சாதிவாரி கணக்கெடுப்புக்கு கிரீன் சிக்னல் கொடுத்த மத்திய அரசு: இன்று காங்கிரஸ் முக்கிய ஆலோசனை

டெல்லி: நாட்டில் சாதிவாரி கணக்கெடுப்பை மத்திய அரசு நடத்த வேண்டும் என்று தொடர்ந்து எதிர்க்கட்சிகள் கோரிக்கை வைத்து வந்த நிலையில், நாடு முழுவதும் சாதிவாரி கணக்கெடுப்பு நடத்தப்படும் என்று மத்திய அரசு அறிவித்துள்ளது. இதுதொடர்பாக முக்கிய ஆலோசனைகள் மேற்கொள்ளும் வகையில், காங்கிரஸ் கட்சியின் காரிய கமிட்டி கூட்டம் இன்று நடைபெறவுள்ளது.

இந்திய மக்கள் அனைவருக்கும் கல்வி, பொருளாதாரம், வேலைவாய்ப்பு உள்ளிட்டவற்றில் சம உரிமை, பாதுகாப்பு கிடைப்பதை உறுதி செய்யும் வகையில் திட்டங்களைக் கொண்டு வந்து, சட்டங்கள் இயற்ற சாதிவாரி மக்கள் தொகை கணக்கெடுப்பு அவசியமாகும். இந்த மக்கள் தொகை கணக்கெடுப்பை மத்திய அரசு நடத்த வேண்டும் என்று எதிர்க்கட்சியினரும் பலரும் குரல் கொடுத்து வருகின்றனர். மக்கள் தொகை கணக்கெடுப்பு மத்திய அரசின் பட்டியலில் உள்ளது.

நாட்டில் 10 ஆண்டுகளுக்கு ஒருமுறை மக்கள் தொகை கணக்கெடுப்பு நடத்தப்படுவது வழக்கம். கடந்த 2010-2011 ஆம் ஆண்டில் இறுதியாக இந்த கணக்கெடுப்பு நடைபெற்றது. அதைத்தொடர்ந்து, அடுத்த கணக்கெடுப்பு 2020-2021 இல் நடத்தப்பட்டிருக்க வேண்டும். ஆனால், கொரோனா தொற்று காரணமாக அந்த சமயத்தில் மக்கள் தொகை கணக்கெடுப்பு நடத்தப்படவில்லை.

இந்நிலையில், மக்கள் தொகை கணக்கெடுப்பை சாதிவாரி கணக்கெடுப்பாக மத்திய அரசு நடத்த வேண்டும் என்று காங்கிரஸ், இந்தியா கூட்டணி கட்சிகள் உள்ளிட்டவை தொடர்ந்து குரல் கொடுத்து வந்தன. இந்நிலையில், நாடு முழுவதும் சாதிவாரி கணக்கெடுப்பு நடத்தப்படும் என்று மத்திய அரசு சார்பில் அறிவிக்கப்பட்டுள்ளது.

டெல்லியில் கடந்த இரண்டு நாட்களுக்கு முன்பு பிரதமர் மோடி தலைமையில் நடைபெற்ற அமைச்சரவைக் கூட்டத்தில், சாதிவாரி கணக்கெடுப்புக்கான ஒப்புதல் அளிக்கப்பட்டது. மத்திய அரசின் இந்த முடிவுக்கு காங்கிரஸ் உள்ளிட்ட பல்வேறு அரசியல் கட்சியினர் வரவேற்பு தெரிவித்துள்ளனர்.

சாதிவாரி கணக்கெடுப்பு நடத்தும் மத்திய அரசின் முடிவு குறித்து ஆலோசனை மேற்கொள்ளும் வகையில், காங்கிரஸ் கட்சியின் காரிய கமிட்டி கூட்டம் டெல்லியில் உள்ள கட்சி அலுவலகத்தில் இன்று மாலை 4 மணிக்கு நடைபெறவுள்ளது. இந்தக் கூட்டத்தில், காங்கிரஸ் தேசிய தலைவர் மல்லிகார்ஜுன கார்கே, காங்கிரஸ் எம்.பி. ராகுல்காந்தி உள்ளிட்ட முக்கிய நிர்வாகிகள் பங்கேற்கவுள்ளதாக கூறப்படுகிறது.

English summary

The central government has announced that a caste-wise census will be conducted across the country. The Congress Party Working Committee meeting will be held today to take important decisions in this regard.