செம.. இனி டோல்கேட்டில் நிற்கவே வேண்டாம்.. அதுமட்டுமா.. பயணத்தின்போதே சார்ஜ் ஏற்ற எலெக்ட்ரிக் சாலைகள்

டெல்லி: சுங்கச்சாவடிகளில் நீண்ட நேரம் வாகனங்கள் நிற்பதை தவிர்க்க தானியங்கி முறையில் சுங்கக் கட்டணம் வசூலிக்கும் தொழில்நுட்பத்தை அறிமுகம் செய்ய இருப்பதாக மத்திய சாலை போக்குவரத்துத் துறை அமைச்சர் நிதின் கட்கரி தெரிவித்துள்ளார்.

இந்தோ - அமெரிக்க வர்த்தக சபையின் 19 வது பொருளாதார மாநாடு நேற்று நடைபெற்றது. இதனை மத்திய அமைச்சர் நிதின் கட்கரி காணொலி வாயிலாக தொடங்கி வைத்தார்.

இந்த விழாவில் பேசிய நிதின் கட்கரி, இந்தியாவில் சாலை போக்குவரத்தை மேம்படுத்தும் பணிகளில் மத்திய அரசு தீவிரமாக ஈடுபட்டு வருவதாக கூறினார்.

நிதின் கட்கரி பேச்சு

"இந்தியாவில் மேற்கொள்ளப்படும் நெடுஞ்சாலை திட்டங்களில் அமெரிக்க நிறுவனங்கள் முதலீடு செய்திட வேண்டும். சாலை போக்குவரத்தை மின் மயமாக்க விரும்புகிறோம். எனவே எலெக்ட்ரிக் வாகனங்களுக்கு சார்ஜ் செய்ய சாலைகளில் மையங்களை அமைக்க வேண்டும்.

மின்சார நெடுஞ்சாலை

இதற்காக காற்றாலை மற்றும் சூரிய ஒளி மூலம் மின்சாரம் உற்பத்தி செய்யும் எலெக்ட்ரிக் வாகன சார்ஜிங் மையங்கள் அமைக்கும் திட்டங்களுக்கு முன்னுரிமை அளிக்க வேண்டும். மத்திய அரசு நாடு முழுவதும் மின்சார நெடுஞ்சாலைகளை அமைக்கும் பணிகளில் தீவிரமாக ஈடுபட்டு வருகிறது. இதன் மூலம் கனரக வாகனங்கள் ஓடும்போதே சார்ஜ் செய்துகொள்ளலாம்.

சுங்கச்சாவடிகள்

இதேபோல் சுங்கச் சாவடிகளையும் சூரிய ஒளி சக்தியின் மூலம் உற்பத்தி செய்யப்படும் மின்சாரம் மூலமாக இயக்குவதை அரசு ஊக்குவிக்கிறது. நாட்டின் சாலை போக்குவரத்தை மேம்படுத்த அரசு தீவிர முயற்சி செய்து வருகிறது. சுங்கச்சாவடிகளில் போக்குவரத்து நெரிசலை குறைப்பதற்காக முயற்சிகளை மேற்கொண்டு வருகிறோம்.

தானியங்கி முறை

சுங்கச்சாவடிகளில் வாகனங்கள் நின்று செல்வதை தவிர்க்க வாகனங்கள் நம்பர் பிளேட்டை ஸ்கேன் செய்ய அதிநவீன கேரமாக்கள் பொறுத்தப்படும். அந்த தொழில்நுட்பத்தின் மூலமாக தானியங்கி முறையில் சுங்க கட்டணம் வசூலிக்கப்படும். இதன் மூலமாக ஃபாஸ்ட் டேக் முறையின் தேவை இருக்காது.

போக்குவரத்து நெரிசல்

சுங்கச்சாவடிகளில் மட்டும் சராசரியாக 8 நிமிடங்கள் காத்திருக்கும் நிலை ஏற்படுகிறது. ஃபாஸ்ட் டேக் வந்தபிறகு இது 47 வினாடிகளாக குறைந்தது. இதை மேலும் குறைப்பதற்காக புதிய தொழில்நுட்பத்தை மத்திய அரசு அறிமுகம் செய்கிறது. இந்த திட்டம் சாதகமானால் காத்திருப்பு நேரம் குறைவது மட்டுமல்லாமல் போக்குவடத்து நெரிசலும் குறையும்." என்றார்.

English summary

டெல்லி: சுங்கச்சாவடிகளில் நீண்ட நேரம் வாகனங்கள் நிற்பதை தவிர்க்க தானியங்கி முறையில் சுங்கக் கட்டணம் வசூலிக்கும் தொழில்நுட்பத்தை அறிமுகம் செய்ய இருப்பதாக மத்திய சாலை போக்குவரத்துத் துறை அமைச்சர் நிதின் கட்கரி தெரிவித்துள்ளார்.இந்தோ - அமெரிக்க வர்த்த சபையின் 19 வது பொருளாதார மாநாடு நேற்று நடைபெற்றது. இதனை மத்திய அமைச்சர் நிதின் கட்கரி காணொலி வாயிலாக தொடங்கி வைத்தார்.இந்த விழாவில் பேசிய நிதின் கட்கரி, இந்தியாவில் சாலை போக்குவரத்தை மேம்படுத்தும் பணிகளில் மத்திய அரசு தீவிரமாக ஈடுபட்டு வருவதாக கூறினார்.