அம்புட்டு அவசரம்.. அதான் காலேஜ் பஸ்ஸையே எடுத்துட்டு போயி.. சோனமுத்தா இதெல்லாம் ரொம்ப ஓவரு?

ஈரோடு: தனியார் கல்லூரி டிரைவராக வேலை பார்த்து வந்த நிர்மல்குமார் செய்த காரியத்தால் அவர் வேலை செய்த கல்லூரி மட்டுமல்ல, அவர்களின் அப்பா, அம்மாவே பெரும் அதிர்ச்சி அடைந்துள்ளனர். இப்போது சிறையில் கம்பி எண்ணி வருகிறார். அப்படி என்ன செய்தார் என்பதை இப்போது பார்ப்போம்.

ஈரோடு மாவட்டம் புஞ்சைபுளியம்பட்டி சுல்தான் ரோட்டை சேர்ந்த நிர்மல் குமார் என்பவர் அங்குள்ள ஒரு தனியார் கல்லூரியின் பஸ் டிரைவராக வேலை செய்து வருகிறார்.

பக்ரீத் பண்டியான நேற்று கல்லூரி விடுமுறை என்பதால் அந்த கல்லூரி பஸ்சை நிர்மல்குமார் மற்றும் இவரது சகோதரர் நிதிஷ் ஆகிய இருவரும் எடுத்து சென்றனர். இதையடுத்து அவர்கள் மது குடித்து விட்டு வந்திருக்கிறார்கள்.

அப்போது நிர்மல்குமார் முழுயைமாக மது போதையில் இருந்ததால் அவரால் வாகனத்தை ஓட்ட முடியவில்லை. இதையடுத்து அவருடைய சகோதரர் நிதிஷ் பஸ்சை ஓட்டி வந்தார். தொடர்ந்து புளியம்பட்டி அடுத்த நல்லூர் பாலம் அருகே கல்லூரி பஸ் வந்து கொண்டு இருந்தது.

அப்போது நிலை தடுமாறி எதிர்பாராத விதமாக பஸ் ரோட்டை விட்டு கீழே இறங்கி பள்ளத்துக்குள் இழுத்துச் சென்று சிறிது தூரம் சென்று நின்றது.
அப்போது கல்லூரி பஸ்சில் யாரும் இல்லாததால் எந்த ஒரு பாதிப்பும் இல்லை. இதில் கல்லூரி பஸ்சின் முன்பகுதி சேதம் அடைந்தது.

இதையடுத்து அவர்கள் பஸ்சை அங்கேயே விட்டு விட்டு ஓடி விட்டனர். இதை தொடர்ந்து அவர்கள் வீட்டிற்கு சென்றனர். பஸ்ஸை எடுத்து சென்ற விஷயம் தெரிந்து அம்மா கேட்டதால், வீட்டில் நிர்மல் குமார் தனது அம்மாவுடன் தகராறு செய்தார். இதில் அவர்களுக்கு இடையே வாக்குவாதம் ஏற்பட்டது.

இதையடுத்து நிர்மல்குமார் அவருடைய தாய் மற்றும் தந்தை இருவரையும் தகாத வார்த்தை பேசி தாக்கி உள்ளார். அசிங்கமான வார்த்தைகள் பேசி அவர் தாய்-தந்தைக்கு கொலை மிரட்டல் விடுத்துள்ளார்.

இது குறித்து அவரது தந்தை செல்வராஜ் புளியம்பட்டி போலீஸ் நிலையத்தில் மகன் மீதே புகார் கொடுத்தார். அதன் பேரில் போலீசார் வழக்கு பதிவு செய்து விசாரணை நடத்தி நிர்மல்குமாரை கைது செய்தார்கள். இதையடுத்து அவரை நீதிமன்றத்தில் ஆஜர்படுத்தி சிறையில் அடைத்தனர்.
மது குடிக்க கல்லூரி பஸ்சை ஓட்டி சென்ற டிரைவர் விபத்தில் சிக்கியதுடன் தற்போது சிறையில் கம்பி எண்ணி வருவது பரபரப்பை ஏற்படுத்தி உள்ளது.

English summary

A driver who was driving a college bus to drink alcohol in Erode Punchaipuliambatti met with an accident and is currently in jail.