கொலையை மறைக்க திரிஷ்யம் டெக்னிக்.. போலீஸில் சிக்கிய இளைஞர்!
பாட்னா: பீகாரைச் சேர்ந்த 38 வயது நபர் தான் செய்த கொலையை மறைக்க இந்தியில் வெளியான திரிஷ்யம் படத்தில் வரும் டெக்னிக்கைப் பயன்படுத்தி அது தோல்வியில் முடிந்து தற்போது போலீஸாரிடம் மாட்டியுள்ளார்.
சினிமாவில் வரும் காட்சிகள் பெரும்பாலும் நிஜத்தில் பலன் தராமல் போகும். அதை நிரூபித்துள்ளது பீகாரில் நடந்த ஒரு சம்பவம்.
பீகார் மாநிலம் வைஷாலியைச் சேர்ந்தவர் ரஜ்னீஷ் சிங். இவரை ஒரு கொலை வழக்கில் போலீஸார் கைது செய்துள்ளனர்.
இதுகுறித்துப் போலீஸ் தரப்பில் கூறப்படுவதாவது:
ரஜ்னீஷ் சிங்குக்குத் திருமணமாகி 2 குழந்தைகள் உள்ளனர். ஆனால் தனது மனைவி பட்டிக்காடக இருப்பதாக வருத்தப்பட்ட அவர் மாடர்ன் பெண்ணை மணந்து டெல்லியில் குடியேற விரும்பினார். இதையடுத்து ஒரு திருமண இணையதளத்தில் தனது புகைப்படத்துடன் தகவல் வெளியிட்டார். தான் பெரும் பணக்காரர் என்று அதில் கூறியிருந்தார்.
அதைப் பார்த்து இந்தூரைச் சேர்ந்த சிருஷ்டி ஜெயின் சிங்குக்கு அறிமுகமானார். இருவரும் தொடர்பு கொண்டு பேசினர். பின்னர் சிங்கை நேரில் பார்ப்பதற்காக புறப்பட்டு வந்தார் சிருஷ்டி. பத்து நாட்களுக்கு முன்பு பாட்னாவில் வைத்து இருவரும் சந்தித்தனர்.
ஜனவரி 25ம் தேதி இந்த சந்திப்பு நடந்தது. இந்த சந்திப்பின்போது சிங் குறித்த உண்மையை சிருஷ்டி தெரிந்து கொண்டதாக கூறப்படுகிறது. இதனால் உன்னை மணக்க முடியாது என்று கூறியுள்ளார் சிருஷ்டி. மேலும் அங்கிருந்து கிளம்பி ரயில் நிலையத்துக்குப் போய் விட்டார்.
இதனால் கோபமடைந்த சிங் அவரைப் பின் தொடர்ந்து வந்து ரயில் நிலையத்திற்கு வெளியே வைத்து அவரைப் பிடித்து நிறுத்தினார். பின்னர் துப்பாக்கியால் சிருஷ்டியை மிக நெருக்கத்தில் வைத்து சுட்டுக் கொன்றார். பின்னர் தப்பி ஓடி விட்டார்.
அப்படிப் போகும்போது திரிஷ்யம் படத்தில் வருவது போல சில காரியங்களைச் செய்தார் சிங். அதாவது தனது மொபைல் போனை ஒரு லாரியில் போட்டுள்ளார். ஆனால் அது லாரியிலிருந்து தவறி கீழே விழுந்து விட்டது. அதேபோல திரிஷ்யம் படத்தில் வருவது போல தனது பைக்கை கங்கை ஆற்றில் போட்டுள்ளார். இதற்காக ஒரு படகோட்டியைப் பிடித்து அவருக்கு ரூ. 500 பணம் கொடுத்து பைக்கை கொண்டு போய் படகில் வைத்து ஆற்றில் போட்டுள்ளார் சிங்.
ஆனால் போன் தவறி கீழே விழுந்ததால் அவரது திட்டம் தோல்வியில் முடிந்து தற்போது போலீஸாரிடம் சிக்கியுள்ளார். அவரைப் போலீஸார் கைது செய்துள்ளனர்.
Click it and Unblock the Notifications
Sign in with Google