காலியான கொரோனா மருந்துகள்.. "வேற வழியே இல்லை".. இந்திய மருந்துகளை விரும்பி வாங்கும் சீன மக்கள்!

பெய்ஜிங்: சீனாவில் கொரோனா வைரஸ் காய்ச்சலுக்கான மருந்துகள் காலியாகிவிட்ட நிலையில், இந்திய தயாரிப்பு கொரோனா மருந்துகளை வாங்க அந்நாட்டு மக்கள் ஆர்வம் காட்டி வருகின்றனர்.

இதனிடையே, இந்திய கொரோனா மருந்துகளுக்கு சீனா அனுமதி கொடுக்காத நிலையில், கள்ளச்சந்தையில் இருந்து அந்த மருந்துகள் அதிகளவில் இறக்குமதி செய்யப்படுவதாக கூறப்படுகிறது.

இந்திய மருந்துகள் உடனடியாக காய்ச்சலை குறைப்பதால் நம் நாட்டு மருந்துகளுக்கு அங்கு கடும் கிராக்கி ஏற்பட்டுள்ளதாகவும் ஊடகங்களில் செய்திகள் வெளியாகியுள்ளன.

கொரோனா மருந்து தட்டுப்பாடு

சீனாவில் கொரோனா தொற்று பரவல் முன்னெப்போதும் இல்லாத வகையில் வேகம் எடுத்திருப்பதாக கூறப்படுகிறது. நாளொன்றுக்கு 10 லட்சத்துக்கும் மேற்பட்டோர் தொற்று பாதிப்புக்கு உள்ளாவதாகவும், 5 ஆயிரம் பேர் வரை உயிரிழப்பதாகவும் தகவல்கள் வெளியாகியுள்ளன. மேலும், சீன மருத்துவமனைகள் ஒருபுறம் நோயாகளாலும், மறுபுறம் கொரோனா தொற்றால் உயிரிழந்தவர்களின் சடலங்களாலும் நிரம்பி வருகின்றன. கடந்த 2 வாரங்களாக 24 மணிநேரமும் சீனாவில் உள்ள சுடுகாடுகள் சடலங்களை எரியூட்டி வருவதாக அமெரிக்க ஊடங்கள் படங்களுடன் செய்திகளை வெளியிட்டு வருகின்றன. இந்நிலையில், கொரோனா நோயாளிகளின் எண்ணிக்கை அதிகரிப்பதால், சீனாவில் அதற்கான மருந்துகள் தீர்ந்து போய்விட்டன.

நோயாளிகளுக்கு வெறும் இருமல் மருந்து

கொரோனா மருந்துகள் தீர்ந்துவிட்டதால், தற்போது சீனா முழுவதும் வைரஸ் காய்ச்சல் இருப்பவர்களுக்கு சாதாரண இருமல் மருந்துகள் மட்டுமே மருத்துவமனைகளில் வழங்கப்பட்டு வருகின்றன. இதுவும், அந்நாட்டில் கொரோனா உயிரிழப்பு அதிகரிப்பதற்கு முக்கிய காரணமாக கூறப்படுகிறது. மேலும், அமெரிக்காவிலும் கொரோனோ பரவல் அதிகரித்திருப்பதால், அந்நாடும் மற்ற நாடுகளுக்கு விநியோகித்து வந்த மருந்துகளை கணிசமாக நிறுத்திவிட்டது.

இந்திய மருந்துகளை விரும்பும் சீனர்கள்

சீனாவை பொறுத்தவரை, நடப்பாண்டில் ஃபைசர் நிறுவனத்தின் பாக்லோவிட், அஸ்வுடின் ஆகிய 2 மருந்துகளுக்கு மட்டுமே அனுமதி வழங்கப்பட்டிருக்கிறது. மற்ற எந்த நாட்டின் மருந்துகளுக்கும் அந்நாடு அனுமதி அளிக்கவில்லை. இந்நிலையில், தற்போது அங்கு இந்த 2 மருந்துகளும் தீர்ந்துவிட்டதால், இந்திய தயாரிப்பு மருந்துகளான பிரிமோவிர், பக்ஸிஸ்டா, மொல்நுவன்ட், மோல்நட்ரிஸ் ஆகியவற்றுக்கு அங்கு கடும் கிராக்கி ஏற்பட்டுள்ளது. இந்த மருந்துகள் உடனடியாக காய்ச்சல், தலைவலியை குறைத்துவிடுவதால் சீன மக்கள் இந்த மருந்துகளை வாங்க போட்டிப்போட்டு வருகிறார்கள்.

கள்ளச்சந்தை விற்பனை.. கடும் எச்சரிக்கை

இதனிடையே, மேற்குறிப்பிட்ட இந்திய தயாரிப்பு மருந்துகளுக்கு சீனாவில் அனுமதி இல்லாததால், அவை கள்ளச்சந்தைகளில் அதிக அளவில் சட்டவிரோதமாக இறக்குமதி செய்யப்படுவதாக 'சவுத் சைனா போஸ்ட்' பத்திரிகை தெரிவித்துள்ளது. கரோனா ஜெனரிக் தடுப்பு மருந்துஒரு பெட்டி 1,000 யுவானுக்கு(ரூ.11,870) விற்பனை செய்யப்படுகின்றன. இந்திய தயாரிப்பு மருந்துகளை எவ்வளவு பணம் கொடுத்து வேண்டுமானாலும் வாங்குவதற்கு, மக்கள் தயாராக உள்ளனர். இதனிடையே, இந்தியாவில் தயாரிக்கப்படும் கரோனா மருந்துகள் சீன அரசால் அங்கீகரிக்கப்படவில்லை என்றும், அவற்றை விற்பது தண்டனைக்குரிய குற்றமாகும் என்றும் சீனா அறிவித்துள்ளது.

English summary

As China has run out of drugs for corona virus fever, the people of that country are showing interest in buying Indian made corona drugs.