மத்திய கிழக்கு எண்ணெய் நெருக்கடி.. ரேஷன், பெட்ரோல் தட்டுப்பாடு இல்லாமல் இந்தியா தப்பித்தது எப்படி?

டெல்லி: 2026 ஆண்டின் தொடக்கத்தில் ஈரான், இஸ்ரேல் மற்றும் அமெரிக்கா இடையே ஏற்பட்ட மோதலால் மத்திய கிழக்கு நாடுகளில் பயங்கர பதற்றம் உருவானது. இதனால் உலக சந்தையில் கச்சா எண்ணெய் விலை தாறுமாறாக உயர்ந்தது. கப்பல் போக்குவரத்துக்கு ஆபத்து அதிகரித்ததால், உலக நாடுகள் பலவற்றில் பெட்ரோல், டீசல் தட்டுப்பாடு வரும் என்ற பயம் பரவியது. பல நாடுகள் எரிபொருளை ரேஷன் முறையில் வழங்கவும், வாகனப் பயன்பாட்டுக்குக் கட்டுப்பாடுகள் விதிக்கவும் தயாராயின.

தங்களுக்குத் தேவையான எண்ணெயில் கிட்டத்தட்ட 90 சதவீதத்தை வெளிநாடுகளில் இருந்து இறக்குமதி செய்யும் இந்தியாவிற்கு இந்த நெருக்கடி பெரிய அடியைக் கொடுக்கும் என்றுதான் எல்லாரும் எதிர்பார்த்தார்கள். ஆனால், அப்படி எதுவும் நடக்கவில்லை. நெருக்கடி வந்த பிறகு பதற்றமடைந்து அவசரக் கட்டுப்பாடுகளை விதிப்பதற்குப் பதிலாக, கடந்த 10 ஆண்டுகளாக இந்தியா திட்டமிட்டு உருவாக்கிய சில பாதுகாப்பு வழிமுறைகள் இப்போது கைகொடுத்துள்ளன.

ஒரே இடத்தை நம்பியிருக்காத இந்தியா

இந்தியாவின் இந்த வெற்றிக்கு மிக முக்கியக் காரணம், கச்சா எண்ணெய் வாங்கும் நாடுகளின் எண்ணிக்கையை உயர்த்தியதுதான். 2006-07ல் வெறும் 27 நாடுகளிடம் இருந்து மட்டுமே எண்ணெய் வாங்கிய இந்தியா, இப்போது 40-க்கும் மேற்பட்ட நாடுகளிடம் இருந்து வாங்குகிறது. இதனால் ஒரே ஒரு பிராந்தியத்தை மட்டும் நம்பியிருக்கும் நிலை மாறியுள்ளது.

வழக்கமான வளைகுடா நாடுகளைத் தவிர்த்து ரஷ்யா, வெனிசுலா, அமெரிக்கா, கயானா மற்றும் சில ஆப்பிரிக்க நாடுகளிடம் இருந்தும் இந்தியா இப்போது எண்ணெய் வாங்குகிறது. கடந்த 2026 ஏப்ரல் மாதத்தில் மட்டும், வெனிசுலா நாட்டிடம் இருந்து நல்ல தள்ளுபடி விலையில் 12 மில்லியனுக்கும் அதிகமான பேரல் கச்சா எண்ணெயை இந்தியா இறக்குமதி செய்துள்ளது. உலகிலேயே மிக முக்கியமான கடல் வழித்தடமான ஹார்முஸ் ஜலசந்திப் பகுதியில் பதற்றம் நிலவியபோது, இந்தியாவின் இந்த மாற்றுத் திட்டம் பெரிய உதவியாக இருந்தது.

மாற்று கடல் வழிகளும், சேமித்து வைக்கப்பட்ட எண்ணெயும்

கடல் வழியால் வரும் ஆபத்தைக் குறைக்க ஓமானில் உள்ள சோஹர், ஐக்கிய அரபு அமீரகத்தில் உள்ள புஜைரா மற்றும் கோர்ஃபக்கான் போன்ற மாற்று துறைமுக வழிகளை இந்தியா பயன்படுத்தியது. இதன் மூலம் ஆபத்தான கடல் பகுதிகள் தவிர்க்கப்பட்டன. மேலும், கடல் வழிப் போக்குவரத்தைச் சீரமைக்க 60 நாடுகள் பங்கேற்ற ஆலோசனைக் கூட்டங்களிலும் இந்தியா கலந்துகொண்டது.

போர் பயத்தால் கப்பல்களுக்கான காப்பீட்டு கட்டணங்கள் (Insurance premiums) உலகளவில் 300 சதவீதம் வரை உயர்ந்தபோதும், மாற்று வழிகள் மற்றும் சுமுகமான பேச்சுவார்த்தைகள் மூலம் இந்தியா தன் போக்குவரத்துச் செலவைக் கட்டுப்பாட்டுக்குள் வைத்திருந்தது.

நெருக்கடியைச் சமாளிக்க மற்றொரு முக்கியக் காரணம், இந்தியாவிடம் இருந்த அவசர கால எண்ணெய் சேமிப்பு (Strategic Reserves) ஆகும். கிட்டத்தட்ட 74 நாட்களுக்குத் தேவையான எண்ணெய் மற்றும் எரிவாயு இருப்பு இந்தியாவிடம் இருந்தது.

எண்ணெய் அமைச்சகத்தின் கணக்குப்படி:

கிட்டத்தட்ட 60 நாட்களுக்குத் தேவையான கச்சா எண்ணெய் இருப்பு உள்ளது.

சுமார் 60 நாட்களுக்குத் தேவையான இயற்கை எரிவாயு இருப்பு உள்ளது.

கிட்டத்தட்ட 45 நாட்களுக்குத் தேவையான எல்பிஜி (சமையல் எரிவாயு) இருப்பு உள்ளது.

சமூக வலைத்தளங்களில் பெட்ரோல் தட்டுப்பாடு எனப் பரவிய வதந்திகளுக்கு மத்தியில், நாட்டில் எங்கும் தட்டுப்பாடு இல்லை என்று அதிகாரிகள் தெளிவுபடுத்தினர்.

இந்தியாவின் சுத்திகரிப்பு பலமும், ராஜதந்திரமும்

கச்சா எண்ணெயைச் சுத்திகரிப்பதில் இந்தியா உலக அளவில் 4-வது இடத்திலும், சுத்திகரித்த பெட்ரோலியப் பொருட்களை ஏற்றுமதி செய்வதில் 5-வது இடத்திலும் உள்ளது. உலகளவில் நெருக்கடி இருந்தபோதும் இந்திய சுத்திகரிப்பு நிலையங்கள் முழு வீச்சில் இயங்கின.

உள்நாட்டு சமையல் எரிவாயு (LPG) உற்பத்தி 40 சதவீதம் வரை அதிகரிக்கப்பட்டது. மேலும், 1955-ஆம் ஆண்டின் அத்தியாவசியப் பொருட்கள் சட்டத்தைப் பயன்படுத்தி, சுத்திகரிப்பு நிலையங்கள் தங்களின் உற்பத்தியை உள்நாட்டு சமையல் எரிவாயுத் தேவைக்கு மட்டுமே பயன்படுத்த அரசு உத்தரவிட்டது. அமெரிக்கா, ரஷ்யா, ஆஸ்திரேலியா போன்ற நாடுகளிலிருந்தும் கூடுதல் காஸ்கள் வரவழைக்கப்பட்டன. உலக சந்தையில் விலை மாறினாலும், மத்திய அரசின் வரி குறைப்பு மற்றும் சரியான விநியோகம் காரணமாக இந்தியாவில் பெட்ரோல், டீசல் விலை பெரிய அளவில் உயராமல் நிலையாக இருந்தது.

வெளியுறவுக் கொள்கையிலும் இந்தியா சாதுரியமாகச் செயல்பட்டது. மோதல் நடந்துகொண்டிருந்த போதே ஈரான், இஸ்ரேல், அமெரிக்கா மற்றும் வளைகுடா நாடுகளுடன் இந்தியா ஒரே நேரத்தில் நல்லுறவைப் பேணியது. இந்திய வெளியுறவு அமைச்சரும், எண்ணெய் துறை அமைச்சரும் வளைகுடா நாடுகளுடன் பேசி தடையற்ற விநியோகத்தை உறுதி செய்தனர்.

இந்திய கடற்படையின் பாதுகாப்போடு 'எம்டி சர்வ சக்தி' என்ற கப்பல் மூலம் 46,313 டன் சமையல் எரிவாயு பத்திரமாக விசாகப்பட்டினம் கொண்டு வரப்பட்டது, இந்தியாவின் பாதுகாப்புத் திறனைக் காட்டியது.

விவசாயிகள் மற்றும் சிறு தொழில்களுக்குப் பாதுகாப்பு

இந்த நெருக்கடி நாட்டின் பொருளாதாரத்தைப் பாதிக்காமல் இருக்கப் பல துறைகளுக்கு அரசு ஆதரவு அளித்தது:

விவசாயிகளுக்கு உரம்: பயிர் நடவு செய்யும் காரிஃப் பருவத்திற்காக 177 லட்சம் டன் உர இருப்பு உறுதி செய்யப்பட்டது. உர உற்பத்திக்கு இயற்கை எரிவாயு தேவை என்பதால், தட்டுப்பாடு வராமல் தடுக்க முந்தைய அளவை விட 36% கூடுதல் உரம் இருப்பு வைக்கப்பட்டது.

சிறு தொழில்கள் (MSME): எரிபொருள் விலை உயர்வால் சிறு தொழில்களில் ஆட்குறைப்பு அல்லது பணப் பற்றாக்குறை வராமல் தடுக்க ₹2.5 லட்சம் கோடி கடன் உத்தரவாதத் திட்டத்தை அரசு நீட்டித்தது.

விமானக் கட்டணம்: விமான எரிபொருள் விலை உயர்ந்தாலும், விமான நிலைய தரையிறக்கம் மற்றும் பார்க்கிங் கட்டணங்களை 25 சதவீதம் குறைத்து உள்நாட்டு விமானக் கட்டணங்கள் உயராமல் தடுக்கப்பட்டது.

4.75 லட்சம் இந்தியர்கள் மீட்பு

பாதிப்புக்குள்ளான பகுதிகளில் இருந்து கிட்டத்தட்ட 4.75 லட்சம் இந்தியர்களை அரசு பத்திரமாக மீட்டது அல்லது அவர்களுக்கு உதவியது. இந்த எண்ணிக்கை மால்டா அல்லது மாலத்தீவு போன்ற நாடுகளின் மொத்த மக்கள் தொகைக்குச் சமம். இது வளைகுடா நாடுகளில் வாழும் 1 கோடி இந்தியர்களிடையே நம்பிக்கையை ஏற்படுத்தியது. மேலும், அவர்கள் மூலம் ஆண்டுதோறும் இந்தியாவுக்கு வரும் 100 பில்லியன் டாலர் வெளிநாட்டுப் பண வரத்தையும் பாதுகாத்தது.

உலக நாடுகள் செய்த கடுமையான கட்டுப்பாடுகள்

இந்தியா நிலைமையைச் சமாளித்த போது, உலகின் பிற நாடுகள் கடுமையான அவசரகாலக் கட்டுப்பாடுகளை விதித்தன:

18 நாடுகள் வாகனங்களுக்கு ரேஷன் முறை, ஒற்றை-இரட்டை இலக்க எண்கள் அடிப்படையில் வாகனங்களை இயக்குதல் போன்ற கட்டுப்பாடுகளை விதித்தன.

13 நாடுகள் அரசு ஊழியர்களைக் கட்டாயமாக வீட்டிலிருந்து வேலை செய்ய (Work from home) உத்தரவிட்டன.

3 நாடுகள் சமையல் எரிவாயுப் பயன்பாட்டுக்கு நேரடிக் கட்டுப்பாடு விதித்தன.

35-க்கும் மேற்பட்ட நாடுகள் மின்சாரச் சேமிப்பு, விளக்குகள் மற்றும் ஏசி பயன்பாட்டைக் குறைக்கப் பிரச்சாரம் செய்தன.

இந்தோனேசியா, இலங்கை, தாய்லாந்து, மலேசியா, தென்கொரியா ஆகிய நாடுகள் வீட்டிலிருந்து வேலை செய்வதை ஊக்குவித்தன. பிலிப்பைன்ஸ் அரசு 4 நாட்கள் மட்டுமே வேலை வாரமாக அறிவித்தது. வங்காளதேசம், இலங்கை போன்ற நாடுகள் ஏசி வெப்பநிலையை 25°C - 26°C ஆகக் குறைக்க உத்தரவிட்டன.

இலங்கை புதன்கிழமைகளைப் பொது விடுமுறையாக அறிவித்தது. எகிப்து நாடு கடைகள், உணவகங்களைச் சீக்கிரமாக மூட உத்தரவிட்டது. ஆனால், இந்தியாவில் இப்படிப்பட்ட எந்தக் கடுமையான சூழ்நிலையும் வரவில்லை.

பிரதமர் மோடியின் சிக்கன வேண்டுகோள்

பிரதமர் நரேந்திர மோடி, மக்கள் அவசரப்பட்டுப் பயப்பட வேண்டாம் என்றும், அதே சமயம் முன்னெச்சரிக்கையாகச் சிக்கனத்தைக் கடைப்பிடிக்குமாறும் கேட்டுக்கொண்டார்.

முடிந்தவரை வீட்டிலிருந்து வேலை செய்யும் (Work-from-home) முறையைப் பின்பற்றுமாறும், அலுவலகக் கூட்டங்களை ஆன்லைனில் நடத்துமாறும் நிறுவனங்கள் கேட்டுக்கொள்ளப்பட்டன. பெட்ரோல், டீசல், சமையல் எரிவாயுவை அளவோடு பயன்படுத்தவும், பேருந்து, மெட்ரோ போன்ற பொதுப் போக்குவரத்தைப் பயன்படுத்தவும் அறிவுறுத்தப்பட்டது. கார் பூலிங் (ஒரே காரில் பலர் பயணிப்பது) மற்றும் மின்சார வாகனப் பயன்பாடு ஊக்குவிக்கப்பட்டது.

தேவையற்ற வெளிநாட்டுப் பயணங்களைத் தவிர்த்து, உள்நாட்டுச் சுற்றுலாவை ஆதரிக்குமாறு மக்கள் கேட்டுக்கொள்ளப்பட்டனர். ஆடம்பரப் பொருட்கள் இறக்குமதி மற்றும் தேவையற்ற தங்கக் கொள்முதலைக் குறைப்பதன் மூலம் நாட்டின் அன்னியச் செலாவணி இருப்பு பாதுகாக்கப்பட்டது. அரசுத் துறைகளிலும் அதிகாரிகள் ஆடம்பரப் பயணங்களைக் குறைத்துச் சிக்கனத்தைக் கடைப்பிடிக்க உத்தரவிடப்பட்டது.

உலகளவில் நடக்கும் எரிசக்தி அதிர்ச்சிகளில் இருந்து இந்தியாவுக்கு முழு விலக்கு கிடைத்துவிட்டது என்று கூற முடியாது. நாம் இன்னும் இறக்குமதியைத்தான் நம்பியிருக்கிறோம். ஆனால், இந்த மத்திய கிழக்கு நெருக்கடி காட்டும் உண்மை என்னவென்றால், இந்தியா இனி வெறும் எண்ணெய்க்காகப் பிற நாடுகளைக் கெஞ்சும் நிலையில் இல்லை; மாறாக, மாற்று வழிகள், அவசர காலச் சேமிப்பு, ராஜதந்திர உறவுகள் மூலம் எவ்வளவு பெரிய உலகளாவிய நெருக்கடியையும் தட்டுப்பாடு இல்லாமல் சமாளிக்கும் திறனைப் பெற்றுள்ளது என்பதே.

English summary

From WFH To Fuel Discipline, How India Is Trying To Cushion The Iran-US War Impact