BMW கார், ஆடம்பர வாழ்க்கைக்கு ஆசை! விசாகப்பட்டினத்தில் 26 தொடர் கொள்ளையில் ஐடி ஊழியர் கைது

விசாகப்பட்டினம்: ஆந்திராவில் ஆடம்பர வாழ்க்கைக்கு ஆசைப்பட்டு தொடர் கொள்ளைகளில் ஈடுபட்டதாகக் 27 வயது ஐ.டி. ஊழியர் அச்சி மகேஷ் ரெட்டி (சன்னி) ஞாயிற்றுக்கிழமை கைது செய்யப்பட்டார். தொடர் இரவு நேர திருட்டுப் புகார்களை அடுத்து, பல மாதக் கண்காணிப்புக்குப் பின் போலீஸார் இவரை சுற்றி வளைத்தனர்.

முதுகலை பட்டதாரியான சன்னி, ஹைதராபாத்தின் புகழ்பெற்ற ஐ.டி. நிறுவனத்தில் பணிபுரிந்தவர். காக்கிநாடாவைச் சேர்ந்த இவர் விசாகப்பட்டினத்தில் வசித்தார். வேலை மற்றும் கல்வி இருந்தும், ஆடம்பர BMW கார், வெளிநாட்டுப் பயணங்கள் போன்ற விலையுயர்ந்த வாழ்க்கை முறைக்காகவே இந்தத் திருட்டுகளில் ஈடுபட்டதாக போலீசார் தெரிவித்தனர்.

சன்னியின் கைதுக்குப் பின், விசாகப்பட்டினம் காவல்துறை காஜுவாகா, அரிலோவா, மல்காபுரம், பெண்டுர்தி, துவ்வாடா உள்ளிட்ட நகரப் பகுதிகளில் நடந்த 26 கொள்ளை வழக்குகளைத் தீர்த்தது. இவ்வழக்குகளில் சுமார் ரூ.24.66 லட்சம் மதிப்புள்ள நகைகள் (1084 கிராமுக்கு மேல் தங்கம், 6300 கிராமுக்கு மேல் வெள்ளி) மற்றும் ரூ.40,500 ரொக்கம் திருடப்பட்டிருந்தன.

சன்னியிடமிருந்து போலீசார் சுமார் 699 கிராம் தங்க நகைகள், 3.8 கிலோ வெள்ளி நகைகள், திருட்டுப் பணத்தில் வாங்கப்பட்ட ஆடம்பர BMW கார், எண்ணற்ற ஸ்கூட்டர், கொள்ளையடிக்கும் கருவிகளை மீட்டனர். மீட்டெடுக்கப்பட்ட அனைத்து உடைமைகளின் மொத்த மதிப்பு ரூ.15.63 லட்சத்துக்கும் மேல் இருக்கும் என மதிப்பிடப்பட்டுள்ளது.

விசாகப்பட்டினம் காவல் ஆணையர் ஷங்கா பிரதா பக்ஷியின் கூற்றுப்படி, சன்னிக்கு 15 வயதிலிருந்தே திருடும் பழக்கம் உண்டு. PM பாலம் பகுதியில் பிடிபட்டு சீர்திருத்தப் பள்ளிக்குச் சென்றவர், விடுதலையான பிறகும் காகினடா, ராஜமுந்திரி உள்பட பல பகுதிகளில் திருட்டுகளைத் தொடர்ந்தார்.

பின்னர் ராஜமுந்திரி மத்திய சிறையில் 14 மாதங்கள் தண்டனை அனுபவித்தார். காவல்துறைப் பதிவுகளின்படி, மாநிலம் முழுவதும் 60க்கும் மேற்பட்ட கொள்ளை வழக்குகளில் சன்னி சம்பந்தப்பட்டுள்ளார். வீடுகளை உடைக்க அவர் முகமூடிகள், தொப்பிகள், கையுறைகள், சுத்தியல்கள், ஸ்க்ரூ டிரைவர்கள், துளையிடும் இயந்திரங்கள் போன்ற கருவிகளைப் பயன்படுத்தியுள்ளார்.

சம்மந்தப்பட்ட அனைத்து வழக்குகளிலும் சன்னி மீது வழக்குப் பதிவு செய்யப்பட்டுள்ளது. தற்போது நடைபெற்று வரும் விசாரணையைத் தொடர்ந்து, அவர் மீதான குற்றப்பத்திரிகையைத் தயாரிக்க காவல்துறை ஆயத்தமாகி வருகிறது.

English summary

A 27-year-old IT employee, Achhi Mahesh Reddy alias Sunny, was arrested in Andhra Pradesh on Sunday for allegedly committing a series of night-time thefts driven by a desire for a lavish lifestyle. Following multiple complaints of serial burglaries, police tracked and arrested him after several months of surveillance, bringing an end to the theft spree.