லோக்சபா தேர்தல்: வாரணாசியில் மோடியை எதிர்த்து கேஜ்ரிவால் போட்டியிட விரும்புவது ஏன்?
டெல்லி: லோக்சபா தேர்தலில் உத்தரப்பிரதேச மாநிலம் வாரணாசியில் பாரதிய ஜனதாவின் பிரதமர் வேட்பாளர் நரேந்திர மோடியை எதிர்த்து டெல்லி முன்னாள் முதல்வர் கேஜ்ரிவால் போட்டியிடக் கூடும் என்று கூறப்படுகிறது. ஆனால் கேஜ்ரிவாலின் இந்த முடிவு சிறுபிள்ளைத்தனமானது என்கின்றனர் அரசியல் பார்வையாளர்கள்.
லோக்சபா தேர்தலில் நரேந்திர மோடி உத்தரபிரதேசத்தில் போட்டியிட முடிவு செய்துள்ளதாக கூறப்படுகிறது. இதனாலேயே தமது சகாவான அமித்ஷாவை அம்மாநில பொறுப்பாளராகவும் மோடி நியமித்திருக்கிறார்.
ஆன்மீக நகரமான வாரணாசியில் எப்படியும் வென்றுவிட முடியும் என்பது மோடி மற்றும் பாஜகவினரின் நம்பிக்கை. அத்துடன் குஜராத் மாநில லோக்சபா தொகுதி ஒன்றிலும் மோடி போட்டியிட இருப்பதாக கூறப்படுகிறது.
இதனிடையே நரேந்திர மோடி வாரணாசியில் போட்டியிட்டால் அவரை எதிர்த்து ஆம் ஆத்மி கட்சி தலைவர் அரவிந்த் கேஜ்ரிவால் களத்தில் இறங்க திட்டமிட்டுள்ளார்.
டெல்லி சட்டசபை தேர்தலில் போட்டியிட்ட அரவிந்த் கேஜ்ரிவால் புதுடெல்லி தொகுதியில் முதல்வர் ஷீலா தீட்சித்தை தோற்கடித்தார். இதே போல் தற்போது லோக்சபா தேர்தலில் நரேந்திரமோடியை எதிர்த்து நிற்கவும் முடிவு செய்துள்ளதாக கூறப்படுகிறது.
ஆனால் வெறும் பரபரபுக்காகவும் ஊடக தலைப்புச் செய்திகளில் இடம்பிடிக்க வேண்டும் என்ற உள்நோக்கத்துடனும்தான் கேஜ்ரிவால் மோடியை எதிர்த்து போட்டியிட முடிவு செய்திருப்பதாக தகவல்கள் பரப்பப்படுகின்றன என்கின்றனர் அரசியல் பார்வையாளர்கள்.
மேலும் தமக்கு வேண்டியதை பெற்றுவிடுவதற்காக எப்படியாவது அழுது புரளும் ஒரு சிறு குழந்தையைப் போல எப்படியாவது ஊடக கவனம் பெறுவதற்காக கேஜ்ரிவால் இப்படி தகவலை பரப்பி வருவதாகவும் பாஜக தரப்பு சாடுகிறது.
கேஜ்ரிவாலைப் பொறுத்தவரை பரபரப்பு அரசியல் மூலம் ஊடக கவனத்தைப் பெறுவதில் எப்போதும் முனைப்பு காட்டுபவர். அன்னா ஹசாரேவுடன் கருத்து வேறுபாடு ஏற்பட்டு தனிக் கட்சி தொடங்கினார். பின்னர் டெல்லி முதல்வராக இருந்த ஷீலா தீட்சித்தை எதிர்த்து போட்டியிட்டார். அதைத் தொடர்ந்து முதல்வரான போது வீதியில் இறங்கிப் போராடினார். பின்னர் ஜன்லோக்பாலின் பெயரால் ராஜினாமாவும் செய்தார்.
இப்படியான பரபரப்பு நடவடிக்கைகள் மூலம் ஊடக தலைப்புச் செய்திகளில் தம்மை நிலைநிறுத்திக் கொள்வதன் மற்றொரு யுக்தியாகவே மோடிக்கு எதிராக கேஜ்ரிவால் போட்டியிடுவார் என்ற செய்திகளையும் பார்க்க வேண்டும் என்கின்றனர் மோடி ஆதரவாளர்கள்.
Click it and Unblock the Notifications
Sign in with Google