ஈரோட்டில் நேற்று வரை திருவிழாக் கோலம்! இன்று ஆள் அரவமின்றி வெறிச்சோடிய சாலைகள்! களையிழந்த வீதிகள்!

இடைத்தேர்தல் திருவிழா முடிந்ததால் வெறிச்சோடிய ஈரோடு

Updated: Sunday, February 26, 2023, 15:46 [IST]

Subscribe to Oneindia Tamil

ஈரோடு: ஈரோட்டில் நேற்று வரை திரும்பிய பக்கமெல்லாம் திருவிழாக் கோலத்தில் காணப்பட்ட சாலைகளும், வீதிகளும் இன்று ஆள் அரவமின்றி வெறிச்சோடிக் காணப்படுகின்றன.

கடந்த ஒரு மாதமாக வாடகை வீடுகள் அனைத்தும் ஹவுஸ்ஃபுல்லாக காட்சியளித்த நிலையில் இன்று மீண்டும் டூலெட் போர்டுகள் தொங்க விடப்பட்டுள்ளன.

போடுங்கம்மா ஓட்டு என்ற முழக்கத்துடன் பெரிய கூட்டமாக சுற்றி வந்த அரசியல் கட்சியினர் நேற்று மாலையே ஈரோட்டை காலி செய்து புறப்பட்டுவிட்டதால் வீதிகள் தோறும் களையிழந்து காணப்படுகின்றன.

ஈரோடு இடைத்தேர்தல்

ஈரோடு கிழக்குத் தொகுதி இடைத்தேர்தல் திருவிழா இறுதிக்கட்டத்தை எட்டியுள்ளது. நாளை வாக்குப்பதிவு நாள் என்பதால் வெளிமாவட்டங்களை சேர்ந்த அரசியல் கட்சி நிர்வாகிகள் நேற்று மாலையே அவரவர் சொந்த ஊர்களுக்கு புறப்பட்டு விட்டனர். இதனால் கடும் போக்குவரத்து நெரிசலுடனும், எந்நேரம் பார்த்தாலும் ஜெஜெவென கூட்டத்துடனும் காணப்பட்ட ஈரோடு கிழக்குத் தொகுதி இன்று வெறிச்சோடிக் காணப்படுகிறது.

மீண்டும் வேலைக்கு

காலை மாலை என நாளொன்றுக்கு இரண்டு முறை வீடு தேடி வந்த அரசியல் கட்சியினராலும் அவர்கள் கொடுத்த பரிசுப் பொருட்களாலும் ஈரோடு கிழக்குத் தொகுதி மக்கள் உற்சாகமுடன் காணப்பட்டனர். பலரும் வேலைக்கு கூட செல்லாமல் பிரச்சாரத்தில் பங்கேற்று அதன் மூலம் வருமானம் ஈட்டி வந்தனர். இப்போது ஆட்டம் காலி படுதா காலி என்பதால் மீண்டும் இன்று முதல் வேலைக்கு செல்லத் தொடங்கியுள்ளனர்.

பிரியாணி விருந்து

திமுகவும், அதிமுகவும் போட்டி போட்டுக் கொண்டு கட்சி நிர்வாகிகளுக்கும், பொதுமக்களுக்கும் பிரியாணி விருந்து வைத்தது. இதில் யார் வேண்டுமானால் பங்கேற்று சாப்பிடலாம் என்ற நிலை இருந்ததால் எல்லோரும் ஒரு பிடி பிடித்தார்கள். மொத்தத்தில் ஈரோடு கிழக்குத் தொகுதி மக்களை அரசியல் கட்சி நிர்வாகிகள் தங்கத் தட்டில் வைத்து தாலாட்டினார்கள் என்று கூறலாம்.

வியாபாரம் மந்தம்

கடந்த ஒரு மாத காலமாக ஈரோடு கிழக்குத் தொகுதிக்குட்பட்ட கடைகளிலும், உணவு விடுதிகளிலும், தேநீர் கடைகளிலும் வியாபாரம் சக்கை போடு போட்டது. ஆனால் நேற்றிரவு முதலே வியபாரம் மந்த நிலையை அடைந்துவிட்டது. இதனால் வியாபாரிகள் தரப்பினரும் களையிழந்து காணப்படுகின்றனர்.