பிரதமர் மோடியின் நிர்வாக "திறமையை" எக்ஸ்போஸ் செய்த விஜய் மல்லையா, நீரவ் மோடி!

வலிமையான அரசியல் பெரும்பான்மை பெற்ற பிரதமர் மோடியின் நிர்வாக திறமை இதுதான் என்பதை அம்பலப்படுத்தியிருக்கிறது விஜய் மல்லையா, நீரவ் மோடி விவகாரங்கள்.

டெல்லி: விஜய் மல்லையாக்களும் நீரவ் மோடிகளும் பல்லாயிரம் கோடி ரூபாய் பொதுமக்கள் பணத்தை வாரி சுருட்டிக் கொண்டு நாட்டை விட்டே தப்பி ஓடியவை என்பது பிரதமர் மோடியின் ஆட்சி முறையின் லட்சணத்தைத்தான் அம்பலப்படுத்துகின்றன,

2014 லோக்சபா தேர்தலின் போது ஆட்சி நிர்வாக அமைப்பில் புதிய மாற்றத்தை கொண்டு வருவோம் என்கிற தோற்றத்தை ஏற்படுத்தியிருந்தார் பிரதமர் மோடி. இதுவரை இல்லாத வகையில் புதிய அரசு நிர்வாகம் செயல்படும் என நம்பிக்கையை ஏற்படுத்தியிருந்தார்.

ஆனால் கடந்த 4 ஆண்டுகாலம் அத்தகைய நிர்வாக மாற்றங்கள் எதுவும் நடைமுறைப்படுத்தப்படவில்லை. இதற்கு மாறாக தீவிர இந்துத்துவா அரசியல் பேச்சுகள்தான் அதிகம் வெளிப்பட்டிருக்கின்றன.

நிர்வாகத்தில் ஓட்டை

இன்னும் சொல்லப் போனால் நாட்டை நிர்வகிக்க வேண்டிய பிரதமர் நரேந்திர மோடி, முழு நேர அரசியல்வாதியாக மட்டுமே களமாடி வருகிறார். இதற்கு முந்தைய வாஜ்பாய் தலைமையிலான தேசிய ஜனநாயகக் கூட்டணி அரசு அப்படி இல்லை.

அரசியல் மேடையாக நாடாளுமன்றம்

பிரதமராக இருந்த வாஜ்பாய் நிர்வாகத்தில் அதிக கவனம் செலுத்தினார். இப்போதோ நாடாளுமன்றத்தையே அரசியல் மேடையாக்கியிருக்கிறார் பிரதமர் மோடி. இப்படி அரசியல்வாதியாக மட்டுமே பிரதமர் மோடி இருப்பதால்தான் பொதுத்துறை வங்கிகள் சூறையாடப்பட்டு வருகின்றன.

வங்கி மோசடிகள்

விஜய் மல்லையா, நீரவ் மோடி, கோத்தாரி என பலரும் வங்கிகளில் பொதுமக்களின் பணத்தை பல்லாயிரம் கோடி ரூபாய் சுருட்டுகிறார்கள். விஜய்மல்லையா, நீரவ் மோடிகள் நாட்டைவிட்டே தப்பி ஓடுகிறார்கள். இது நிச்சயம் பிரதமர் மோடியின் நல்ல நிர்வாகி என்ற இமேஜுக்கு கடும் டேமேஜ் என்பதில் சந்தேகம் இல்லை.

நலல் நிர்வாகம் இல்லையே

மத்தியில் ஆட்சியைக் கைப்பற்றியதை வைத்து இந்தியாவின் அனைத்து மாநிலங்களிலும் ஏதோ ஏதோ செய்து அதிகாரத்தை கைப்பற்றலாம் என்பதுதான் பாஜகவின் நோக்கமாக இருக்கிறது; தேசபக்தர்கள் என்று தங்களை அழைத்துக் கொள்ளும் பாஜக, தேசத்தின் நிர்வாகத்தை தூய்மையாக்குவதிலும் சீரமைப்பதிலும் படு தோல்வியைத்தான் சந்தித்திருக்கிறது என்பது சந்தேகம் இல்லை.

இன்னும் எத்தனை நீரவ் மோடிகள் எந்த புற்றில் பதுங்கியிருக்கிறார்களோ?

English summary

Nirav Modi's PNB Scam exposed the Prime Minister Modi's failure of So called Good Governance Promise.