196 நாட்களில் இந்தியாவில் கொரோனா பாதிப்பு 24 லட்சத்தை தாண்டியது- 50 ஆயிரத்தை நோக்கி உயிரிழப்புகள்

Updated: Friday, August 14, 2020, 0:59 [IST]

Subscribe to Oneindia Tamil

டெல்லி: இந்தியாவில் கொரோனாவின் முதல் பாதிப்பு தொடங்கியதில் இருந்து தற்போதைய 196 நாட்களில் கொரோனா மொத்த பாதிப்பு எண்ணிக்கை 24 லட்சத்தை தாண்டியுள்ளது.

24 லட்சத்தை தாண்டியது

இதனைத் தொடர்ந்து மாநிலங்கள் வியாழக்கிழமை மாலை 24 மணிநேர பாதிப்பு, டிஸ்சார்ஜ் விவரங்களை வெளியிட்டன. இதனால் இந்தியாவின் மொத்த கொரோனா பாதிப்பு எண்ணிக்கை 24 லட்சத்தை தாண்டியதாகிவிட்டது. ஆந்திராவில் 24 மணிநேரத்தில் புதியதாக 9996 பேருக்கு கொரோனா உறுதி செய்யப்பட்டது. மேலும் 82 பேர் கொரோனாவால் மரணித்து போயினர். ஆந்திராவில் கொரோனா பாதித்தோர் மொத்த எண்ணிக்கை 2,74,138 ஆக அதிகரித்தது.

தமிழகத்தில் 5835

தமிழகத்தில் வியாழன்று மட்டும் 5835 பேருக்கு கொரோனா தொற்று உறுதியானது. 119 பேர் கொரோனாவால் உயிரிழந்தனர். இதனைத் தொடர்ந்து தமிழகத்தில் மொத்த கொரோனா பாதிப்பு எண்ணிக்கை 3.20 லட்சத்தை எட்டியது. தமிழகத்தில் கொரோனா மரணங்கள் எண்ணிக்கை 5397.

பிற மாநில பாதிப்பு நிலவரம்

மகாராஷ்டிராவில் 11,813; கர்நாடகாவில் 6,706; டெல்லியில் 956 பேருக்கு கொரோனா உறுதிபடுத்தப்பட்டுள்ளது. உ.பியில் 4,537, மேற்கு வங்கத்தில் 2997; பீகாரில் 3,906; தெலுங்கானாவில் 1931 பேருக்கு கொரோனா உறுதி செய்யப்பட்டதாக வியாழன்று மாலை அறிவிக்கப்பட்டது. குஜராத்தில் 1,092 பேருக்கும் அஸ்ஸாமில் 2,796 பேருக்கும் கொரோனா உறுதி செய்யப்பட்டிருக்கிறது.

50 ஆயிரத்தை நெருங்கும் மரணங்கள்

இந்தியாவில் தற்போதைய நிலையில் மொத்த கொரோனா பாதிப்பு எண்ணிக்கை 24,59,613; அதாவது கேரளாவில் முதலாவது கொரோனா பாதிப்பு தொடங்கியதில் இருந்து 196வது நாளில் இந்த எண்ணிக்கை எட்டப்பட்டிருக்கிறது. கொரோனா பாதிப்பில் இருந்து மீண்டவர்கள் எண்ணிக்கை 17,50,636. கொரோனாவால் மாண்டவர்கள் எண்ணிக்கை 48,144. கொரோனாவுக்கு தற்போது சிகிச்சை பெறுவோர் எண்ணிக்கை 6,60,348 மட்டும்.