கேரளா: இன்னொரு அபயா? கான்வென்ட் கிணற்றில் 42 வயது கன்னியாஸ்திரி சடலமாக மீட்பு- போலீஸ் தீவிர விசாரணை

கொல்லம்: கேரளாவின் கொல்லம் மாவட்டத்தில் சர்ச் கான்வென்ட் கிணற்றில் 42 வயது கன்னியாஸ்திரி சடலமாக மீட்கப்பட்ட சம்பவம் அதிர்ச்சியையும் பரபரப்பையும் ஏற்படுத்தியுள்ளது.

கேரளா கான்வென்ட்டுகளில் கன்னியாஸ்திரிகள் தொடர்பான சம்பவங்கள் பெரும் பரபரப்பை கிளப்பிவிடுகின்றன. 28 ஆண்டுகளுக்கு முன்னதாக கோட்டயம் கன்னியாஸ்திரி அபயா மர்ம மரண வழக்கு நாட்டையே உலுக்கியது.

கிணற்றில் சடலமாக மீட்கப்பட்ட கன்னியாஸ்திரி அபயா, தற்கொலை செய்து கொண்டதாக கூறப்பட்டது. இது தொடர்பாக 2 சிபிஐ குழுக்கள் விசாரணை நடத்தியும் அபயா மர்ம மரணத்தின் முடிச்சு அவிழ்க்கப்படவில்லை.

அபயா கொலை

3-வது சிபிஐ குழு நடத்திய விசாரணையில்தான் பல்வேறு திடுக்கிடும் தகவல்கள் அம்பலத்துக்கு வந்தன. கன்னியாஸ்திரி செபி என்பவருடன் 2 பாதிரியார்கள் தகாத உறவு வைத்திருந்ததை அபயா பார்த்ததால் அவர் கொலை செய்யப்பட்டு கிணற்றில் வீசப்பட்டார் என்பது கண்டுபிடிக்கப்பட்டது.

இருவருக்கு ஆயுள் தண்டனை

28 ஆண்டுகாலம் நடைபெற்ற இந்த வழக்கில் கடந்த ஆண்டு டிசம்பர் மாதம் தீர்ப்பளிக்கப்பட்டது. கன்னியாஸ்திரி செபி, பாதிரியார் கோட்டூர் தாமஸ் ஆகியோருக்கு அபயா கொலை வழக்கில் ஆயுள் தண்டனை விதிக்கப்பட்டது. இந்த பரபரப்புகள் ஓய்ந்து சில மாதங்களுக்குள் கொல்லம் கான்வென்ட் கிணறில் மற்றொரு கன்னியாஸ்திரி சடலமாக மீட்கப்பட்டுள்ளார்.

கொல்லம் கன்னியாஸ்திரி

கொல்லம் கான்வென்ட்டில் தங்கி இருந்த பவும்பாவை சேர்ந்த மேப்லி ஜோசப் என்ற கன்னியாஸ்திரி காலையில் பிரார்த்தனைக்கு வரவில்லை. இதனையடுத்து அவர் தேடப்பட்டதாகவும் அப்போது கிணற்றில் சடலமாக மிதந்த நிலையில் அவரது உடல் காணப்பட்டதாகவும் கூறப்படுகிறது.

கன்னியாஸ்திரி தற்கொலையா?

தற்போது கன்னியாஸ்திரியின் உடலை மீட்டு போலீசார் தீவிர விசாரணை நடத்தி வருகின்றனர். இந்த வழக்கிலும் இது தற்கொலையாக இருக்கலாம் என்றே இப்போது கூறப்படுகிறது. இருப்பினும் போலீஸ் விசாரணையில்தான் உண்மை என்னவென்று தெரியவரும். இச்சம்பவம் கேரளாவில் பரபரப்பை ஏற்படுத்தியுள்ளது.

English summary

The Kerala Police probe on a nun found dead in the Kollam convent well.