அதிரடியாக புகுந்த இந்திய கடற்படை.. 15 பேரும் பத்திரமாக மீட்பு.. சோமாலிய கொள்ளையர்கள் தப்பி ஓட்டம்

டெல்லி: சோமாலிய கடற்கொள்ளையர்களால் கடத்தப்பட்ட கப்பல் மீட்கப்பட்டுள்ளது. கப்பலில் இருந்த இந்திய மாலுமிகள் அனைவரும் பத்திரமாக உள்ளதாக இந்திய கடற்படை தெரிவித்துள்ளது.

அரபிக் கடலில் சமீப காலமாக சோமாலிய கடற்கொள்ளையர்கள் அட்டூழியம் அதிகரித்துள்ளது. கடந்த சில வாரங்களுக்கு முன்னர் மால்டோவா நாட்டுக்கு சொந்தமான எம்வி ருயின் என்ற சரக்கு கப்பல் கடற்கொள்ளையர்களால் கடத்தப்பட்டது. இந்த சரக்கு கப்பலில் 18 மாலுமிகள் பயணித்தனர்.

இந்த கப்பல் கடத்தப்பட்ட போது ஏடன் வளைகுடாவில் இந்திய போர் கப்பல் பாதுகாப்பு பணியில் ஈடுபட்டிருந்தது. இதனையடுத்து எம்வி ருயின் சரக்கு கப்பலை மீட்க போர்க் கப்பல்களும் விமானங்களும் களத்தில் இறங்கின. ஐரோப்பிய யூனியன் கடற்படையும் இணைந்து கொண்டது. இந்த கடத்தலின் போது படுகாயமடைந்த மாலும் ஒருவரை இந்திய கடற்படை மீட்டது.

இந்த நிலையில் 15 இந்திய மாலுமிகளுடன் சென்ற எம்வி லைலா நோர்ஃபோக் என்ற சரக்கு கப்பல் சோமாலியா அருகே கடற்கொள்ளையர்களால் கடத்தப்பட்டது. லைபீரியா நாட்டு கொடியுடன் வந்த இந்த சரக்கு கப்பலை சோமாலியா கடற்கொள்ளையர்கள் கடத்திச் சென்றனர்.

இந்தக் கடத்தல் சம்பவத்தைத் தொடர்ந்து ஐ.என்.எஸ். சென்னை போர்க் கப்பல், கடற்படை விமானங்கள் உடனடியாக கடத்தப்பட்ட கப்பல் இருப்பிடத்தை நோக்கி விரைந்தன. தொடர்ந்து கப்பலை நெருங்கியதும் எச்சரிக்கை விடுத்த கடற்படையினர்.. தொடர்ந்து கப்பலுக்குள் இறங்கினர். கப்பலுக்குள் இந்திய கடற்படையினர் தீவிர ஆய்வு மேற்கொண்டனர்.

ஆனால், கப்பலுக்குள் கடற்கொள்ளையர்கள் யாரும் இல்லை. கடற்படையினர் வருவதற்குள் தப்பி ஓடிவிட்டதாக கூறப்படுகிறது. முழுமையான சோதனைகளுக்கு பின் கப்பல் புறப்பட்டது. கப்பலில் இருந்த 15 இந்திய மாலுமிகளும் பிலிப்பைன்சை 6 பேரும் பத்திரமாக உள்ளனர்.

English summary

A ship hijacked by Somali pirates has been recovered. The Indian Navy said all Indian sailors on board are safe.