ஜம்மு காஷ்மீரில் இப்படி எல்லாம் நடக்குதே.. விடிஞ்சா தேர்தல்..இரவோடு இரவாக கட்சி தாவிய வேட்பாளர்!

ஶ்ரீநகர்: ஜம்மு காஷ்மீரில் நாளை மறுநாள் முதல் கட்ட சட்டசபை தேர்தல் நடைபெறும் நிலையில் பிரிவினைவாதி பொறியாளர் ரஷீத் எம்பியின் அவாமி இதிஹாத் கட்சி வேட்பாளர் முகம்மது இக்பால் ஷோபி திடீரென தேசிய மாநாட்டுக் கட்சியில் இணைந்து பரபரப்பை ஏற்படுத்தி உள்ளார். பொறியாளர் ரஷீத் எம்பியின் அவாமி இதிஹாக் கட்சியும் தடை செய்யப்பட்ட ஜமாத் இ இஸ்லாமியின் மாஜி தீவிரவாதிகளும் கூட்டணி அமைத்துள்ளதற்கு எதிராக தாம் இந்த முடிவை எடுத்ததாக வேட்பாளர் முகம்மது இக்பால் ஷோபி தெரிவித்துள்ளார்.

ஜம்மு காஷ்மீரில் முதல் கட்டமாக 24 தொகுதிகளில் நாளை மறுநாள் செப்டம்பர் 18-ந் தேதி வாக்குப் பதிவு நடைபெறுகிறது. இந்த முதல் கட்ட தேர்தலுக்கான பிரசாரம் இன்று மாலையுடன் ஓய்ந்தது.

ஜம்மு காஷ்மீரில் நாளை மறுநாள் முதல் கட்ட வாக்குப் பதிவு நடைபெறும் தொகுதிகளில் ஒன்று புல்வாமா. இத்தொகுதியில் தேசிய மாநாட்டுக் கட்சி வேட்பாளராக முகம்மது கலீல் பந்த், மக்கள் ஜனநாயகக் கட்சியின் வஹீத் உர் ரெஹ்மான் பாரா, பொறியாளர் ரஷீத் எம்பியின் அவாமி இதிஹாக் கட்சியின் முகம்மது இக்பால் ஷோபி உள்ளிட்டோர் களம் காண்கின்றனர்.

புல்வாமாவில் நாளை மறுநாள் தேர்தல் நடைபெறும் நிலையில் இன்று இரவு திடீரென தேசிய மாநாட்டுக் கட்சியின் துணைத் தலைவர் ஒமர் அப்துல்லாவை அவாமி இதிஹாக் கட்சி வேட்பாளர் முகம்மது இக்பால் ஷோபி நேரில் சந்தித்து தம்மை தேசிய மாநாட்டுக் கட்சியில் இணைத்துக் கொண்டார். இது தொடர்பாக முகம்மது இக்பால் ஷோபி கூறியதாவது: அவாமி இதிஹாக் கட்சி வேட்பாளராக புல்வாமாவில் போட்டியிட்டேன். ஆனால் திடீரென தமாஜ் இ இஸ்லாமி அமைப்புடன் எங்கள் கட்சி கூட்டணி அமைத்துவிட்டது. செப்டம்பர் 18-ந் தேதி வாக்குப் பதிவு நடைபெற இருக்கிறது. இந்த நிலையில் திடீரென இந்த கூட்டணி அறிவிக்கப்பட்டுள்ளது. எங்களைப் பொறுத்தவரை தேசிய மாநாட்டுக் கட்சிதான் பிரம்மாண்ட வெற்றியைப் பெற உள்ளது. தற்போதைய நிலையில் வேட்பு மனுவை திரும்பப் பெற முடியாது. ஆகையால் வாக்காளர்கள் அனைவரும் தேசிய மாநாட்டு கட்சி- காங்கிரஸ் கூட்டணி வேட்பாளர்களையே ஆதரிக்க வேண்டும். இவ்வாறு முகம்மது இக்பால் ஷோபி கூறினார்.

English summary

Jammu Kashmir's Pulwama AIP candidate Mohammad Iqbal Sofi today joined NC.