ஜாதிவாரி கணக்கெடுப்பு கடைசியாக நடத்தப்பட்டு முடிவுகள் வெளியானத எந்த ஆண்டு?

ஜாதிவாரி கணக்கெடுப்பு என்பது என்ன? முக்கியம் ஏன்? முயற்சிகள் தோல்வியில் முடிந்தன ஏன்?

Updated: Thursday, May 1, 2025, 12:55 [IST]

Subscribe to Oneindia Tamil

சென்னை: ஜாதிவாரி மக்கள் தொகைக் கணக்கெடுப்பு நடத்தப்படும் என மத்திய அரசு அறிவித்துள்ளதைத் தொடர்ந்து பல்வேறு விவாதங்கள் களைகட்டி உள்ளன. ஜாதிவாரி கணக்கெடுப்புக்கு நிதியும் ஒதுக்காமல் காலமும் நிர்ணயிக்காமல் மத்திய அரசு வெளியிட்டுள்ள இந்த அறிவிப்பு பல்வேறு சந்தேகங்களை எழுப்புவதாகவும் அரசியல் கட்சித் தலைவர்கள் கேள்வி எழுப்புகின்றனர்.

ஜாதிவாரி கணக்கெடுப்பு தொடர்பாக கடந்த ஆண்டு ஆங்கில நாளேட்டில் தமிழக முன்னாள் ஐஏஎஸ் அதிகாரியும் தற்போதைய தமிழ்நாடு அரசின், மத்திய- மாநில உறவுகளுக்கான கமிட்டியின் உறுப்பினருமான அசோக் வர்தன் ஷெட்டி கடந்த ஆண்டு ஆங்கில நாளேட்டில் எழுதிய கட்டுரையில் இடம் பெற்ற தகவல்கள்:

இந்திய மக்கள் தொகைக் கணக்கெடுப்பில் சாதியைக் (ஜாதியை) கணக்கிடுவது நான்கு காரணங்களுக்காக முக்கியமானது :-

1) இது ஒரு சமூக கட்டாயம். இந்தியாவில் சாதி என்பது ஒரு அடிப்படை சமூகக் கட்டமைப்பாகத் தொடர்கிறது. 2011--12ல் மேற்கொள்ளப்பட்ட ஒரு கணக்கெடுப்பின்படி, இந்திய திருமணங் களில் 5 சதவீதம் மட்டுமே சாதிகளுக்கு இடையேயான திருமணங்கள். சாதிய குடும்பப்பெயர்கள் மற்றும் சாதி அடையாளங்களை உடலில் பயன்படுத்துவது இன்னும் பரவலாக உள்ளது. பெரும்பாலான கிராமங்களிலும் பல நகரங்களிலும் சாதியின் அடிப்படையில் குடியிருப்புப் பிரிவினை நீடிக்கிறது. தேர்தலுக்கான வேட்பாளர்களும், மந்திரிசபைக்கான அமைச்சர்களும் முக்கியமாக சாதியின் அடிப்படையில் தேர்ந்தெடுக்கப்படுகிறார்கள். சாதியை ஒழிப்பதில் அரசு தீவிரம் காட்டினால், இந்தப் பிரச்னைகளில் கவனம் செலுத்த வேண்டும்; மக்கள் தொகைக் கணக்கெடுப்பில் சாதியைக் கணக்கிடாமல் இருப்பது தீர்வாகாது.

2) இது ஒரு சட்டபூர்வமான கட்டாயம். தேர்தல் தொகுதிகள், கல்வி மற்றும் பொது வேலைவாய்ப்பு ஆகியவற்றில் இடஒதுக்கீடுகளை உள்ளடக்கிய சமூக நீதிக்கான அரசியலமைப்பு- கட்டாயக் கொள்கைகள் விரிவான சாதி வாரியான தரவு இல்லாமல் திறம்பட தொடர முடியாது. அரசியலமைப்புச் சட்டம் சாதி என்பதற்குப் பதிலாக வர்க்கம் என்ற வார்த்தையைப் பயன்படுத்தினாலும், பிற்படுத்தப்பட்ட வகுப்பினரை வரையறுப்பதற்கு ஜாதியை 'தொடர்புடைய அளவுகோல்', 'ஒரே அளவுகோல்' அல்லது 'ஆதிக்க அளவுகோல்' என உச்ச நீதிமன்றத்தின் பல்வேறு தீர்ப்புகள் கூறி, சாதி வாரியாக விரிவான கோரிக்கையை முன்வைத்துள்ளன. இது இட ஒதுக்கீடு கொள்கைகளை நிலைநிறுத்துவதற்கான தரவு.

3) இது ஒரு நிர்வாக கட்டாயம். தகுதியற்ற சாதிகளை தவறான முறையில் சேர்ப்பதையும், தகுதியுள்ள சாதிகளை தவறாக ஒதுக்குவதையும் தவிர்க்கவும்/திருத்தவும், ஒதுக்கப்பட்ட பிரிவில் உள்ள ஒரு சில ஆதிக்க சாதிகள் பிற சாதிகளை ஒதுக்கப்படுவதைத் தவிர்க்கவும் விரிவான சாதி வாரியான தரவு அவசியம். ஒதுக்கப்பட்ட பிரிவினுள் உள்ள சாதிகளை துணைப்பிரிவு செய்வதற்கும், கிரீமிலேயருக்கு வருமானம்/செல்வம் அளவுகோலை நிர்ணயம் செய்வதற்கும் இது தேவைப்படுகிறது.

4) இது ஒரு தார்மீக கட்டாயம். விரிவான ஜாதி வாரியான தரவு இல்லாதது, உயர் சாதியினர் மற்றும் மேலாதிக்க இதர பிற்படுத்தப்பட்ட வகுப்பினர் (OBC கள்) மத்தியில் உள்ள உயரடுக்கினருக்கு, நாட்டின் சொத்துக்கள், வருமானங்கள் மற்றும் அதிகாரப் பதவிகளில் விகிதாசாரமற்ற பங்கைப் பெற உதவியது. இது பெரும்பான்மையினராக உள்ள தாழ்த்தப்பட்ட சாதியினருக்குப் பாதகமாக அமைந்தது.

ஆங்கிலேயர் ஆட்சியில் ஜாதிவாரி கணக்கெடுப்பு

பிரிட்டிஷ் இந்தியாவில், 1881 முதல் 1931 வரையிலான மக்கள் தொகை கணக்கெடுப்பில் அனைத்து சாதியினரும் கணக்கிடப்பட்டனர். 1951 ஆம் ஆண்டு சுதந்திரத்திற்குப் பிறகு நடத்தப்பட்ட முதல் மக்கள் தொகைக் கணக்கெடுப்பில், சாதியைக் கணக்கிடக் கூடாது என்று இந்திய அரசு உத்தரவிட்டது. இருப்பினும், பட்டியல் சாதியினர் (SC) மற்றும் பழங்குடியினர் (ST) ஆகியவற்றுக்கு விதிவிலக்கு அளிக்கப்பட்டது. 1951 முதல் ஒவ்வொரு மக்கள் தொகை கணக்கெடுப்பிலும் அவர்கள் கணக்கிடப்படுகின்றனர். 1961 ஆம் ஆண்டில், இந்திய அரசு மாநிலங்கள் விரும்பினால் தங்கள் சொந்த கணக்கெடுப்புகளை நடத்தவும், மாநில-குறிப்பிட்ட OBC பட்டியல்களைத் தயாரிக்கவும் அறிவுறுத்தியது. அந்த நேரத்தில் மத்திய அரசிலும் அதன் நிறுவனங்களிலும் OBC களுக்கு இட ஒதுக்கீடு இல்லை.

மக்கள் தொகை கணக்கெடுப்பில் ஏன் OBC கணக்கிடப்பட வேண்டும்?

எஸ்.சி. மற்றும் எஸ்.டி.களைப் போலவே, ஓ.பி.சி.களுக்கும் கல்வி (பிரிவு 15(4)) மற்றும் பொது வேலைவாய்ப்பில் (பிரிவு 16(4)) இடஒதுக்கீட்டை அரசியலமைப்பு அனுமதிக்கிறது. நாட்டின் பல பகுதிகளில், ஓபிசியினர் சுதந்திரத்திற்கு முன்பே இடஒதுக்கீட்டை அனுபவித்து வந்தனர். எனவே, 1951 ஆம் ஆண்டு மக்கள் தொகைக் கணக்கெடுப்பில் ஓபிசியும் கணக்கிடப்பட்டிருக்க வேண்டும்.

மண்டல் கமிஷன் பரிந்துரைகளை அமல்படுத்திய பிறகு, ஒன்றிய அரசு மற்றும் அதன் நிறுவனங்களிலும் ஓ.பி.சி.கள் இடஒதுக்கீட்டை அனுபவிக்கின்றனர். இந்திரா சாவ்னி (Indra Sawhney) வழக்கில் (1992), ஓபிசி பட்டியல் (இது 1931 மக்கள் தொகை கணக்கெடுப்பின் அடிப்படையில்) அவ்வப்போது திருத்தப்பட வேண்டும் என்று உச்ச நீதிமன்றம் தீர்ப்பளித்தது.

எஸ்.சி., எஸ்.டி. போன்று எம்.பி., எம்.எல்.ஏ.க் களுக்கு தேர்தல் தொகுதிகளில் ஓ.பி.சி.களுக்கு இடஒதுக்கீடு இல்லை. ஆனால் 73வது மற்றும் 74வது திருத்தங்களுக்குப் பிறகு (1993), எஸ்.சி. மற்றும் எஸ்.டி.களுக்கு மட்டுமின்றி ஓ.பி.சி. களுக்கும் பஞ்சாயத்து மற்றும் நகராட்சிகளில் தேர்தல் தொகுதிகளில் இடஒதுக்கீடு அளிக்க அரசியலமைப்பு வழங்குகிறது (பிரிவு 243D(6) மற்றும் 243T(6)). இதற்கு, சாதி வாரியாக, பகுதி வாரியாக ஓ.பி.சி.களின் மக்கள் தொகை கணக்கெடுப்புத் தரவு அவசியம். எனவே, ஒன்றிய அரசு குறைந்தபட்சம் 2001 மக்கள்தொகை கணக்கெடுப்பில் ஓ.பி.சி.களை கணக்கெடுத்திருக்க வேண்டும். ஆனால் செய்யவில்லை.

உத்தரப் பிரதேசம், மத்தியப் பிரதேசம், குஜராத், மகாராஷ்டிரா, கர்நாடகா, ஒடிசா, ஜார்கண்ட் போன்ற மாநிலங்கள் உள்ளாட்சித் தேர்தலில் ஓ.பி.சி.யினருக்கான இடஒதுக்கீட்டை அமல்படுத்த முயன்ற போதெல்லாம், சாதி வாரியான தரவு இல்லாத காரணத்திற்காக உயர்நீதிமன்றங்களும் உச்ச நீதிமன்றமும் தடை விதித்தன. நாட்டின் ஒரு பிரிவு - நீதித்துறை - இடஒதுக்கீட்டைப் பராமரிக்க சாதி வாரியான தரவுகளைக் கோருகிறது, மற்றொன்று - மத்திய அரசு - அதே தரவுகளை எண்ணுவதைத் தவிர்ப்பதற்கான காரணங்களைக் கண்டுபிடிக்கிறது!

எவ்வாறாயினும், OBCகள், SCக்கள் மற்றும் STகள் தவிர பிற மக்களிடையே (திறம்பட, உயர்சாதியினர்) பொருளாதார ரீதியாக நலிவடைந்த பிரிவினருக்கு (EWS) 10% இடஒதுக்கீடு எந்த அனுபவபூர்வமான தரவுகளும் இல்லாத போதிலும் 2022 இல் உச்ச நீதிமன்றத்தால் உறுதிசெய்யப்பட்டது. EWS இடஒதுக்கீட்டைக் கருத்தில் கொண்டு, மக்கள் தொகைக் கணக்கெடுப்பில் 1931 வரை இருந்ததைப் போலவே உயர்சாதியினர் உட்பட அனைத்து சாதிகளையும் இப்போது கணக்கிட வேண்டும்.

மக்கள்தொகை கணக்கெடுப்பு ஒரு மையப் பொருளாகும், ஆனாலும், புள்ளியியல் சேகரிப்புச் சட்டம், 2008, தேவையான தரவுகளைச் சேகரிக்க மாநிலங்களுக்கும் உள்ளாட்சி அமைப்புகளுக்கும் அதிகாரம் அளிக்கிறது. எனவே, கர்நாடகா (2015) மற்றும் பீகார் (2023) போன்ற சாதிவாரி கணக்கெடுப்புகளை தனிப்பட்ட மாநிலங்கள் எப்போதும் நடத்தலாம். ஆனால் மக்கள் தொகை கணக்கெடுப்பு தரவு அதிக நம்பகத்தன்மை கொண்டது மற்றும் குறைவான சர்ச்சைக்குரியது. இந்திய அரசு 1992 முதல் OBC மற்றும் 2019 முதல் EWS இட ஒதுக்கீட்டை செயல்படுத்தி வருகிறது. எனவே, மக்கள்தொகைக் கணக்கெடுப்பில் சாதியைக் கணக்கிடுவதில் அதன் தயக்கம் சட்டரீதியாக தவறானது மற்றும் நிர்வாக ரீதியாக விவேகமற்றது.

சாதிவாரி கணக்கெடுப்பு முயற்சி எப்படி தோல்வியடைந்தது?

ஓ.பி.சி. தலைவர்களின் கணிசமான பரப்புரைக்குப் பிறகு, 2010 இல், 2011 மக்கள்தொகை கணக்கெடுப்பின் ஒரு பகுதியாக சாதியைக் கணக்கிட வேண்டும் என்று நாடாளுமன்றம் ஒருமனதாக ஒரு தீர்மானத்தை (காங்கிரஸ் மற்றும் பி.ஜே.பி. இரண்டும் சேர்த்து) நிறைவேற்றியது. 1931 ஆம் ஆண்டு மக்கள்தொகை கணக்கெடுப்பின்படி, சாதி கடைசியாக கணக்கிடப்பட்டபோது, இந்தியாவில் தாழ்த்தப்பட்ட வகுப்பினர்/தீண்டத்தகாதவர்கள் (அப்போது அவர்கள் அப்படி அழைக்கப்பட்டனர்) தவிர 4,147 சாதிகள் இருந்தன. துரதிர்ஷ்டவசமாக, சமூகப் பொருளாதாரம் மற்றும் சாதிக் கணக்கெடுப்பு (SECC)-2011 மோசமாக வடிவமைக்கப்பட்டு செயல்படுத்தப்பட்டது, 46 லட்சம் சாதிகள் என்ற கேலிக்குரிய எண்ணிக்கையை தூக்கி எறிந்து, முடிவுகள் வெளியிடப்படவில்லை. ஒரு பொன்னான வாய்ப்பு பறிபோனது.

SECC-2011 மக்கள்தொகைக் கணக்கெடுப்புச் சட்டம், 1948-ன் கீழ் நடத்தப்படாததால், செயலிழந்தது. சாதியை ஒரு அளவுகோலாக சேர்க்க சட்டம் திருத்தப்படவில்லை. சமூகவியல்/மானுடவியல் ஆய்வுகளை மேற்கொள்வதில் முன் அனுபவம் இல்லாத, ஊரக வளர்ச்சி மற்றும் நகர்ப்புற மேம்பாட்டு அமைச்சகங்கள் மூலம் இது நடத்தப்பட்டது. கூடுதலாக, கேள்வித்தாள் மோசமாக வடிவமைக்கப்பட்டுள்ளது மற்றும் சாதி பற்றிய திறந்த கேள்விகள் கேட்கப்பட்டன. உண்மையான சாதிகள், மாற்று சாதிப் பெயர்கள், பெரிய சாதிக் குழுக்கள், துணை சாதிகள், குடும்பப்பெயர்கள், குலப்பெயர்கள், கோத்திரங்கள் போன்றவற்றைக் கணக்கெடுப்பாளர்களால் வேறுபடுத்திப் பார்க்க முடியவில்லை.

இதற்கு நேர்மாறாக, 2023 இல் நடத்தப்பட்ட சாதிவாரி கணக்கெடுப்பை பீகார் அரசாங்கம் மிக சிறப்பாக செய்தது. பீகாரில் குறிப்பிட்ட 214 சாதிப் பெயர்களின் பட்டியலை அது கணக்கெடுப்பாளர்களுக்கு வழங்கியது, மேலும் 215வது பிரிவை "பிற சாதிகள்" என்று பெயரிட்டது. ஆங்கிலேயர்களாலும், பீகார் அரசாலும் சாதிவாரிக் கணக்கெடுப்பை வெற்றிகரமாக நடத்தமுடியும் போது, இந்திய அரசால் ஏன் அதைச் செய்ய முடியாது? (நன்றி முரசொலி 18.07.2024).