துணை ஜனாதிபதி தேர்தல்.. ஜெகதீப் தன்கர் வேட்புமனு தாக்கல்! பக்கத்தில் பிரதமர் நரேந்திர மோடி

டெல்லி: துணை குடியரசுத் தலைவர் தேர்தலுக்கு ஜெகதீப் தன்கர் இன்று வேட்புமனு தாக்கல் செய்துள்ளார்.

நாட்டின் அடுத்த குடியரசுத் தலைவரைத் தேர்வு செய்ய இன்று தேர்தல் நடைபெறுகிறது. எம்பிக்கள், எம்எல்ஏக்கள் இன்று காலை முதலே வாக்களித்து வருகின்றனர்.

இந்த தேர்தலில் எதிர்க்கட்சிகளின் பொது வேட்பாளராக யஷ்வந்த் சின்காவும் பாஜகவின் தேசிய ஜனநாயகக் கூட்டணி வேட்பாளராகத் திரெளபதி முர்முவும் அறிவிக்கப்பட்டு உள்ளனர்.

துணை குடியரசுத் தலைவர் தேர்தல்

அதேபோல துணை குடியரசுத் தலைவராக உள்ள வெங்கையா நாயுடுவின் பதவிக்காலமும் வரும் ஆகஸ்ட் மாதத்துடன் நிறைவடைகிறது. இதற்கான தேர்தலும் அறிவிக்கப்பட்டு உள்ளது. புதிய துணை குடியரசுத் தலைவரைத் தேர்வு செய்ய வரும் ஆகஸ்ட் 6ஆம் தேதி தேர்தல் நடைபெறும் என அறிவிக்கப்பட்டுள்ளது. இதற்கான வேட்புமனு தாக்கல் தொடங்கி நடைபெற்று வருகிறது.

வேட்பு மனுத்தாக்கல்

துணை குடியரசுத் தலைவர் பதவிக்கு ஆளும் பாஜகவின் தேசிய ஜனநாயகக் கூட்டணி வேட்பாளராக ஜெகதீப் தன்கர் அறிவிக்கப்பட்டு இருந்தார். நாளையுடன் (ஜூலை 19) வேட்பு மனு தாக்கல் நிறைவடையும் நிலையில், துணை குடியரசுத் தலைவர் தேர்தலுக்கு ஜெகதீப் தன்கர் இன்று வேட்புமனு தாக்கல் செய்துள்ளார். அப்போது பிரதமர் மோடி, அமைச்சர்கள் அமித் ஷா, ராஜ்நாத் சிங், நிதின் கட்கரி மற்றும் பாஜக தேசிய தலைவர் ஜே.பி. நட்டா உடன் இருந்தனர்.

ஜெகதீப் தன்கர்

ராஜஸ்தான் மாநிலத்தில் பாஜகவில் மிக நீண்ட காலம் பணியாற்றி வந்தவர் ஜெகதீப் தன்கர். அதைத் தொடர்ந்து அவர் மேற்கு வங்க ஆளுநராகவும் ஜெகதீப் தன்கர் இருந்தார். முன்னதாக இன்றைய தினம் ஜெகதீப் தன்கர், பல்வேறு கட்சிகளைச் சேர்ந்த எம்.பி.க்களை சந்தித்து துணை குடியரசுத் தலைவர் தேர்தலுக்கு ஆதரவு திரட்டினார். அப்போதும் பிரதமர் நரேந்திர மோடி அவருடன் இருந்தார்.

மார்கரெட் ஆல்வா

இந்தத் தேர்தலில் ஜெகதீப் தன்கருக்கு எதிராக எதிர்க்கட்சிகளின் பொது வேட்பாளராக மார்கரெட் ஆல்வா அறிவிக்கப்பட்டுள்ளார். காங்கிரஸ் கட்சி மூத்த தலைவர்களில் ஒருவரான மார்கரெட் ஆல்வாவுக்கு கர்நாடகா மாநிலம் மங்களூரு சொந்த ஊராகும். இவர் பல்வேறு காலகட்டங்களில் மத்திய அமைச்சராகவும் ஆளுநராகவும் பணியாற்றியவர். இவரும் விரைவில் வேட்புமனுத் தாக்கல் செய்வார் என எதிர்பார்க்கப்படுகிறது.

English summary

Jagdeep Dhankhar filed his nomination papers for Vice-President election: (துணை குடியரசுத் தலைவர் தேர்தல் ஜெகதீப் தன்கர்) Vice-President election latest updates in tamil.