கொரில்லா போரில் திறமையான பலூசிஸ்தான் போராளிகள்.. பாகிஸ்தானை பந்தாட காத்திருக்கும் புரட்சி

By Oneindia Staff

Updated: Thursday, May 15, 2025, 18:51 [IST]

Subscribe to Oneindia Tamil

இஸ்லாமாபாத்: பாகிஸ்தானுக்கு எதிரான ஒரு வியூக எதிர் சக்தியாக இந்தியாவை பலூச் குழுக்கள் (Baloch groups) பார்க்கின்றன. பலூச் மக்களின் சுயநிர்ணய இயக்கத்தை வழிநடத்தும் கிளர்ச்சியாளர்கள், இந்த மாதம் நடந்த 'ஆபரேஷன் சிந்தூர்' ராணுவ நடவடிக்கையில் இந்தியா பாகிஸ்தானுக்கு எதிராக பெற்ற வெற்றியின் பின்னர் தங்களுக்குச் சாதகமான விஷயங்கள் நடக்கும் என நம்புவதாக தகவல்கள் வெளியாகியுள்ளன.

பலூசிஸ்தான் தெற்கு பாகிஸ்தானின் மேற்குப் பகுதியில் அமைந்துள்ள ஒரு பெரிய மாகாணம் ஆகும். இது ஈரான் மற்றும் ஆப்கானிஸ்தானுடன் எல்லையைப் பகிர்ந்து கொள்கிறது. இது பாகிஸ்தானின் பரப்பளவில் மிகப்பெரிய மாகாணமாக இருந்தாலும், மக்கள்தொகையில் மிகக் குறைவானது. பலூச் மக்கள் பல தலைமுறைகளாக இந்தப் பகுதியில் வாழ்ந்து வருகின்றனர்.

அவர்களின் முக்கியப் பிரச்சினை, பாகிஸ்தானால் தங்களின் நிலம் மற்றும் வளங்கள் (எரிவாயு, கனிமங்கள், குவாதர் போன்ற துறைமுகங்கள்) சுரண்டப்படுவதாகவும், அதன் பலன் உள்ளூர் மக்களுக்குக் கிடைக்கவில்லை என்றும் அவர்கள் உணர்கிறார்கள். வரலாற்று ரீதியாக, 1948 இல் பாகிஸ்தானுடன் இணைக்கப்பட்டதில் இருந்து அவர்கள் சுதந்திரம் அல்லது அதிக சுயாட்சியைக் கோரி வருகின்றனர்.

பாகிஸ்தான் பாதுகாப்புப் படைகளால் மனித உரிமைகள் மீறல்கள், கட்டாய காணாமல் போதல் மற்றும் சட்டவிரோத கொலைகள் நடப்பதாகவும் அவர்கள் குற்றம் சாட்டுகின்றனர். குறிப்பாக, சீனா பாகிஸ்தான் பொருளாதார வழித்தடம் (CPEC) திட்டங்கள் தங்கள் வளங்களை மேலும் சுரண்டுவதாகவும், தங்களை ஓரங்கட்டுவதாகவும் அவர்கள் கருதுகின்றனர். இதுவே பலூச் மக்களின் சுயநிர்ணய உரிமைப் போராட்டத்திற்கும், ஆயுதப் போராட்டத்திற்கும் முக்கியக் காரணமாகும்.

கொரில்லா போர் வீரர்கள்

பலூச் மக்கள் தங்களுக்கு நிகரற்ற கொரில்லாப் போர் நிபுணத்துவம் இருப்பதாகக் கூறுகின்றனர், இது பாகிஸ்தான் படைகளிடம் இல்லை என்று அவர்கள் நம்புகின்றனர். பலூச் விடுதலை ராணுவம் (பிஎல்ஏ) இந்தியாவின் ராஜதந்திர மற்றும் ராணுவ தளவாட ஆதரவைக் கோரியுள்ளது, பாகிஸ்தானின் அரச ஆதரவு பயங்கரவாதத்திற்கு எதிராகப் போராட தாங்கள் விரும்புவதாகவும் தகவல் வெளிப்படுத்தியுள்ளது. மிர் யார் பலூச் உட்பட பலூச் தலைவர்கள் பகிரங்கமாக பலூசிஸ்தான் சுதந்திரத்தை அறிவித்துள்ளனர்.

"இந்தியாவின் வெற்றி பாகிஸ்தான் மற்றும் சீனா ஆகிய இரு நாடுகளுக்கும் எதிரானது" என்று ஒரு பலூச் பிரதிநிதி தெரிவித்துள்ளது முக்கியமானதாக பார்க்கப்படுகிறது. "பாகிஸ்தானுக்கு பலூச் மக்களுடன் சண்டையிட தைரியமோ நம்பிக்கையோ இல்லை."

பாகிஸ்தானுக்கு கடும் நெருக்கடி

பாகிஸ்தான் தற்போது கடுமையான உள் நெருக்கடிகளை எதிர்கொள்கிறது, இதில் பொருளாதார சரிவு, அரசியல் ஸ்திரமின்மை மற்றும் தெஹ்ரீக்-இ-தாலிபான் பாகிஸ்தான் (டிடிபி), லஷ்கர்-இ-தைபா (எல்இடி) மற்றும் ஜெய்ஷ்-இ-முகமது (ஜேஇஎம்) போன்ற குழுக்களிடமிருந்து அச்சுறுத்தல்கள் அடங்கும். இது கைபர் பக்துன்க்வா மற்றும் சிந்து போன்ற மாகாணங்களில் கடுமையான பின்னடைவை ஏற்படுத்தியுள்ளது.

இந்தியா மீது நம்பிக்கை

"இந்தியாவின் அதிகரித்து வரும் ராணுவ சக்தி மற்றும் உலகளாவிய நிலைக்குப் பிறகு எங்களுக்கு இந்தியாவிடம் இருந்து நம்பிக்கைகள் உள்ளன" என்று ஒரு பலூச் தலைவர் ஊடகம் ஒன்றிடம் தெரிவித்தார். "சர்வதேச மனித உரிமைகள் சமூகம் மற்றும் பாகிஸ்தான் படைகளால் பலூசிஸ்தானில் நடைபெறும் மனித கடத்தல் மற்றும் கொலைகளுக்கு எதிராக எங்கள் குரலை எழுப்புவதற்கு இந்தியா உதவும் என நாங்கள் எதிர்பார்க்கிறோம்."

பலூச் மக்கள் தங்களுக்கு நிகரற்ற கொரில்லாப் போர் நிபுணத்துவம் இருப்பதாகக் கூறுகின்றனர், பிஎல்ஏ மற்றும் பலூச் ராஜி அஜோய் சங்கர் (பிஆர்ஏஎஸ்) பதுங்கியிருந்து தாக்குதல், மேம்படுத்தப்பட்ட வெடிபொருள் சாதனங்கள் (IED) தாக்குதல்கள் மற்றும் நாசவேலைகளில், குறிப்பாக ராணுவக் convoys மற்றும் CPEC உள்கட்டமைப்பிற்கு எதிராக நிபுணத்துவம் பெற்றவர்கள்.

"பாகிஸ்தான் ராணுவத்தின் கொடூரமான அடக்குமுறைக்குப் பிறகும் நாங்கள் உயிர் பிழைத்துள்ளோம்" என்று ஒரு பிஎல்ஏ போராளி பெருமை பொங்க தெரிவித்த காணொளி வெளியாகியுள்ளது. "2025ம் ஆண்டு மே மாதம் பலூசிஸ்தானில் 51 இடங்களில் 71 ஒருங்கிணைந்த தாக்குதல்களுடன் எங்கள் செயல்பாட்டுத் திறனை அதிகரித்துள்ளோம் என்று ஒரு போராளி ஊடகத்திற்கு அளித்த பேட்டி வைரலாகியுள்ளது.

தாக்குதல் நடத்தும் கிளர்ச்சியாளர்கள்

பாகிஸ்தான் ராணுவம் மற்றும் பாகிஸ்தான் பஞ்சாபி தலைவர்களால் சீனாவிற்கு விற்கப்பட்டுவிட்டோம் என்ற மனநிலையில் பலூசிஸ்தான் மக்கள் உள்ளனர். எனவே அவ்வப்போது கிளர்ச்சியில் ஈடுபடுகிறார்கள். இந்தக் குழுக்கள் ஓர்னாச் கிராஸ் உட்பட நெடுஞ்சாலைகளைக் கைப்பற்றியுள்ளன, ராணுவ சோதனைச் சாவடிகளை அழித்துள்ளன, மேலும் பலூச் கொடிகளை ஏற்றியுள்ளன. எரிவாயு குழாய்கள், கனிம போக்குவரத்து வாகனங்கள் மற்றும் சீன BRI மற்றும் CPEC திட்டங்கள் மீதும் அவர்கள் தாக்குதல் நடத்தியுள்ளனர்.

"குவாதர் துறைமுகம் போன்ற CPEC உள்கட்டமைப்புகள் மீதான எங்கள் தாக்குதல்கள் அமெரிக்கா போன்ற சீனாவிற்கு எதிரான நாடுகளை எங்கள் பக்கம் ஈர்க்கும் என நாங்கள் நம்புகிறோம்" என்று பிஎல்ஏ போராளி சொல்லி முடித்தபோது அருகில் உள்ளவர்கள் கை தட்டியதை பார்க்க முடிந்தது.