"நடிகை ஸ்ரீரெட்டி மீது பாய்ந்த வழக்கு".. சந்திரபாபு நாயுடு - பவன் கல்யாண் பற்றிய அவதூறால் சர்ச்சை

Published: Sunday, July 21, 2024, 15:46 [IST]

Subscribe to Oneindia Tamil

அமராவதி: ஆந்திர முதல்வர் சந்திரபாபு நாயுடு, துணை முதல்வர் பவன் கல்யாண் மற்றும் சந்திரபாபு நாயுடுவின் மகனும், அமைச்சருமான நாரா லோகேஷ் உள்ளிட்டவர்கள் பற்றி நடிகை ஸ்ரீரெட்டி கூறிய கருத்து பெரும் சர்ச்சையை ஏற்படுத்தி உள்ளது. இந்நிலையில் தான் ஸ்ரீரெட்டி மீது ஆந்திர போலீசார் அதிரடியாக வழக்குப்பதிவு செய்துள்ளனர்.

ஆந்திராவில் நடந்த முடிந்த சட்டசபை தேர்தலில் முன்னாள் முதல்வர் ஜெகன்மோகன் ரெட்டியின் ஒய்எஸ்ஆர் காங்கிரஸ் கட்சி ஆட்சியை இழந்தது. இந்த தேர்தலில் சந்திரபாபு நாயுடு தலைமையிலான தெலுங்கு தேசம், நடிகர் பவன் கல்யாணின் ஜனசேனா மற்றும் பாஜக கூட்டணி அமோக வெற்றி பெற்றது.

இதையடுத்து ஆந்திராவின் புதிய முதல்வராக சந்திரபாபு நாயுடு பதவியேற்றார். துணை முதல்வராக பவன் கல்யாண் பதவியேற்று செயல்பட்டு வருகிறார். சந்திரபாபு நாயுடுவின் அமைச்சரவையில் அவரது மகன் நாரா லோகேஷ் இடம்பெற்றுள்ளார். இவர் ஐடி மற்றும் தகவல் தொழில்நுட்பத்துறை, தொழில்துறை அமைச்சராக உள்ளார்.

இந்நிலையில் தான் முதல்வர் சந்திரபாபு நாயுடு, துணை முதல்வர் பவன் கல்யாண், அமைச்சர்கள் நாரா லோகேஷ், உள்துறை அமைச்சர் அனிதா ஆகியோர் குறித்து சர்ச்சைக்கு பெயர் பெற்ற நடிகையும், பிரபல யூடியூபருமான ஸ்ரீரெட்டி கூறிய கருத்து விவாதத்தை கிளப்பி உள்ளது. நடிகை ஸ்ரீரெட்டி யூடியூப் சேனல்களுக்கு அவ்வப்போது பேட்டியளிக்கும்போது சொல்லும் கருத்துகள் சர்ச்சையை கிளப்பும்.

அந்த வகையில் நடிகை ஸ்ரீரெட்டி தற்போது சந்திரபாபு நாயுடு, பவன் கல்யாண், நாரா லோகேஷ், அமைச்சர் அனிதா பற்றி சமூக வலைதளங்களில் தெரிவித்த கருத்து பெரும் சர்ச்சையை ஏற்படுத்தி உள்ளது. இதையடுத்து நடிகை ஸ்ரீரெட்டி மீது நடவடிக்கை எடுக்க வேண்டும் என்று தெலுங்கு தேசம் கட்சியின் பிற்படுத்தப்பட்ட பிரிவின் நிர்வாகி ராஜூ யாதவ் சார்பில் கர்னூல் III போலீஸ் நிலையத்தில் புகார் அளிக்கப்பட்டது.

அந்த புகாரை தொடர்ந்து நடிகை ஸ்ரீரெட்டி மீது பல்வேறு பிரிவுகளில் போலீசார் வழக்குப்பதிவு செய்துள்ளனர். தொடர்ந்து விசாரணை நடத்தப்பட்டு வருகிறது. நடிகை ஸ்ரீரெட்டி இப்படி சர்ச்சையில் சிக்குவது இது முதல் முறையல்ல. இதற்கு முன்பு நடிகை விஷால் பற்றி அவர் பேட்டி ஒன்றில் கூறிய கருத்து என்பது பெரும் சர்ச்சையை கிளப்பியது என்பது குறிப்பிடத்தக்கது.

Published On July 21, 2024