ஆபரேஷன் சிந்தூர்: பாகிஸ்தான் மீது தாக்குதல் நடந்தது எப்படி? ஏவுகணையை வைத்தே கதையை முடித்த இந்தியா

Updated: Wednesday, May 7, 2025, 3:27 [IST]

Subscribe to Oneindia Tamil

லாகூர்: பஹல்காம் தீவிரவாத தாக்குதலுக்கு பதிலடி கொடுக்கும் விதமாக இந்திய ராணுவம் ஆபரேஷன் சிந்து என்ற பெயரில் தாக்குதல் ஒன்றை நடத்தி இருக்கிறது. புதன்கிழமை மே 7ஆம் தேதி அதிகாலை 1மணியளவில் இந்த தாக்குதல் நடத்தப்பட்டு இருக்கிறது.

பாகிஸ்தான் ஆக்கிரமிப்பு காஷ்மீர் பகுதியில் உள்ள ஒன்பது தீவிரவாத முகாம்கள் குறிவைத்து இந்த தாக்குதல் நடத்தப்பட்டு உள்ளது. கடந்த முறை இதுபோல் இந்திய ராணுவம் வான்வழி தாக்குதலில் ஈடுபட்டது.

இம்முறை அதேபோல் வான் வழி தாக்குதல் நடத்தப்படும் என்று எதிர்பார்த்த பாகிஸ்தான் எல்லையோரங்களில் தங்களது நாட்டு பாதுகாப்பை தீவிர படுத்தியது. இந்த சூழலில் யாருமே எதிர்பாராத வகையில் இந்திய ராணுவம் ஏவுகணை தாக்குதலை நடத்தி இருக்கிறது. இந்தியா எப்போது தாக்குதல் நடத்தினாலும் அதை மறுக்கும் பாகிஸ்தான் தற்போது தாக்குதல் நடத்தப்பட்டதை ஒப்புக் கொண்டிருக்கிறது.

இது குறித்து பாகிஸ்தான் பாதுகாப்பு அதிகாரிகள் தெரிவிக்கையில், இந்திய ராணுவம் ஏவுகணைகள் மூலம் பாகிஸ்தான் பகுதியில் 3 இடங்களில் தாக்குதல் நடத்தி இருப்பதாக தெரிவித்துள்ளது. பாகிஸ்தான் ஆக்கிரமிப்பு, காஷ்மீர் பகுதியில் மற்றும் கிழக்கு பஞ்சாப் மாகாணத்தில் உள்ள ஒரு இடத்திலும் தாக்குதல் நடத்தப்பட்டு இருப்பதாக பாகிஸ்தான் தெரிவித்துள்ளது.

இதேபோன்று பாகிஸ்தான் நாட்டின் பஞ்சாப் மாநிலத்தில் உள்ள பகவல்பூர் என்ற இடத்தில் ஒரு ஏவுகணை தாக்குதல் நடத்தப்பட்டு இருப்பதாகவும் பாகிஸ்தான் தெரிவித்துள்ளது. பாகிஸ்தான் ராணுவமும் பதிலடி தாக்குதலை தொடங்கி இருப்பதாக தெரிவித்து இருக்கிறது. ஆனால் அது தொடர்பாக எந்த ஒரு விவரத்தையும் பாகிஸ்தான் ராணுவம் வெளியிடவில்லை.

இது குறித்து கருத்து தெரிவித்துள்ள பாகிஸ்தான் ராணுவத்தின் செய்தி தொடர்பாளர் அஹமது ஷரீஃப், இந்திய விமானப்படை சேர்ந்த எந்த விமானமும் பாகிஸ்தான் நாட்டுக்குள் நுழையவில்லை என்றும் ஏவுகணைகளை வைத்து இந்தியா தாக்குதலை நடத்தி இருப்பதாகவும் உறுதிப்படுத்தி இருக்கின்றார். இதுகுறித்து சமூக வலைத்தளத்தில் பதிவிட்டுள்ள, இந்திய ராணுவம் நீதி நிலை நிறுத்தப்பட்டு விட்டதாக குறிப்பிட்டுள்ளது. இந்த நிலையில், பாகிஸ்தானில் நடத்தப்பட்ட தாக்குதல் தொடர்பாக அந்நாட்டிலிருந்து பல்வேறு புகைப்பங்களும், வீடியோக்களும் சமூக வலைத்தளத்தில் வெளியாகி வருகிறது.