கொல்கத்தா ஐகோர்ட் தலைமை நீதிபதியாக தமிழர்.. நெல்லைகாரரை பரிந்துரைத்த கொலீஜியம் - யார் இந்த சிவஞானம்?

தமிழ்நாட்டை சேர்ந்த நீதிபதி டி.எஸ்.சிவஞானத்தை கொல்கத்தா உயர்நீதிமன்ற தலைமை நீதிபதியாக உச்சநீதிமன்ற கொலீஜியம் பரிந்துரைத்துள்ளது.

Published: Thursday, February 9, 2023, 23:21 [IST]

Subscribe to Oneindia Tamil

டெல்லி: கொல்கத்தா உயர்நீதிமன்ற தலைமை நீதிபதியாக தமிழ்நாட்டை சேர்ந்த நீதிபதி டி.எஸ்.சிவஞானத்தை உச்சநீதிமன்ற கொலீஜியம் பரிந்துரை செய்து இருக்கிறது. கொல்கத்தா உயர்நீதிமன்ற தலைமை நீதிபதியாக இருந்த பிரகாஷ் ஸ்ரீவஸ்தவா ஓய்வுபெற்றதை தொடர்ந்து சிவஞானத்தை பரிந்துரைத்துள்ளது கொலீஜியம்.

திருநெல்வேலியை சேர்ந்த சிவஞானம் கடந்த 1963 ஆம் ஆண்டு பிறந்தார். சென்னை லயோலா கல்லூரியில் இளங்கலை அறிவியல் பட்டம் படித்த அவர், மெட்ராஸ் சட்டக் கல்லூரியில் சட்டம் பயின்றார்.

1986 ஆம் ஆண்டு தமிழ்நாடு பார் கவுன்சிலில் சேர்ந்த அவர் வழக்கறிஞராக தன்னை பதிவு செய்துகொண்டு மூத்த வழக்கறிஞர் ஆர்.காந்தியிடம் பணியாற்றினார். கடந்த 2000 ல் மத்திய அரசின் கூடுதல் சட்ட ஆலோசராக அவர் நியமிக்கப்பட்டார்.

சென்னை உயர்நீதிமன்ற நீதிபதி

கடந்த 2009 ஆம் ஆண்டு சென்னை உயர்நீதிமன்ற கூடுதல் நீதிபதியாக நியமிக்கப்பட்ட சிவஞானம், கடந்த 2011 ஆம் ஆண்டு நிரந்தமாக்கப்பட்டார். சென்னை உயர்நீதிமன்ற கணினி குழுவின் தலைவராகவும் அவர் இருந்தார். அதேபோல் தமிழ்நாடு நீதித்துறை அகாடமி ஆளுநர் குழுவின் உறுப்பினராகவும் அவர் உள்ளார்.

கணினி குழு தலைவர்

இவர் கணினி குழு தலைவராக இருந்த காலத்தில்தான் சென்னை உயர்நீதிமன்றத்தில் தேசிய சேவை மற்றும் மின்னணு செயல்முறைகளின் கண்காணிப்பு அறிமுகப்படுத்தப்பட்டது. அதன்கீழ் பல்வேறு சேவைகளுக்காக ஸ்மார்ட் போன்கள் வாங்கப்பட்டன. கொரோனா ஊரடங்கு காலத்தில் வீடியோ கான்பரன்சிங் மூலம் வழக்கு விசாரணை நடத்த மைக்ரோசாப்ட் டீம் உரிமங்கள் அனைத்து நீதிபதிகளுக்கும் வழங்கப்பட்டது.

முக்கிய வழக்குகள்

கனிம சுரங்க வழக்கு, ஸ்டெர்லைட் ஆலை வழக்கு, ப.சிதம்பரம் மற்றும் அவரது குடும்பத்தினர் மீதான வருமான வரி நோட்டீஸ் வழக்கு என்று பல்வேறு முக்கிய வழக்குகளை நீதிபதி டி.எஸ்.சிவஞானம் விசாரித்து உத்தரவுகளை பிறப்பித்து இருக்கிறார். 2009 ஆம் ஆண்டு முதல் 2021 ஆம் ஆண்டு வரை சென்னை உயர்நீதிமன்றத்தின் நீதிபதியாக பதவி வகித்தார்.

தலைமை நீதிபதி

சென்னை உயர்நீதிமன்றத்தின் மூத்த நீதிபதியாக இருந்த அவர் கடந்த 2021 ஆம் ஆண்டு அக்டோபர் கொல்கத்தா உயர்நீதிமன்றத்துக்கு மாற்றம் செய்யப்பட்டார். இந்த நிலையில் கொல்கத்தா உயர்நீதிமன்ற தலைமை நீதிபதியாக இருந்த பிரகாஷ் ஸ்ரீவஸ்தவா ஓய்வுபெற்றதை தொடர்ந்து சிவஞானத்தை தலைமை நீதிபதியாக பரிந்துரைத்து இருக்கிறது கொலீஜியம்.

Published On February 9, 2023