காபூல் இரட்டை குண்டுவெடிப்புக்கு காரணமான ஐ.எஸ்.ஐ.எஸ்-கே அமைப்பில் 14 கேரள இளைஞர்கள்? அதிர்ச்சி தகவல்

Updated: Saturday, August 28, 2021, 15:00 [IST]

Subscribe to Oneindia Tamil

டெல்லி: ஆப்கானிஸ்தான் தலைநகர் காபூலில் வியாழக்கிழமையன்று நடத்தப்பட்ட இரட்டை குண்டுவெடிப்புக்கு காரணமாக ஐ.எஸ்.ஐ.எஸ்.-கே அமைப்பில் கேரளாவை சேர்ந்த 14 இளைஞர்கள் இருப்பதாக உளவுத்துறை வட்டாரங்கள் தெரிவித்துள்ளன.

சர்வதேச பயங்கரவாத அமைப்பாக ஐ.எஸ்.ஐ.எஸ். கோலோச்சிய காலத்தில் 2014-ம் ஆண்டில் ஐ.எஸ்.ஐ.எஸ்-கோரசன் மாகாணம் அதாவது ஐ.எஸ்.ஐ.எஸ்.-கே உருவானது. ஆப்கானிஸ்தான், பாகிஸ்தான், தஜிகிஸ்தான் மற்றும் இந்தியாவில் உள்ள தீவிரவாதிகளைக் கொண்டதாக இந்த அமைப்பு உருவானது.

இந்த பயங்கரவாத இயக்கத்தில் தாலிபான்களிடம் இருந்து பிரிந்தவர்களும் இணைந்தனர். ஆப்கானிஸ்தானில் தாலிபான்களுக்கு இணையான ஒரு அமைப்பாக ஐ.எஸ்.ஐ.எஸ்.-கே அமைப்பு பார்க்கப்பட்டு வருகிறது. இந்த இயக்கத்தை உருவாக்கியது பாகிஸ்தான் உளவு அமைப்பான ஐ.எஸ்.ஐ. என்பது சர்வதேச நாடுகளின் குற்றச்சாட்டு. ஆனால் பாகிஸ்தான் இதனை திட்டவட்டமாக மறுத்தும் வருகிறது.

ஐ.எஸ்.ஐ.எஸ்.கே விஸ்வரூபம்

கடந்த ஜூன் மாதம் ஹாலோ என்ற இங்கிலாந்து என்.ஜி.ஓ. அமைப்பின் 10 பேரை துப்பாக்கியால் சுட்டுக் கொன்றதும் இந்த அமைப்புதான். ஷியா பிரிவு முஸ்லிம்களின் காபூல் பள்ளிவாசல் மீது தாக்குதல் நடத்தி 100க்கும் மேற்பட்டோரை படுகொலை செய்ததும் இந்த ஐ.எஸ்.ஐ.எஸ்..கே அமைப்புதான். ஆப்கானிஸ்தானின் குனார், நாகன்ஹார் மாகாணங்களில் இந்த அமைப்பு வலிமையாக இருக்கிறது. 2020-ம் ஆண்டு காபூல் குருத்வாரா தாக்குதல், காபூல் மகப்பேறு மருத்துவமனை தாக்குதல், ஜலலாபாத் சிறை மீதான தாக்குதல் என தொடர்ந்து கைவரிசைகளை காட்டி வந்தது ஐ.எஸ்.ஐ.எஸ்-கே.

வலிமை குறைந்தது

இந்த இயக்கம் 2019-ல் முழு வீச்சில் செயல்பட்டு மொத்தம் 300க்கும் மேற்பட்ட தாக்குதல் சம்பவங்களை நடத்தியது. அந்த கால கட்டத்தில் 8,000 பேர் வரை இந்த இயக்கத்தில் இருந்தனர். ஆனால் படிப்படியாக ஐ.எஸ்.ஐ.எஸ்.-கே-வின் வலிமை குறைந்து போனது. 2020-ம் ஆண்டில் 11 தாக்குதல்களைத்தான் ஐ.எஸ்.ஐ.எஸ்.-கே இயக்கத்தால் நடத்த முடிந்தது. கேரளாவைச் சேர்ந்த 30க்கும் மேற்பட்ட இளைஞர்கள் ஐ.எஸ்.ஐ.எஸ்.-கேவில் இருப்பதாக கூறப்பட்டது.

கேரளா இளைஞர்கள்

இந்நிலையில் ஆப்கானிஸ்தான் தாலிபான்கள் கைகளுக்கு வந்தது. அப்போதே ஐ.எஸ்.ஐ.எஸ்-கே அமைப்பு தாலிபான்களுக்கு எதிராக தாக்குதல் நடத்தக் கூடும் என அமெரிக்கா உள்ளிட்ட நாடுகள் எச்சரிக்கை விடுத்திருந்தன. இந்த நிலையில்தான் நேற்று முன்தினம் காபூலில் இரண்டு தற்கொலைப் படை தாக்குதல்களை ஐ.எஸ்.ஐ.எஸ்.-கே நடத்தியது. இதில் சுமார் 200 பேர் வரை கொல்லப்பட்டுள்ளனர். தற்போதைய நிலையில் ஐ.எஸ்.ஐ.எஸ்.-கேவில் கேரளாவை சேர்ந்த 14 இளைஞர்கள் இருப்பதாக கூறப்படுகிறது.

என்.ஐ.ஏ. விசாரணை

கேரளாவின் காசர்கோடு, மலப்புரம், கண்ணூர் மாவட்டங்களைச் சேர்ந்த இளைஞர்கள்தான் இந்த இயக்கத்தில் இணைந்துள்ளனர். இவர்களில் ஒருவர் தமது குடும்பத்தினரை தொடர்பு கொண்டு நான்ஹார் மாகாணத்தில் இருப்பதாக கூறியதாக உளவுத்துறை வட்டாரங்கள் தெரிவித்துள்ளன. கேரளாவை சேர்ந்த இந்த இளைஞர்கள் சிலர் குடும்பத்துடன் நான்ஹார் மாகாணத்திலேயே செட்டிலாகிவிட்டதாகவும் கூறப்படுகிறது. இந்த மாகாணம் பாகிஸ்தான் எல்லையில் அமைந்துள்ளது. இந்த இளைஞர்கள் தொடர்பாக தேசிய புலனாய்வு ஏஜென்சி அதிகாரிகள் விசாரணை நடத்தி வருகின்றனர்.