வாரே வாவ்.. லண்டன் ரயில் நிலையத்தில் வங்க மொழியில் பெயர் பலகை.. மம்தா ஹேப்பி

கொல்கத்தா: உலகின் பழம்பெருமை வாய்ந்த லண்டன் வொயிட்சேப்பல் ரயில் நிலையத்தில் ஆங்கிலத்துடன் வங்காள மொழியில் பெயர் பலகை வைக்கப்பட்டுள்ளதற்கு மேற்கு வங்க முதலமைச்சர் மம்தா பானர்ஜி மகிழ்ச்சி தெரிவித்து இருக்கிறார்.

பிரிட்டன் தலைநகர் லண்டனில் 1876 ஆம் ஆண்டு வொயிட்சேப்பல் ரயில்நிலையம் வொயிட்சேப்பல் சாலையில் உள்ள டர்வார்ட் வீதியில் அமைக்கப்பட்டது.

இந்த ரயில் நிலையத்தில் வங்காள மொழியில் பெயர் பலகை வைக்க வேண்டும் என வங்காள மொழி ஆர்வலர்கள் வலியுறுத்தி வந்து உள்ளனர்.

லண்டன் ரயில்நிலையத்தில் வங்காள மொழி

இந்த நிலையில், அந்த கோரிக்கையை ஏற்ற லண்டன் டியூப் ரயில் நிர்வாகம் ஆங்கிலத்துடன் சேர்த்து முகப்பில் வங்காள மொழி பெயர் பலகையை வைத்து இருக்கிறது. இதுகுறித்து ட்விட்டரில் பதிவிட்டுள்ள மேற்கு வங்க முதலமைச்சர் மம்தா பானர்ஜி, "வொயிட்சேப்பல் ரயில்நிலையத்தில் வங்காள மொழியில் பெயர் பலகை வைக்க லண்டன் டியூப் ரயில் நிர்வாகம் ஒப்புக்கொண்டு இருப்பது பெருமை அளிக்கிறது.

வங்காள கலாச்சாரத்தின் வெற்றி

ஆயிரம் ஆண்டுகள் பழமை வாய்ந்த மொழியான வங்காளம் சர்வதேச அளவில் பெற்று இருக்கும் முக்கியத்துவத்தையும் அதன் வலிமையையும் இது குறிக்கிறது. புலம்பெயர்ந்த வங்காளிகள் கலாச்சார திசைகளில் ஒன்றாக செயல்பட வேண்டும் என்பதையும் இது கோடிட்டுக் காட்டி உள்ளது. இது நமது கலாச்சாரம் மற்றும் பாரம்பரியத்தின் வெற்றியாகும்." எனக் குறிப்பிட்டு இருக்கிறார்.

மகிழ்ச்சி தெரிவித்த டவர் ஹாம்லட் மேயர்

வங்கதேச அமைச்சர் ஜுனைத் அஹமது, லண்டன் வொயிட் சேப்பல் ரயில் நிலையத்தின் ஆங்கில மொழி பெயர் பலகையுடன் வங்காள மொழி பெயர் பலகை பொறுத்தப்பட்டு இருக்கும் படத்தை பகிர்ந்து இருக்கிறார். லண்டன் பெருநகர டவர் ஹாம்லட் கவுன்சில் ஆங்கிலம் மற்றும் வங்காள மொழிகளில் பெயர் பலகை வைக்கும் திட்டத்தை முன்னிட்டு அதற்கான நிதியை ஒதுக்கி இருக்கிறது. இது குறித்து ட்விட்டரில் பதிவிட்டு உள்ள டவர் ஹாம்லட் மேயர் ஜான் பிக்ஸ், "வொயிட் சேப்பல் ரயில் நிலையத்தில் ஆங்கிலம் மற்றும் வங்காளம் ஆகிய இரு மொழிகளில் பெயர் பலகைகள் வைக்கப்பட்டிருப்பது மகிழ்ச்சி தருகிறது." எனக் கூறியுள்ளார்.

வொயிட்சேப்பல் ரயில்நிலையம்

சுரங்கம் மற்றும் விரைவு ரயில்கள் இயக்கப்பட்டு வரும் லண்டனின் முக்கிய ரயில்நிலையமான இதை தினசரி பல்லாயிரக்கணக்கான மக்கள் பயன்படுத்தி வருகின்றனர். ராயல் லண்டன் மருத்துவமனை எதிரே அமைந்து இருக்கும் இந்த ரயில் நிலையம் அல்ட்கேட் கிழக்கு மற்றும் ஸ்டெப்னே க்ரீன் ரயில் நிலையங்களுக்கு மத்தியில் அமைந்துள்ளது.

English summary

West Bengal Chief Minister Mamata Banerjee has welcomed the installation of a name board in English and Bengali at the world-famous London White Chapel railway station.