என் மகள் நாட்டுக்கு பதக்கங்கள் பெற்று தந்தார்.. நீங்க என்ன செய்தீங்க சித்தார்த்? சாய்னா தந்தை கேள்வி

Updated: Tuesday, January 11, 2022, 16:30 [IST]

Subscribe to Oneindia Tamil

டெல்லி: என் மகள் இந்தியாவுக்காக விளையாடி பல பதக்கங்களை பெற்றுள்ளார். நடிகர் சித்தார்த் இதுவரை நாட்டுக்காக செய்த சாதனை என்ன என சாய்னா நேவாலின் தந்தை கண்ணீர் மல்க கேள்வி எழுப்பியுள்ளார்.

பாட்மிண்டன் வீராங்கனை சாய்நா நேவால், பிரதமர் நரேந்திர மோடிக்கு பஞ்சாபில் ஏற்பட்ட பாதுகாப்பு குளறுபடி குறித்து கண்டனம் தெரிவித்ததுடன் இதை செய்தவர்கள் கோழைகள் என்றும் விமர்சித்திருந்தார்.

பிரதமர் நரேந்திர மோடி என்பவர் கட்சி, விருப்பு வெறுப்புகளுக்கு அப்பாற்பட்டு அவர் நாட்டின் பிரதமர், அவருக்குரிய மதிப்பையும் மரியாதையையும் பாதுகாப்பையும் எப்போதும் சீர்குலைக்க கூடாது என்பதுதான் பலரின் கருத்தாக உள்ளது. அதைத்தான் சாய்னாவும் வெளிப்படுத்தியிருந்தார்.

நடிகர் சித்தார்த்

இவரது ட்வீட்டை ரீட்வீட் செய்த நடிகர் சித்தார்த், சாய்னாவை ஆபாசமான வார்த்தைகளை கொண்டு கடுமையாக விமர்சித்திருந்தார். அவர் ஒரு பெண், இந்தியாவுக்கு தனக்கு விளையாட்டால் புகழையும் பெயரையும் பெற்று தந்தவர், என்ற எதையும் யோசிக்காமல் சாய்னாவை மிகவும் ஆபாசமாக ஒப்பிட்டிருந்தது அறுவறுப்பாக்கியது.

சித்தார்த் விளக்கம்

இதையடுத்து தேசிய மகளிர் ஆணையம் தானாக வந்து புகார் அளித்தது. இதனால் சுதாரித்து கொண்ட சித்தார்த், தான் எந்த வித இரட்டை அர்த்தத்திலும் கூறவில்லை. தனது கருத்து தவறாக புரிந்து கொள்ளப்பட்டுவிட்டது என்றார். ஆனாலும் அவரது கருத்தில் அத்தனை ஆபாசம், அவதூறு, பெண் மீதான தவறான கண்ணோட்டம் உள்ளிட்டவைகளால் சித்தார்த்திற்கு எதிரான விமர்சனங்களும் கண்டனங்களும் எழுந்தன.

சித்தார்த்தின் பங்களிப்பு என்ன

இந்த நிலையில் டைம்ஸ் நவ் நிறுவனத்திற்கு சாய்னாவின் தந்தை ஹர்வீர் சிங் பேட்டி அளித்திருந்தார். அதில் அவர் கூறுகையில் எனது மகள் பாட்மிண்டன் விளையாடி நாட்டுக்கு பல பதக்கங்களையும் விருதுகளையும் குவித்து சாதனை புரிந்தவர். இந்த நாட்டிற்கு நடிகர் சித்தார்த்தின் பங்களிப்பு என்ன? சினிமா படத்தில் நடிப்பதை தவிர அவர் வேறு என்ன செய்தார்?

கண்ணீர் விட்ட சாய்னாவின் தந்தை

என் மகள் மீது சித்தார்த் அப்படி பயன்படுத்திய வார்த்தைகள் மிகவும் மோசமானவை. இந்தியா ஒரு சிறந்த சமூகம். சாய்னாவுக்கு பத்திரிகையாளர்கள், விளையாட்டு வீரர்களின் ஆதரவு உள்ளது என்பதை நம்புகிறேன். ஏனென்றால் ஒரு விளையாட்டு வீரர் படும் கஷ்டங்கள் அனைத்தையும் அவர்கள் அறிவர் என கண்ணீர் மல்க தெரிவித்தார்.

சாய்னாவின் கணவர் கண்டனம்

அது போல் சாய்னாவின் கணவர் பருப்பள்ளி காஷ்யப்பும் நடிகர் சித்தார்த்திற்கு கண்டனம் தெரிவித்துள்ளார். இதுகுறித்து காஷ்யப் கூறுகையில் நடிகர் சித்தார்த்தின் ட்வீட் அவமானகரமானதாக உள்ளது. எங்களுக்கு மனஉளைச்சலை ஏற்படுத்தியுள்ளது. உங்கள் கருத்துகளை சிறந்த நாகரீகமான வார்த்தைகளை கொண்டு வெளிப்படுத்தியிருக்கலாம். இந்த மாதிரியான மோசமான கருத்துகளை வெளிப்படுத்துவதுதான் நல்லது என நீங்கள் நினைப்பதாக நான் கருதுகிறேன். இதெல்லாம் நல்லதல்ல என கண்டனம் தெரிவித்துள்ளார்.