ராஜஸ்தான்: காங்கிரஸ் VS பாஜக-199 தொகுதிகளுக்கு ஒரே கட்டமாக நாளை வாக்குப் பதிவு- பலத்த பாதுகாப்பு!

ஜெய்ப்பூர்: ராஜஸ்தான் மாநிலத்தில் 199 சட்டசபை தொகுதிகளுக்கு நாளை ஒரே கட்டமாக வாக்குப் பதிவு நடைபெறுகிறது. ராஜஸ்தானில் வாக்குப் பதிவு நாளை நடைபெறுவதை முன்னிட்டு பலத்த பாதுகாப்பு ஏற்பாடுகள் செய்யப்பட்டுள்ளன.

ராஜஸ்தான் மாநிலத்தில் 2018 சட்டசபை தேர்தலில் காங்கிரஸ் கட்சி அமோக வெற்றி பெற்று ஆட்சியைப் பிடித்தது. ராஜஸ்தானில் மொத்தம் 200 தொகுதிகள் உள்ளன. இம்மாநிலத்தில் பெரும்பான்மைக்கு தேவை 101 இடங்கள். 2018 தேர்தலில் காங்கிரஸ் 100 இடங்களிலும் பாஜக 73 இடங்களிலும் வெற்றி பெற்றன. 2013 தேர்தலில் காங்கிரஸ் வெறும் 21 இடங்களிலும் பாஜக 163 இடங்களிலும் வெற்றி பெற்றிருந்தது.

ராஜஸ்தான் மாநிலத்தில் காங்கிரஸ் அரசு, முதல்வர் அசோக் கெலாட் தலைமையில் நடைபெற்று வருகிறது. பாஜக பிரதான எதிர்க்கட்சியாக இருந்து வருகிறது. இம்மாநிலத்தில் காங்கிரஸ், பாஜக இடையே நேரடி போட்டி கடுமையாக உள்ளது. இந்த கட்சிகளுடன் ஆம் ஆத்மி, பகுஜன் சமாஜ், ஓவைசியின் மஜ்லிஸ் கட்சி ஆகியவையும் களம் காண்கின்றன.

ராஜஸ்தானில் மொத்தம் 200 தொகுதிகளில் ஒரு தொகுதியில் வேட்பாளர் இறந்த காரணத்தால் 199 தொகுதிகளுக்கு நாளை காலை 7 மணி முதல் மாலை 6 மணி வரை வாக்குப் பதிவு நடைபெறும். இதற்காக 51,507 வாக்கு சாவடிகள் அமைக்கப்பட்டுள்ளன. மொத்தம் 5,26,90,146 வாக்காளர்கள் இத்தேர்தலில் வாக்களிக்க உள்ளனர். நாளை நடைபெறும் வாக்குப் பதிவை நேரடியாக கண்காணிக்க 26,393 வாக்கு சாவடிகளில் வெப் கேமராக்கள் பொருத்தப்பட்டுள்ளன.

ராஜஸ்தான் தேர்தலை கண்காணிக்க சுமார் 12 ஆயிரம் தேர்தல் அதிகாரிகள் பார்வையாளர்களாக நியமிக்கப்பட்டுள்ளனர். சுமார் 2.75 லட்சம் பேர் தேர்தல் பணியில் ஈடுபடுத்தப்பட்டுள்ளனர். நாளை பதிவாகும் அனைத்து வாக்குகளும் டிசம்பர் 3-ந் தேதி எண்ணப்பட்டு முடிவுகள் அறிவிக்கப்படும்.

ராஜஸ்தான் சட்டசபை தேர்தலில் பிரதமர் மோடி, மத்திய அமைச்சர் அமித்ஷா உள்ளிட்டோர் தீவிர பிரசாரம் செய்தனர். காங்கிரஸ் கட்சித் தலைவர் மல்லிகார்ஜூன கார்கே, மூத்த தலைவர்கள் ராகுல் காந்தி, பிரியங்கா உள்ளிட்டோரும் தேர்தல் பிரசாரம் செய்தார். ராஜஸ்தான் தேர்தலில் பிரதமர் மோடியை கெட்ட சகுனம் கொண்டவர், பிக்பாக்கெட் என ராகுல் காந்தி பேசியது பெரும் சர்ச்சையானது. ராஜஸ்தான் தேர்தல் களத்தில் ஆளும் காங்கிரஸும், பாஜகவும் வாக்குறுதிகளை அள்ளி வீசி இருக்கின்றன.

ராஜஸ்தான் மாநில சட்டசபை தேர்தலைப் பொறுத்தவரை பொதுவாக, ஆளும் காங்கிரஸ் கட்சி பாஜகவிடம் ஆட்சியை பறிகொடுக்கும் என்கின்றன. இருப்பினும் காங்கிரஸ்-பாஜக இடையே கடும் போட்டி இருக்கும் என்பது அரசியல் பார்வையாளர்களின் பொதுவான கருத்து. ராஜஸ்தான் சட்டசபை தேர்தலை அமைதியாக நடத்துவதற்காக அனைத்து பாதுகாப்பு ஏற்பாடுகளும் முழு வீச்சில் செய்யப்பட்டுள்ளன.

English summary

Rajasthan will see a fierce fight between Congress, BJP. Rajasthan is all set to go to the Assembly Elections tomorrow.