ஸ்டெர்லைட் வேதாந்தா குழும தலைவரின் மூத்த மகன் அக்னிவேஷ் அகர்வால் உயிரிழப்பு! உருக்கமான பதிவு

Updated: Thursday, January 8, 2026, 11:38 [IST]

Subscribe to Oneindia Tamil

டெல்லி: வேதாந்தா குழுமத் தலைவர் அனில் அகர்வால் மகன் அக்னிவேஷ் காலமானார். இந்தியா மட்டுமின்றி பல நாடுகளிலும் தொழில் நிறுவனங்களை நடத்தி வருகிறது வேதாந்தா குழுமம். தமிழ்நாட்டின் தூத்துக்குடியில் இயங்கி வந்த ஸ்டெர்லைட் ஆலையை நடத்தி வந்தது வேதாந்தா நிறுவனம்.

இந்நிலையில், வேதாந்தா குழுமத் தலைவர் அனில் அகர்வாலின் மகன் அக்னிவேஷ் அகர்வால், அமெரிக்காவில் காலமானதாக அறிவிக்கப்பட்டுள்ளது. அவருக்கு வயது 49. வேதாந்தா குழும நிறுவனமான தல்வண்டி சபோ பவர் லிமிடெட் (TSPL) இன் இயக்குநர்கள் குழுவில் அக்னிவேஷ் அகர்வால் உறுப்பினராக இருந்தார்.

அக்னிவேஷ் அமெரிக்காவில் பனிச்சறுக்கு விளையாட்டின் போது, விபத்தில் சிக்கி நியூயார்க்கில் உள்ள மவுண்ட் சினாய் மருத்துவமனையில் தீவிர சிகிச்சை பெற்று வந்தார். அவரது உடல்நிலையில் நல்ல முன்னேற்றம் இருந்த நிலையில், எதிர்பாராத விதமாக மாரடைப்பு ஏற்பட்டு அக்னிவேஷ் உயிரிழந்ததாக தெரிவிக்கப்பட்டுள்ளது.

தனது மகனின் இறப்பை தொடர்ந்து, இது தனது வாழ்நாளின் மிகவும் இருண்ட நாள் என வேதாந்தா குழுமத் தலைவர் அனில் அகர்வால் உருக்கமாகக் குறிப்பிட்டுள்ளார். அவர் வெளியிட்டுள்ள பதிவில், "என் அன்பு மகன் அக்னிவேஷ் மிக விரைவில் நம்மை விட்டுப் பிரிந்து சென்றுவிட்டான். 49 வயதுதான், முழுமையான ஆரோக்கியம், வாழ்க்கை மற்றும் கனவுகள் நிறைந்தது. மோசமான காலம் முடிந்துவிட்டது என்று நாங்கள் நினைத்தோம், ஆனால் விதி வேறு திட்டங்களை வைத்திருந்தது, திடீர் மாரடைப்பு எங்கள் மகனை எங்களிடமிருந்து பறித்துவிட்டது.

பெற்றோருக்கு தங்கள் சொந்தக் குழந்தையின் மரணத்தால் ஏற்படும் வலியை வார்த்தைகளால் விவரிக்க முடியாது. ஒரு மகன் ஒரு தந்தைக்கு முன்னால் உலகை விட்டுச் செல்லக்கூடாது. இந்த இழப்பு எங்களை இன்னும் ஏற்றுக்கொள்ள முடியாத அளவுக்கு உடைத்துவிட்டது.

ஜூன் 3, 1976 அன்று பாட்னாவில் அக்னிவேஷ் பிறந்த நாள் எனக்கு இன்னும் நினைவிருக்கிறது. ஒரு நடுத்தர வர்க்க பீகாரி குடும்பத்தில் இருந்து, அவர் வலிமை, இரக்கம் மற்றும் இலக்கு கொண்ட மனிதராக வளர்ந்தார். அவரது தாயின் வாழ்க்கையின் ஒளி, ஒரு பாதுகாப்பான சகோதரர், ஒரு உண்மையான நண்பர் மற்றும் அவர் சந்தித்த அனைவரையும் தொட்ட ஒரு மென்மையான ஆன்மா.

அக்னிவேஷ் பல விஷயங்களைக் கொண்டிருந்தார். விளையாட்டு வீரர், இசைக்கலைஞர். அவர் அஜ்மீரில் உள்ள மாயோ கல்லூரியில் படித்தார், சிறந்த நிறுவனங்களில் ஒன்றான ஃபுஜைரா கோல்டை நிறுவினார், இந்துஸ்தான் ஜிங்க் நிறுவனத்தின் தலைவர் ஆனார், சக ஊழியர்கள் மற்றும் நண்பர்களின் மரியாதையைப் பெற்றார். அனைத்து பட்டங்கள் மற்றும் சாதனைகளுக்கு அப்பால், அவர் எளிமையாகவும், அன்பாகவும், மனிதாபிமானத்துடனும் இருந்தார். எனக்கு, அவர் என் மகன் மட்டுமல்ல. அவர் என் நண்பர். என் பெருமை. என் உலகம்.

எந்தக் குழந்தையும் பசியுடன் உறங்கக் கூடாது, எந்தக் குழந்தைக்கும் கல்வி மறுக்கப்படக் கூடாது, ஒவ்வொரு பெண்ணும் தன் சொந்தக் காலில் நிற்க வேண்டும், ஒவ்வொரு இந்திய இளைஞனுக்கும் உரிய வேலை கிடைக்க வேண்டும் என்ற கனவை நாங்கள் பகிர்ந்து கொண்டோம். நாங்கள் சம்பாதிப்பதில் 75 சதவீதத்துக்கும் அதிகமானதை சமூகத்திற்குத் திருப்பித் தருவதாக அக்னியிடம் நான் உறுதியளித்திருந்தேன். இன்று, அந்த வாக்குறுதியை நான் புதுப்பித்து, இன்னும் எளிமையான வாழ்க்கையை வாழத் தீர்மானிக்கிறேன்" என அனில் அகர்வால் உருக்கமாகத் தெரிவித்துள்ளார்.