உ.பி பொருளாதாரத்தை வலுப்படுத்த முயற்சி! புதிய திட்டத்திற்கு ஒப்புதல் அளித்தார் யோகி ஆதித்யநாத்

லக்னோ: உத்தரப் பிரதேசம் ஒரு டிரில்லியன் டாலர் பொருளாதாரத்தை நோக்கி முன்னேறிக்கொண்டிருப்பதாக மாநில அரசு கூறி வரும் நிலையில், மாநிலத்தில் முதலீடுகளை மேற்கொள்ள வருபவர்களுக்கு உதவும் வகையில், 'உத்யமி மித்ரா யோஜனா' திட்டத்திற்கு முதலமைச்சர் யோகி ஆதித்யநாத் ஒப்புதல் அளித்திருக்கிறார்.

உத்தரப் பிரதேசத்தில் யோகி ஆதித்யநாத் தலைமையில் பாஜக ஆட்சி நடைபெற்று வருகிறது. இந்த மாநிலத்தில் இதற்கு முன்னர் யாரும் தொடர்ச்சியாக 6 ஆண்டுகள் முதலமைச்சராக நீடித்தது கிடையாது. ஆனால் இந்த சாதனையை கடந்த சட்டமன்ற தேர்தலில் யோகி ஆதித்யநாத் முறியடித்துள்ளார். மக்களின் இந்த ஆதரவை நாடாளுமன்ற தேர்தலுக்கும் நீடிக்க வேண்டும் என்பதற்காக ஏராளமான புதிய திட்டங்களை அவர் தொடர்ந்து அறிவித்து வருகிறார். இந்நிலையில் மாநிலம் முழுவதும் முதலீடுகளை விரிவுபடுத்த வழிவகுக்கும் உத்யமி மித்ரா யோஜனா திட்டத்திற்கு அவர் ஒப்புதல் அளித்திருக்கிறார்.

உத்தரப் பிரதேச மாநிலம் இந்தியாவில் அதிக மக்கள் தொகை கொண்ட மாநிலமாக இருக்கிறது. இந்நிலையில், மாநிலத்தின் பொருளாதாரத்தை ஒரு டிரில்லியனாக உயர்த்த வேண்டும் என்று யோகி ஆதித்யநாத் தலைமையிலான பாஜக அரசு தீவிரமாக முயன்று வருகிறது. இதற்காக பல்வேறு முயற்சிகள் மேற்கொள்ளப்பட்டுள்ளன. அதன் ஒரு பகுதியாக தற்போது உத்யமி மித்ரா யோஜனா திட்டம் தொடங்கப்பட்டுள்ளது. கடந்த சனிக்கிழமை நடைபெற்ற அமைச்சரவை கூட்டத்தில் இந்த திட்டத்திற்கு யோகி ஆதித்யநாத் ஒப்புதல் அளித்திருக்கிறார்.

இந்த திட்டத்தின்படி மாநிலத்தில் முதலீடு செய்ய வரும் உள்நாட்டு மற்றும் வெளிநாட்டு முதலீட்டாளர்களுக்கு உதவ உத்யமி மித்ராக்கள் நியமிக்கப்படுவார்கள். மொத்தமாக 105 பணியிடங்கள் இந்த திட்டத்திற்காக உருவாக்கப்படும். இதில் ஓராண்டுக்கு ஒப்பந்த அடிப்படையில் பணியாளர்கள் நியமிக்கப்படுவார்கள். இவர்களுக்கு மாதம் ரூ.70 ஆயிரம் வழங்கப்படும் என்றும் தெரிவிக்கப்பட்டுள்ளது. மாநிலத்தின் வளர்ச்சிக்கு இந்த திட்டம் பெரிய அளவில் பயன்படும் என்றும் அதிகாரிகள் கூறியுள்ளனர்.

English summary

As the state government claims that Uttar Pradesh is moving towards a trillion dollar economy, Chief Minister Yogi Adityanath has approved the 'Udyami Mitra Yojana' scheme to help investors in the state.