கென்யாவில் ஷாப்பிங் மாலில் 3வது நாளாக தொடரும் துப்பாக்கிச்சூடு: 68 பேர் பலி
நைரோபி: கென்யாவில் உள்ள ஷாப்பிங் மாலில் தீவிரவாதிகள் நடத்திய துப்பாக்கிச்சூட்டில் 68 பேர் பலியாகினர்.
கென்யா தலைநகர் நைரோபியில் உள்ள வெஸ்ட்கேட் ஷாப்பிங் மாலுக்குள் கடந்த சனிக்கிழமை நண்பகல் 12 மணிக்கு புகுந்த அல் ஷபாப் தீவிரவாதிகள் அங்கிருந்த முஸ்லீம்களை வெளியேறும்படி கூறிவிட்டது முஸ்லீம் அல்லாதவர்கள் மீது துப்பாக்கிச்சூடு நடத்தினர். இதில் 2 இந்தியர்கள், 2 பிரான்ஸ் நாட்டவர்கள், 2 கனடா நாட்டவர்கள், இங்கிலாந்தைச் சேர்ந்த 3 பேர், 1 சீனர் மற்றும் கானாவைச் சேர்ந்த ஒருவர் உள்பட 68 பேர் பலியாகினர்.
இறந்தவர்களில் பார்மா கம்பெனியில் பணிபுரிந்த இந்தியரான ஸ்ரீதர் நடராஜன்(40) மற்றும் நைரோபியில் உள்ள பேங்க் ஆஃப் பரோடா கிளை மேனேஜரின் மகன் பரம்ஷு ஜெயின்(8) ஆகியோரும் அடக்கம். மேலும் 2 பெண்கள், ஒரு சிறுமி உள்பட 4 இந்தியர்கள் காயம் அடைந்தனர்.
தீவிரவாதிகள் சிலரை பிணையக் கைதிகளாக மாலுக்குள் பிடித்து வைத்துள்ளனர். முகமூடி அணிந்த தீவிரவாதிகள் தொடர்ந்து மாலுக்குள் இருந்து வருகின்றனர். இந்நிலையில் இன்று புதிதாக துப்பாக்கிச்சூடு நடத்திய சத்தம் கேட்டுள்ளது. தொடர்ந்து 3வது நாளாக மாலுக்குள் தீவிரவாதிகள் இருந்து வருகின்றனர்.
இந்த தாக்குதலில் 175 பேர் காயம் அடைந்துள்ளனர். பிணையக் கைதிகள் அனைவரும் மீட்கப்பட்டுள்ளதாக கென்ய அரசு தெரிவித்துள்ளது. மேலும் கென்ய பாதுகாப்பு படையினர் அந்த கட்டிடத்தை சுற்றி வளைத்துள்ளனர். இது தவிர நாட்டின் முக்கிய நகரங்களில் பாதுகாப்பு பலப்படுத்தப்பட்டுள்ளது.
சோமாலியாவில் ஆப்பிரிக்க படைகள் இஸ்லாமிய தீவிரவாத அமைப்புகளுக்கு எதிராக போராடி வருகிறது. இதற்கு பழிவாங்கும் வகையில் தான் ஷாப்பிங் மாலை தாக்கியதாக அல் கொய்தாவுடன் தொடர்புடைய தீவிரவாத அமைப்பான அல் ஷபாப் தெரிவித்துள்ளது.
தாக்குதல் நடந்த மாலுக்கு பணக்கார கென்ய மக்களும், வெளிநாட்டவர்களும் அதிக அளவில் வருவார்கள் என்பது குறிப்பிடத்தக்கது. இந்த தாக்குதலுக்கு பிரதமர் மன்மோகன் சிங் கடும் கண்டனம் தெரிவித்துள்ளார்.
Click it and Unblock the Notifications
Sign in with Google