“என் மகள் பாம்பாக மாறிவிட்டாள்”.. பதறிய அப்பா.. இளம்பெண்ணின் ‘பயங்கர’ பிளான்.. நடந்தது என்ன?

லக்னோ: உத்தர பிரதேசத்தின் அவுரையா மாவட்டத்தில் காணாமல் போன இளம்பெண் ஒருவர் பாம்பாக மாறி விட்டதாக வெளியான தகவல் பெரும் பரபரப்பை ஏற்படுத்தியது. இதுதொடர்பாக போலீசார் விசாரணை நடத்தியதில், அந்தப் பெண் காதலனோடு தப்பியோடுவதற்காக ஒரு ஸ்கிரிப்ட் எழுதி நாடகத்தை அரங்கேற்றியது தெரியவந்துள்ளது.

உத்தர பிரதேசத்தில் 19 வயது இளம்பெண் மாயமான சம்பவத்தில் அந்தப் பெண் 'நாகினி'யாக மாறியதாக வெளியான வதந்தியை காவல்துறையினர் திட்டவட்டமாக மறுத்துள்ளனர். மாறாக, திருமண அழுத்தத்தால் அந்தப் பெண் தப்பியோடியிருக்கலாம் எனச் சந்தேகிப்பதாகக் கூறியுள்ளனர். இந்த வழக்கை காதல் ஜோடி தப்பியோடியதாகவே கருதி, தேடுதல் பணிக்காக மூன்று தனிப்படைகள் அமைக்கப்பட்டுள்ளன.

இந்த மர்மமான சம்பவம், உத்தர பிரதேசத்தின் அவுரையா மாவட்டத்தின் பஃபன்ட் காவல் நிலைய எல்லைக்குட்பட்ட பகுதியில் நடந்தது. "என் மகள் ஒரு 'நாகினி'யாக மாறிவிட்டாள். அவள் அறையில் பாம்பின் தோலுரித்த சட்டையைப் பார்த்தோம். அவளைக் கண்டுபிடிக்க எங்களுக்கு உதவுங்கள்," என்று அந்தப் பெண்ணின் தந்தை காவல்துறையினரிடம் மன்றாடியபோது, ​​முதலில் அவர்களும் திகைத்துப் போயினர்.

காவல்துறை அதிகாரிகள் சம்பவ இடத்துக்குச் சென்றபோது, வழக்கத்திற்கு மாறான ஒரு காட்சி அவர்களை வரவேற்றது. படுக்கையில் நேர்த்தியாக வைக்கப்பட்டிருந்த பாம்பின் தோலுரித்த சட்டை, மற்றபடி கலைக்கப்படாமல் இருந்த அறை, ஆனால் அந்த இளம்பெண் மட்டும் காணாமல் போயிருந்தார். ஒரு அமானுஷ்ய மூடநம்பிக்கை கதையாகத் தொடங்கிய இச்சம்பவம், தற்போது காவல்துறையினரால் வெளிப்பட்டுள்ளது.

தங்கள் குடும்பத்தின் திருமணத் திட்டங்களுக்கு உடன்பட விரும்பாத அந்த இளம்பெண், மூன்று மாதங்களுக்கும் மேலாக திட்டமிட்டு இந்தக் கதைக்கு ஒரு ஸ்கிரிப்டை தயாரித்திருப்பதாகக் காவல்துறையினர் கூறுகின்றனர். குடும்ப உறுப்பினர்கள் கூற்றுப்படி, மாயமான பெண் கடந்த சில மாதங்களாகத் தன் கனவுகளில் பாம்புகள் தோன்றுவதைப் பற்றி அடிக்கடி பேசி வந்துள்ளார். ஒரு பாம்பு தன்னுடன் வந்து படுத்து உறங்குவதாக அவர் கூறியிருக்கிறார்.

சுமார் மூன்று மாதங்களுக்கு முன்பு, மெயின்புரி மாவட்டத்தின் கும்ஹெல் பகுதியில் உள்ள சேஷநாக கோவிலுக்குச் சென்று, அங்கிருந்து ஒரு சேஷநாக சிலையை வாங்கி வந்துள்ளார். கோவில் சென்று வந்த பிறகு, பாம்புகள் பற்றிய அவரது பேச்சுகள் மேலும் தெளிவாகவும், தீவிரமாகவும் மாறியதாகக் குடும்பத்தினர் தெரிவிக்கின்றனர். "கோவிலில் இருந்து வந்த பிறகு, கனவில் ஒரு பாம்பு தன் அருகில் படுத்து உறங்குவதாக அவர் தொடர்ந்து கூறி வந்தார். நாங்கள் கவலையடைந்தோம், ஆனால் இப்படி ஏதாவது நடக்கும் என்று நினைக்கவில்லை," என்று குடும்ப உறுப்பினர் ஒருவர் கூறினார்.

காணாமல் போன அன்று, அவர் சேஷநாக சிலையை மட்டுமே தன் உடன் எடுத்துச் சென்றதாகக் கூறப்படுகிறது. படுக்கையில் கவனத்துடன் வைக்கப்பட்டிருந்த பாம்பின் சட்டை, அவர் காலப்போக்கில் உருவாக்கிய கதையை வலுப்படுத்தியது. அந்த வீட்டில் அமானுஷ்யமான ஏதோ ஒன்று நடந்திருக்கலாம் என்ற அச்சத்தை அதிகமாக்கியது.

ஆனால், காவல்துறை இந்த கோணத்தை உறுதியாக நிராகரித்துள்ளது. வட்டக் காவல் ஆய்வாளர் (CO) மனோஜ் கங்வார், 'நாகினி' கோட்பாட்டை வதந்தி என்று கூறினார். "அவர் 'நாகினி'யாக மாறிய கதையில் எந்த உண்மையும் இல்லை. இவை ஆதாரமற்ற வதந்திகள். நாங்கள் இதை ஒரு காணாமல் போன வழக்காக விசாரித்து வருகிறோம்," என்று கங்வார் கூறி, தவறான தகவல்களைப் பரப்ப வேண்டாம் என்று பொதுமக்களைக் கேட்டுக்கொண்டார்.

காவல்துறை தகவல்களின்படி, அப்பெண்ணின் குடும்பத்தினர் திருமணத்திற்காக அவரை வற்புறுத்தியுள்ளனர், ஆனால் அவர் அதற்குச் சம்மதிக்கவில்லை. கோவில் பயணம், பாம்புக் கனவுகள் பற்றிய தொடர்ச்சியான குறிப்புகள், மற்றும் பாம்பின் சட்டையை நாடகத்தனமாக வைத்தது போன்றவை, வீட்டை விட்டு வெளியேறிய பிறகு குழப்பத்தை ஏற்படுத்தி, சந்தேகத்தைத் தாமதப்படுத்துவதற்கான ஒரு முன் திட்டமிட்ட பெரிய திட்டத்தின் ஒரு பகுதியாக இருந்திருக்கலாம் என்று சந்தேகிக்கின்றனர்.

இந்தக் கோட்பாட்டை வலுப்படுத்தும் சில தகவல்களை கிராம மக்களும் பகிர்ந்துள்ளனர். ஒரு உள்ளூர்வாசி, கடந்த இரண்டு நாட்களாக அந்தப் பெண் அருகிலுள்ள வயல்வெளிகளில் தனியாகச் சுற்றித் திரிவதைக் கண்டதாகக் கூறினார். "அவள் வயல்வெளிகளை நோக்கிச் சென்று ஆள் நடமாட்டம் இல்லாத இடங்களைச் சுற்றிப் பார்த்தாள். அப்போது நாங்கள் ஏன் என்று புரியவில்லை. இப்போது அவள் பாம்பின் சட்டையைத் தேடியிருக்கலாம் என்று தோன்றுகிறது," என்று அந்தக் கிராமவாசி கூறினார்.

அப்பெண்ணின் மறைவை நாடகமாக்கி, உடனடி தேடலைத் திசை திருப்புவதற்காகவே இந்தப் பாம்பின் சட்டை வேண்டுமென்றே வைக்கப்பட்டிருக்கலாம் என்று காவல்துறை நம்புகிறது. இந்தச் சம்பவம் குறித்த விசாரணை, குடும்பத்தின் அழைப்பு விவரங்களை காவல்துறை ஆய்வு செய்தபோது ஒரு ட்விஸ்ட்டை அடைந்தது. காணாமல் போன அந்தப் பெண்ணுக்குச் சொந்தமாக மொபைல் போன் இல்லை என்றாலும், அவர் தன் தாயின் அடிப்படை கீபேட் செல்போனைஅடிக்கடி பயன்படுத்தியுள்ளார்.

அந்த எண்ணை ஆய்வு செய்ததில், ஒரு குறிப்பிட்ட இளைஞனுடன் மீண்டும் மீண்டும் நீண்ட உரையாடல்களை காவல்துறை கண்டுபிடித்தது. அந்த எண் அடையாளம் காணப்பட்டது, அவரைக் கண்டுபிடிக்கும் முயற்சிகள் நடந்து வருகின்றன. "அவர் தொடர்பில் இருந்த எண்ணைக் கண்டுபிடித்துள்ளோம். அந்த இளைஞனின் வீட்டுடன் இணைக்கப்பட்ட எல்லா எண்களும் தற்போது ஸ்விட்ச் ஆக் செய்யப்பட்டுள்ளன, மேலும் அவரது வீட்டிலும் யாரும் இல்லை," என்று ஒரு காவல்துறை அதிகாரி தெரிவித்தார்.

தன் மகள் தவறாக வழிநடத்தப்பட்டு அழைத்துச் செல்லப்பட்டதாகக் கூறி, அந்தப் பெண்ணின் தந்தை அடையாளம் தெரியாத நபர்கள் மீது புகார் செய்துள்ளார். தன் புகாரில் கிராமத்தைச் சேர்ந்த ஒரு இளைஞனையும் அவர் பெயரிட்டுள்ளார். "என் மகள் தவறாக வழிநடத்தப்பட்டு அழைத்துச் செல்லப்பட்டாள். அவள் பாதுகாப்பாகத் திரும்ப வரவேண்டும், கடுமையான நடவடிக்கை எடுக்க வேண்டும்," என்று அப்பெண்ணின் தந்தை குறிப்பிட்டார்.

காணாமல் போன பெண்ணையும் இளைஞனையும் கண்டுபிடிக்க காவல்துறை மூன்று தனிப்படைகளை அமைத்துள்ளது. அவர்களின் இருப்பிடத்தைக் கண்டறிய தொழில்நுட்பக் கண்காணிப்பு மற்றும் உள்ளூர் உளவுத் தகவல்கள் பயன்படுத்தப்படுகின்றன. காவல் ஆய்வாளர் மனோஜ் கங்வார், இந்தக் வழக்கு இயற்கைக்கு அப்பாற்பட்ட ஒன்றாக இல்லாமல், காதல் ஜோடி தப்பியோடியதாகவே கருதப்படுவதாகக் கூறினார்.

English summary

“My daughter has turned into a ‘naagin’. We found a snake slough from her room. Please help us find her," pleaded the father of a 19-year-old girl from Uttar Pradesh’s Auraiya district. UP Police dismiss the naagin theory as rumour. The 19-year-old girl was under pressure to get married and the case is being treated as suspected elopement, say UP Police.