அக்பர் ஒரு 'ரேபிஸ்ட்'! அவரது பெயரை பயன்படுத்துவதே பாவமாம்.. ராஜஸ்தான் பாஜக அமைச்சர் சரமாரி விமர்சனம்

ஜெய்ப்பூர்: அக்பர் ஒரு பாலியல் வன்கொடுமையாளர் என்று ராஜஸ்தான் மாநிலத்தின் ஆளும் பாஜக அரசின் பள்ளிக் கல்வித்துறை அமைச்சர் விமர்சித்திருக்கிறார். இவரது கருத்துக்கு பல்வேறு தரப்பினரும் கண்டனம் தெரிவித்துள்ளனர்.

சமீபத்தில் சிங்கங்களுக்கு அக்பர், சீதா என பெயர் வைக்கப்பட்டிருந்தது பெரும் சர்ச்சையாக வெடித்திருந்தது. இந்த சம்பவத்தில் முதன்மை தலைமை வனக்காவலரை திரிபுரா அரசு பணி இடைநீக்கமும் செய்திருந்தது. இந்நிலையில், இதனை தொடர்ந்து தற்போது மற்றொரு சர்ச்சை அக்பர் பெயரில் வெடித்திருக்கிறது. அதாவது, அக்பர் ஒரு பாலியல் வன்கொடுமையாளர் என்றும், அவர் பெயர் இந்தியாவில் பயன்படுத்துவதே பாவம் என்று ராஜஸ்தான் மாநிலத்தின் பள்ளி கல்வித்துறை அமைச்சர் கூறியுள்ளார்.

சமீபத்தில் அம்மாநிலத்தில் நடந்த சட்டமன்ற தேர்தலில் பாஜக வெற்றி பெற்று ஆட்சியை அமைத்தது. இந்நிலையில், தற்போது பள்ளி கல்வித்துறையானது பாடபுத்தகங்களில் சில மாற்றங்களை செய்து வருகிறது. இது குறித்து தனியார் செய்தி ஊடகத்திற்கு பேட்டியளித்த கல்வித்துறை அமைச்சர் மதன் திலாவர், அக்பரை கடுமையாக விமர்சித்துள்ளார்.

அவர் பேசியதாவது, “நாங்கள் பள்ளியில் படிக்கும் போது, ​​அக்பர் சிறந்தவர் என்று படித்தோம். நானும் அதையே படித்திருக்கிறேன், ஆனால் அவர் மீனா பஜார் அமைத்து அழகான பெண்களையும், சிறுமகளையும் கூட்டிச் சென்று வலுக்கட்டாயமாக பாலியல் பலாத்காரம் செய்வதாகவும் கேள்விப்பட்டிருக்கிறேன். பாலியல் வன்கொடுமை செய்பவர் எப்படி சிறந்தவராக, உயர்ந்தவராக இருக்க முடியும்? அக்பரின் பெயரை இந்தியாவில் பயன்படுத்துவதே பாவம். அவர் ஒரு படையெடுப்பாளர். அவருக்கும் இந்திய மக்களுக்கும் எந்த தொடர்பும் இல்லை” என்று கூறியுள்ளார்.

இதுபோன்ற சர்ச்சைகளை மதன் திலாவர் எழுப்புவது இது முதல்முறையல்ல. ஏற்கெனவே, இந்து மாணவிகளை மதம் மாற்றியதாக கூறி ஆசிரியர்கள் இருவரை இவர் சஸ்பெண்ட் செய்திருக்கிறார். ஆசிரியர்கள் பணியாற்றும் பள்ளியில் மத மாற்றமும், லவ் ஜிகாத்தும் நடக்கிறது என்று கடுமையாக விமர்சித்திருந்தார். இந்நிலையில் தற்போது அக்பர் குறித்து குற்றச்சாட்டுகளை எழுப்பியுள்ளார்.

இவரது கருத்துக்களுக்கு பல்வேறு தரப்பினரும் கடும் கண்டனம் தெரிவித்து வருகின்றனர். தொடர்ச்சியாக முகலாய மன்னர்கள் குறித்து அவதூறு கருத்துக்கள் முன்வைக்கப்படுவது விவாதங்களை கிளப்பியுள்ளது.

English summary

The school education minister of Rajasthan's ruling BJP government has criticized Akbar as a sexual rapist. Various parties have condemned his opinion.