அடுத்த சில நாட்களில் வருது.. நாடு முழுக்க பல லட்சம் பேருக்கு ரூ.2000.. யாருக்கெல்லாம் தரப்படும்?

Updated: Thursday, November 13, 2025, 9:06 [IST]

Subscribe to Oneindia Tamil

டெல்லி: பிரதமர் கிசான் சம்மான் நிதி யோஜனா திட்டத்தின்கீழ் விவசாயிகளுக்கான அடுத்த தவணை நிதி விரைவில் விடுவிக்கப்படவுள்ளதாக தகவல்கள் வெளியாகியுள்ளன. நவம்பர் 24 அன்று, இந்த ரூ.2,000 தொகை விவசாயிகளின் வங்கிக் கணக்குகளில் செலுத்தப்படலாம் என எதிர்பார்க்கப்படுகிறது.

இந்தத் திட்டம், ஒவ்வொரு ஆண்டும் விவசாயிகளுக்கு ரூ.6,000 நிதியுதவி வழங்குகிறது. இது நான்கு மாதங்களுக்கு ஒருமுறை ரூ.2,000 என மூன்று தவணைகளாகப் பிரித்து வழங்கப்படுகிறது. கடைசியாக, 20வது தவணை ஜூலை மாதத்தில் வழங்கப்பட்ட நிலையில், விவசாயிகள் தற்போது 21வது தவணைக்காக காத்திருக்கின்றனர்.

பிரதமர் கிசான் சம்மான் நிதி யோஜனா

வழக்கமாக நான்கு மாத இடைவெளியில் தவணைகள் வழங்கப்படும். அந்த வகையில், நடப்பு தவணை நவம்பர் மாத இறுதிக்குள் வந்திருக்க வேண்டும். இதனால், அடுத்த தவணை எப்போது வரும் என்ற கேள்வி விவசாயிகளிடையே நிலவி வந்தது.

ஊடக அறிக்கைகளின்படி, நவம்பர் கடைசி வாரத்தில் அடுத்த தவணை வெளியாகும் வாய்ப்புள்ளது. பிரதமர் நரேந்திர மோடி அன்று பீகார் மாநிலம் மோதிஹாரியில் நடைபெறும் ஒரு பொதுக்கூட்டத்தில் உரையாற்றவுள்ளார். அந்த சமயத்தில், பி.எம். கிசான் திட்டத்தின் 21வது தவணையை அவர் விடுவிக்கலாம் என்று எதிர்பார்க்கப்படுகிறது.

பிரதமர் மோடியின் வெளிநாட்டுப் பயணம் காரணமாக இந்த தவணை செலுத்துவதில் தாமதம் ஏற்பட்டது. அவர் தற்போது நாடு திரும்பியுள்ளதால், நவம்பர் 24 அன்று விவசாயிகளின் கணக்குகளுக்கு பணம் வந்து சேரலாம்.

நடப்பு தவணை நவம்பர் மாத இறுதிக்குள் வரும்

அரசின் தரப்பிலிருந்து அனைத்து நடைமுறைகளும் முடிக்கப்பட்டுவிட்டதாகவும், அதிகாரப்பூர்வ அறிவிப்பு மட்டுமே வெளியாக வேண்டும் என்றும் ஊடகங்கள் தெரிவிக்கின்றன. கடந்த முறை போலவே, இந்த தவணையும் ஒரு பெரிய நிகழ்வின் மூலம் வெளியிடப்படலாம் என எதிர்பார்க்கப்படுகிறது.

பிரதமர் கிசான் சம்மான் நிதி யோஜனா நிதியின் அடுத்த தவணையை தடையின்றிப் பெற, விவசாயிகள் சில முக்கிய தகவல்களைப் புதுப்பிக்க வேண்டும். குறிப்பாக, eKYC கட்டாயம் செய்ய வேண்டும். eKYC செய்யாத விவசாயிகளுக்கு தவணை கிடைக்காது என அரசு திட்டவட்டமாகத் தெரிவித்துள்ளது.

எனவே, விவசாயிகள் pmkisan.gov.in இணையதளம் வழியாகவோ அல்லது அருகிலுள்ள CSC மையத்தின் மூலமாகவோ தங்கள் eKYC தகவல்களை உடனடியாகப் புதுப்பிக்குமாறு கேட்டுக் கொள்ளப்படுகிறார்கள்.

வங்கிக் கணக்கு மூடப்பட்டிருந்தாலோ, IFSC குறியீடு தவறாக இருந்தாலோ, தவணை பெறுவதில் சிக்கல்கள் எழலாம். ஆகவே, வங்கிக் கணக்கு விவரங்கள், IFSC குறியீடு மற்றும் ஆதார் இணைப்பு போன்ற தகவல்களைச் சரிபார்ப்பது அவசியம்.

பி.எம். கிசான்

பி.எம். கிசான் இணையதளத்தில் உள்ள 'பயனாளி நிலை' (Beneficiary Status) பிரிவில், பதிவு எண் அல்லது மொபைல் எண்ணை உள்ளிட்டு, பயனாளிகள் பட்டியலில் உங்கள் பெயர் இருப்பதை உறுதிப்படுத்திக்கொள்ளுங்கள். பெயர் நீக்கப்பட்டிருந்தாலோ அல்லது தகவல் முழுமையடையாமல் இருந்தாலோ பணம் வந்து சேராது.

விவசாயிகள் தங்கள் மாநில இணையதளம் அல்லது அருகிலுள்ள CSC மையத்திற்குச் சென்று விவசாயி பதிவை மேற்கொள்ளலாம். வரி செலுத்துபவர்கள், நிறுவன நிலம் வைத்திருப்பவர்கள், அல்லது ரூ.10,000-க்கு மேல் ஓய்வூதியம் பெறுபவர்கள் கிசான் சம்மான் நிதி யோஜனாவின் பலனைப் பெற முடியாது.

தகவல்கள் சரியாகப் புதுப்பிக்கப்பட்டிருந்தால், ரூ.2,000க்கான அடுத்த தவணை விரைவில் உங்கள் கணக்கில் வரலாம். நவம்பர் 24ஆம் தேதி பிரதமர் பீகாரில் விவசாயிகளுக்காக ஒரு முக்கிய அறிவிப்பை வெளியிடலாம் என்று எதிர்பார்க்கப்படுகிறது.