துணை கமிஷனர் பிரஸ் மீட்டில் டிஸ்கோ டான்ஸ்.. சர்ச்சையில் ஹைதராபாத் போலீஸ்

ஹைதராபாத்: மோசடி வழக்கில் கைது செய்யப்பட்ட நபரை சினிமா பாடலுக்கு டிஸ்கோ டான்ஸ் ஆட வைத்து எம்எல்ஏவும், போலீஸ் துணை கமிஷனரும் ரசித்த விவகாரம் வீடியோவாக வெளியாகி சர்ச்சையை ஏற்படுத்தியுள்ளது ஹைதராபாத்தில்.

ஹைதராபாத் தெற்கு மண்டல போலீசார், மோசடி வழக்கு ஒன்றில், டிஸ்கோ பாபா என்பவரை கைது செய்து அதுகுறித்து பிரஸ் மீட் வைத்திருந்தனர். அந்த நேரம் பார்த்து எம்எல்ஏ அகமது பாஷா குவாட்ரி டிசிபி ஆபீசுக்கு சென்றுள்ளார். அவரும் டிசிபி சத்யநாராயணா உடன் அமர்ந்து மீடியாக்கள் கேள்விகளை எதிர்கொண்டார்.

அப்போது நிருபர்களில் ஒருவர், குற்றம்சாட்டப்பட்டுள்ள டிஸ்கோ பாபா ஆடை ஏன் ஜிகினா போல மின்னுகிறது என்று கேட்டார். அதற்கு டிஸ்கோ பாபா ஒரு மேடை நாட்டிக்காரர் என டிசிபி பதிலளித்தார்.

இதன்பிறகு டிஸ்கோ பாபாவை அங்கே ஆடவும் கூறியுள்ளனர். "ஐயம் ஏ, டிஸ்கோ டான்சர்.." என்ற பாடலை ஒலிக்கவிட்டு பார்த்து ரசித்துள்ளனர், டிசிபியும், எம்எல்ஏவும். இந்த வீடியோ வைரலானதால் இப்போது சர்ச்சை வெடித்துள்ளது.

ஆனால், நிருபர்கள்தான் ஆடச் சொல்லி கேட்டதாகவும் காவல்துறை மீது தப்பில்லை எனவும் டிசிபி சத்யநாராயணா கூறியுள்ளார்.

English summary

A video showing an arrested man dancing in front of Hyderabad cops went viral.