F1 Visa: இந்திய மாணவர்களுக்கான அமெரிக்க கல்வி விசா சரிவு! டிரம்ப் நெருக்கடி!

டெல்லி: அமெரிக்காவில் இந்திய மாணவர்களுக்கு எஃப்-1 கல்வி விசாக்கள் வழங்கப்படுவது கடந்த ஆண்டு (2025) ஜூன் மற்றும் ஜூலை மாதங்களில் 69 சதவீதம் அளவுக்கு கணிசமாகச் சரிந்துள்ளது.

கடந்த 2017 ஆம் ஆண்டு முதல் 2021 ஆம் ஆண்டு வரை அமெரிக்க அதிபராக டிரம்ப் பதவியில் இருந்தார். அப்போது அமெரிக்காவில் வசிக்கும், பணியாற்றும் வெளிநாட்டினர் மீது மிகப் பெரிய நடவடிக்கைகளையும் கட்டுப்பாடுகளையும் அவர் விதிக்கவில்லை.

ஆனால் கடந்த ஆண்டு ஜனவரியில் டிரம்ப் 2ஆவது முறையாக அதிபராக பதவியேற்றார். அப்போது முதல் இந்தியர்கள் உள்பட வெளிநாட்டினர் மீது கடுமையாக கட்டுப்பாடுகளை விதித்து வருகிறார்.

அமெரிக்காவில் சட்டவிரோதமாக தங்கியிருந்த சுமார் 2 லட்சத்துக்கும் மேற்பட்ட வெளிநாட்டினர் நாடு கடத்தப்பட்டனர். அமெரிக்காவில் பணியாற்ற வழங்கப்படும் எச்1 பி விசா கட்டணம் ரூ.88 லட்சமாக உயர்த்தப்பட்டது. அமெரிக்காவில் கல்வி பயில வெளிநாட்டு மாணவர்களுக்கு வழங்கப்படும் எப்1 விசா கட்டணம் இரு மடங்காக அதிகரிக்கப்பட்டு உள்ளது. மேலும் விசா நடைமுறைகளும் கடுமையாக்கப்பட்டு உள்ளன.

முந்தைய ஆண்டுடன் ஒப்பிடுகையில், விசா வழங்கப்பட்ட விகிதம் 69 சதவீதம் குறைந்துள்ளது. கடந்த 2025 ஜூன் மற்றும் ஜூலை மாதங்களில் மொத்தம் 12,776 எஃப்-1 விசாக்களே இந்தியர்களுக்கு வழங்கப்பட்டன. இது 2024 ஆம் ஆண்டின் அதே காலகட்டத்தில் வழங்கப்பட்ட 41,336 விசாக்களுடன் ஒப்பிடுகையில், மூன்றில் ஒரு பங்கிற்கும் குறைவான எண்ணிக்கையாகும்.

அமெரிக்கப் பல்கலைக்கழகங்களில் இலையுதிர் காலப் பருவம் ஆகஸ்ட்-செப்டம்பர் மாதங்களில் தொடங்கும் என்பதால், வழக்கம் போல் இந்திய மாணவர்களுக்கு ஜூன் அல்லது ஜூலை மாதங்களில் விசாக்கள் உச்சம் தொடும்.

கடந்த ஆண்டின் (2025) கல்விப் பருவத்திற்கு முன், ஜூன் மாதத்தில் 10,695 விசாக்களுடன் உச்சம் தொட்ட நிலையில், ஜூலையில் 2,081 ஆகவும், ஆகஸ்டில் 2,389 ஆகவும் சரிந்தது. 2024 இல், ஜூன் மாதம் 26,731 ஆகவும், 2023 இல் ஜூன் மாதம் 40,224 ஆகவும் உச்சம் இருந்தது. கொரோனாவுக்கு பிந்தைய ஆண்டுகளில் விசா வழங்கல் கணிசமாக அதிகரித்தது. 2021 ஜூன்-ஜூலையில் 40,194 இலிருந்து, 2022 இல் 62,229 ஆகவும், 2023 இல் 72,027 ஆகவும் உயர்ந்தது.

எனினும், 2023 ஆம் ஆண்டின் இந்த உச்சநிலை, டிரம்ப் நிர்வாகம் பொறுப்பேற்பதற்கு முன்பே, 2024 ஜூன்-ஜூலை மாதங்களில் 41,336 ஆகக் குறைந்தது. 2025 ஜூன் மற்றும் ஜூலை மாதங்களில் சீன மாணவர்களுக்கான எஃப்-1 விசாக்களும் சுமார் 56 சதவீதம் சரிந்தன.

இந்திய மாணவர்களை விட அதிக விசாக்களை, அதாவது 17,025 விசாக்களை சீன மாணவர்கள் பெற்றனர்; அதேசமயம் இந்திய மாணவர்களுக்கு 12,776 விசாக்களே கிடைத்தன.

இந்தக் காலகட்டத்தில் (ஜூன்-ஜூலை) சீன மாணவர்கள் இந்திய மாணவர்களை விட அதிக எஃப்-1 விசாக்களைப் பெற்றது கடைசியாக 2021 இல் தான் நிகழ்ந்தது (சீனாவுக்கு 55,059; இந்தியாவுக்கு 40,194). அதன்பிறகு இந்திய மாணவர்களுக்கு வழங்கப்பட்ட விசாக்களின் எண்ணிக்கை உயர்ந்தே இருந்தது.

உதாரணமாக, 2023 ஜூன்-ஜூலையில், இந்திய மாணவர்களுக்கு 72,000க்கும் மேற்பட்ட விசாக்கள் வழங்கப்பட்ட நிலையில், சீனாவிற்கு 42,854 விசாக்களே கிடைத்தன.

2025 ஜூன்-ஜூலை மாதங்களில் எஃப்-1 விசா வழங்கலில் ஏற்பட்ட சரிவுக்கு, டிரம்ப் நிர்வாகத்தால் கொண்டுவரப்பட்ட புதிய விதிமுறைகள் முக்கியக் காரணம். இதில் மே மாத இறுதியில் சில வாரங்களுக்கு மாணவர் விசா விண்ணப்பதாரர்களுக்கான நேர்காணல்களை நிறுத்தியது ஒரு முக்கிய நடவடிக்கை. ஜூன் 18 அன்று தான் நேர்காணல்கள் மீண்டும் தொடங்கப்பட்டன.

மே 2025 இல், வெளியுறவுத் துறைச் செயலாளர் மார்கோ ரூபியோ, "தேவையான சமூக ஊடகச் சரிபார்ப்பு மற்றும் பரிசோதனையை விரிவாக்குவதற்கான ஏற்பாடுகள்" நடைபெறுவதால், கூடுதல் மாணவர் அல்லது துணைப் பார்வையாளர் விசா அப்பாயிண்ட்மென்ட் வழங்கப்படாது என்று அறிவித்திருந்தார்.

மேலும் ஜூன் 23 அன்று, இந்தியாவில் உள்ள அமெரிக்கத் தூதரகம், மாணவர் மற்றும் துணைப் பார்வையாளர் விசா கோருவோர் தங்கள் சமூக ஊடகக் கணக்கு தனியுரிமை அமைப்புகளை "பொது" என மாற்றிக் கொள்ளுமாறு கேட்டுக் கொண்டது.

விண்ணப்பப் படிவத்தில், கடந்த ஐந்து ஆண்டுகளாகப் பயன்படுத்திய அனைத்து சமூக ஊடகப் பயனர்பெயர்களையும் குறிப்பிட வேண்டும் என்றும் தூதரகம் வலியுறுத்தியது. 2025 இன் ஆரம்பத்தில் டிரம்ப் நிர்வாகத்தின் இத்தகைய நடவடிக்கைகள் மாணவர்களிடையே கவலையை ஏற்படுத்தின. ஹார்வர்ட் மற்றும் ஸ்டான்ஃபோர்ட் உள்ளிட்ட பல பல்கலைக்கழகங்களில் ஆராய்ச்சிப் பணிகளை பாதிக்கும் வகையில் ஆராய்ச்சி நிதிகளும் முடக்கப்பட்டன.

மேலும், பாலஸ்தீன ஆதரவு போராட்டங்கள் அல்லது சட்டம் அமலாக்க வழக்குகளில் ஈடுபட்டிருந்த சில சர்வதேச மாணவர்களின் SEVIS (Student and Exchange Visitor Information System) பதிவுகள் கடந்த ஏப்ரல் மாதம் திடீரென நீக்கப்பட்டன. எனினும், இதை எதிர்த்து தொடுக்கப்பட்ட வழக்குகளுக்குப் பிறகு இந்தப் பதிவுகள் மீட்டெடுக்கப்பட்டன.

2024-25 ஆம் ஆண்டில் அமெரிக்காவில் உள்ள மொத்த சர்வதேச மாணவர் சேர்க்கையில் இந்திய மாணவர்கள் மிகப்பெரிய குழுவாகத் திகழ்கின்றனர். ஒரு அமைப்பின் தரவுகளின்படி, 3.63 லட்சம் இந்திய மாணவர்கள் மொத்த சேர்க்கையில் சுமார் 31 சதவீத பங்கை வகிக்கின்றனர்.

சீன மாணவர்கள் சுமார் 23 சதவீதத்துடன் அடுத்த இடத்தில் உள்ளனர். 2023-24 ஆம் ஆண்டில் இந்திய மாணவர்கள் முதன்முறையாக சீன மாணவர்களை மிஞ்சி அமெரிக்காவில் மிகப்பெரிய சர்வதேச மாணவர் குழுவாக உருவெடுத்தனர்.

தற்போது கல்வி விசா 69 சதவீதம் குறைந்துள்ளதால் அமெரிக்காவுக்கு மாற்றாக பிரிட்டன், ஜெர்மனி, பிரான்ஸ் உள்ளிட்ட ஐரோப்பிய நாடுகளில் கல்வி பயில இந்திய மாணவர்கள் அதிக ஆர்வம் காட்டி வருகிறார்கள்.

English summary

F-1 visa issuance for Indian students in the United States saw a sharp decline of 69% during June and July 2025 compared to the previous period. The significant drop has raised concerns among students planning to pursue higher education in the US, as visa approvals during the peak admission season have reduced drastically. Authorities and education experts are now examining the reasons behind the sudden fall in F-1 student visa approvals.