ராகுல் காந்தி என்ன பேசுகிறார் என்பது யாருக்குமே புரியலையே...: நரேந்திர மோடி

உதய்பூர்: காங்கிரஸ் துணைத் தலைவர் ராகுல் காந்தி ராஜஸ்தானில் என்ன பேசினார்? யாருக்காக பேசினார்? என்பது காங்கிரஸ் கட்சியினர் உட்பட யாருக்குமே புரியவில்லை என்று குஜராத் முதல்வரும் பாரதிய ஜனதா கட்சி வேட்பாளருமான நரேந்திர மோடி விமர்சித்துள்ளார்.

ராஜஸ்தான் மாநிலஉதய்பூரில் இன்று நடைபெற்ற சட்டசபை தேர்தல் பிரசார பொதுக்கூட்டத்தில் நரேந்திர மோடி பேசியதாவது:

ராஜஸ்தான் மாநில சட்டசபை தேர்தல் தேதி அறிவிக்கப்பட்ட பின்னர் முதல்முறையாக இங்கு பொதுக்கூட்டத்தில் பேசுகிறேன். 1857ஆம் ஆண்டு ஆங்கிலேயர் ஆட்சிக்கு எதிராக பழங்குடி இனமக்கள் இங்கு தீரமுடன் போராடினர்.

அந்த பழங்குடி இனமக்களின் தேசபக்தி இன்றும் நமக்கு உத்வேகம் தரக்கூடியதாக இருக்கிறது. உதய்பூர் பிரசார கூட்டத்துக்கு என்னை அழைத்த வசுந்தரராஜே சிந்தியாவுக்கு என் நன்றியைத் தெரிவித்துக் கொள்கிறேன்.

ராகுல் காந்தி என்ன பேசுகிறார்? எதற்காக பேசுகிறார்? யாருக்காக பேசுகிறார்? என்பது காங்கிரஸ் கட்சியினருக்குக் கூட புரியவில்லை... முசாபர்நகரில் இஸ்லாமிய இளைஞர்கள் பாகிஸ்தானின் ஐ.எஸ்.ஐ. அமைப்புடன் தொடர்பு வைத்திருக்கிறார்கள் என்று கூறினார் ராகுல். அவர்களது பெயரை கண்டிப்பாக ராகுல் காந்தி வெளியிட வேண்டும்.

ராகுலுக்கே இங்கே உள்ள அசோக் கெலாட் தலைமையிலான காங்கிரஸ் அரசு மீது நம்பிக்கை இல்லை..

அதனால்தான் யாருக்கும் சொல்லாமல் கோபால்கர் வந்து சென்றார்... ராஜஸ்தானில் ஆளும் கெலாட் அரசு மீது மனித உரிமைகள் ஆணையத்துக்கு நம்பிக்கை இல்லை.. சிறுபான்மையினர் ஆணையத்துக்கும் நம்பிக்கை இல்லை.. யாருக்குமே ராஜஸ்தானில் ஆளும் காங்கிரஸ் அரசு மீது நம்பிக்கை இல்லை.

அத்துடன் ராஜஸ்தான் மாநிலத்தில் பெண்கள் தைரியமாக எந்த ஒரு அமைச்சரையும் சந்தித்துவிட முடிகிறதா? காங்கிரஸ் கட்சி 100 நாட்களில் விலையைக் குறைப்போம் என்றது. ஆனால் என்ன நடந்தது?

வெங்காய விளைச்சல் 5% குறைந்தது என்றால் விலையோ 1500 மடங்கு அதிகரித்துள்ளது. காங்கிரஸ் ஆளும் மாநிலங்களான மகாராஷ்டிரா, ஆந்திரா, கர்நாடகாவில்தான் வெங்காயம் அதிகம் விளைவிக்கப்படுகிறது.

நாங்கள் ஏதேனும் புகார் தெரிவித்தால் உடனே சிபிஐயை அமைப்பை ஏவிவிடுவதை வாடிக்கையாகக் கொண்டிருக்கிறது மத்திய அரசு. ராஜஸ்தான் மாநிலத்தில் வசுந்தரராஜே சிந்தியா வெற்றி பெற்று முதல்வராவது உறுதி என்றார்.

English summary

BJP Prime Ministerial Candidate Narendra Modi said, The shahzada (Rahul) was here recently. He spoke so much that the Congress leaders still haven’t understood what he said, in Udaipur, Rajasthan on Saturday.