டெல்லி அருகே கட்டடம் இடிந்து விபத்தில் 3 பேர் பலி... இடிபாடுகளில் பலர் சிக்கியிருக்கலாம் என அச்சம்

டெல்லி அருகே கட்டடம் சரிந்து விழுந்த விபத்தில் 3 பேர் பலியாகிவிட்டனர்.

டெல்லி: டெல்லியில் உள்ள கிரேட்டர் நொய்டா பகுதியில் கட்டடம் சரிந்த விபத்தில் 3 பேர் பலியாகிவிட்டனர். இடிபாடுகளில் மேலும் பலர் சிக்கியிருக்கலாம் என அஞ்சப்படுகிறது.

கிரேட்டர் நொய்டாவில் ஷா பெரி கிராமத்தில் 4 மாடி குடியிருப்பு கட்டடம் உள்ளது. இங்கு 18 குடும்பத்தினர் வசிக்கின்றனர். இதன் பக்கத்தில் 6 மாடிகள் கொண்ட கட்டடம் ஒன்று கட்டப்பட்டு வருகிறது. இந்நிலையில் இந்த 6 மாடி கட்டடம் திடீரென 4 மாடி கட்டடத்தின் மீது விழுந்தது.

இதையடுத்து தகவலறிந்த தேசிய பேரிடர் மீட்பு குழுவினர் சம்பவ இடத்துக்கு விரைந்து வந்து மீட்பு பணிகளை துரிதப்படுத்தினர். இடிபாடுகளில் இருந்து 3 பேரின் உடல்கள் மீட்கப்பட்டன.

குடியிருப்பு கட்டடத்தில் இருந்த மேலும் சிலர் இடிபாடுகளில் சிக்கியிருக்கலாம் என அஞ்சப்படுகிறது. மேலும் 6 மாடி கட்டடம் கட்டும் பணியில் 12 தொழிலாளர்கள் ஈடுபட்டிருந்ததால் அவர்களின் நிலையும் கேள்விக்குறியாக உள்ளது.

எனவே பலி எண்ணிக்கை மேலும் உயரும் என்று அஞ்சப்படுகிறது. இந்த விபத்துக்கான காரணம் தெரியவில்லை. எனினும் கட்டடம் கட்டும் நிறுவன உரிமையாளர் உள்பட 3 பேரை போலீஸார் கைது செய்தனர்.

இடிபாடுகளில் யாரேனும் உயிரோடு இருந்தால் அவர்களுக்கு சிகிச்சை அளிக்க ஏதுவாக 12 ஆம்புலன்ஸ் வாகனங்கள் தயார் நிலையில் உள்ளன. இது குறித்து போலீஸார் மேலும் விசாரணை நடத்தி வருகின்றனர்.

English summary

3 bodies have been retrieved after two buildings collapsed in Greater Noida near Delhi on Tuesday night. Many are feared trapped under the debris.