எந்த அதிகாரமும் இல்லை என தேர்தல் ஆணையத்தை கல்கத்தா உயர்நீதிமன்றம் தேர்தல் தலையில் கொட்டியிருக்கிறது.

மேற்கு வங்கத்தில் இரண்டு கட்டங்களாக சட்டப்பேரவை தேர்தல் நடைபெறுவதாக அறிவிக்கப்பட்டது. முதல் கட்டம் ஏப்.23ம் தேதி நிறைவடைந்திருந்தது. ஆனால், தேர்தலுக்கு இரண்டு நாட்களுக்கு முன்னர் தேர்தல் ஆணையம் போட்ட பைக் பயண தடை உத்தரவு, மக்களை ரொம்பவும் டென்ஷன் ஆக்கியிருந்தது.

கடந்த ஏப். 21ம் தேதி தேர்தல் ஆணையம் பிறப்பித்திருந்த உத்தரவில், மாலை 6 மணி முதல் காலை 6 மணி வரை பைக்குகள் மற்றும் ஸ்கூட்டர்கள் சாலையில் செல்லத் தடை விதிக்கப்பட்டுள்ளதாகவும், மருத்துவ அவசரநிலை மற்றும் குடும்ப நிகழ்ச்சிகளுக்கு விதிவிலக்கு உண்டு எனவும், ஏப்.23 வரை இந்த உத்தரவு அமலில் இருக்கும் என்றும் தெரிவித்திருந்தது.

சுதந்திரமான மற்றும் நியாயமான தேர்தல் என்ற பெயரில் இப்படியான உத்தரவுகளை போட முடியாது என்று கல்கத்தா உயர்நீதிமன்றம் கூறியிருக்கிறது. மோட்டார் சைக்கிள் ஓட்டுவதற்குத் தேர்தல் ஆணையம் ஒட்டுமொத்தத் தடை விதிக்க முடியாது என்று நீதிமன்றம் கூறியுள்ளது.

இந்திய அரசியலமைப்புச் சட்டம் பிரிவு 324(1)-ன் படி தேர்தலை நடத்தும் அதிகாரம் தேர்தல் ஆணையத்திற்கு இருந்தாலும், அது சட்டத்திற்கும் விதிகளுக்கும் உட்பட்டே இருக்க வேண்டும். எந்தச் சட்டத்தின் கீழ் இத்தகைய கட்டுப்பாடுகள் விதிக்கப்படுகின்றன என்பதை அதிகாரிகள் நியாயப்படுத்தத் தவறிவிட்டதாக நீதிமன்றம் அதிருப்தி தெரிவித்துள்ளது.

பொதுவாக தேர்தல் காலங்களில், குறிப்பாக வாக்குப்பதிவு தினத்திற்கு சில நாட்களுக்கு முன்னதாக, மோட்டார் சைக்கிள் பேரணிகள் மூலம் வாக்காளர்கள் அச்சுறுத்தப்படலாம் அல்லது சட்டம் ஒழுங்கு பாதிக்கப்படலாம் எனக் கருதி இத்தகைய கட்டுப்பாடுகள் விதிக்கப்படும்.

ஆனால், சாதாரண பொதுமக்கள் தங்கள் அன்றாடத் தேவைகளுக்காக மோட்டார் சைக்கிளைப் பயன்படுத்துவதைத் தடுக்கும் வகையில் 'ஒட்டுமொத்தத் தடை' விதிப்பது அவர்களின் தனிமனித சுதந்திரத்தைப் பாதிக்கும் என நீதிமன்றம் கருதுகிறது.

English summary

Calcutta High Court: Citing the elections as the reason, the Election Commission recently issued an order prohibiting anyone from riding motorcycles in West Bengal. Amidst the severe criticism this move sparked, the Calcutta High Court has delivered a sharp rebuke to the Election Commission, ruling that it possesses no authority whatsoever to impose such bans.