கென்யா தாக்குதலின் போது விலையுயர்ந்த பொருட்களைத் திருடிச் சென்ற ராணுவவீரர்கள்

நைரோபி: கென்யாவில் வணிக வளாகம் தீவிரவாதிகளின் தாக்குதலில் சிக்கிய போது, அங்கிருந்த கடைகளில் இருந்த விலையுயர்ந்த பொருட்களை பாதுகாப்புக்கு வந்த ராணுவத்தினரே கொள்ளையடித்து சென்றிருக்கலாம் என சந்தேகிக்கப் படுகிறது.

கென்யாவின் தலைநகரான நைரோபியில் இஸ்ரேல் நாட்டவர் ஒருவருக்குச் சொந்தமான வெஸ்ட்கேட் மால் என்ற வர்த்தக வளாகம் உள்ளது. பணக்காரர்கள் அதிகம் வந்துபோகும் இந்த வளாகத்தில் கடந்த வாரத்தில் ஷெபாப் தீவிரவாதிகள் அதிரடியாக உட்புகுந்து தாக்குதல் நடத்தினர்.

இதில், அப்பாவி பொதுமக்கள் 67 பேர் பரிதாபமாக பலியாயினர். அப்போது தீவிரவாதிகளை அழிக்க பாதுகாப்புப் படையினர் சம்பவ இடத்தில் குவிக்கப்பட்டனர். கிட்டத்தட்ட 5 நாட்களுக்குப் பிறகு, ஒருவழியாக தீவிரவாதிகள் சுட்டுக் கொல்லப் பட்டு வணிக வளாகம் ராணுவத்தினர கட்டுப்பாட்டிற்குள் கொண்டு வரப்பட்டது.

தாக்குதல் சம்பவம் நடைபெற்று கிட்டத்தட்ட 10 நாட்களுக்குப் பிறகு, தங்களது கடைகளுக்கு வந்த உரிமையாளர்கள் ஏராளமான பொருட்கள் கொள்ளையடிக்கப்பட்டிருப்பது கண்டு திடுக்கிட்டனர்.

தீவிரவாதிகள் சுடத் தொடங்கியதும் உயிருக்கு பயந்த கடைகளின் உரிமையாளர்கள் கடைகளை திறந்து போட்டுவிட்டு சென்றதால் அந்த வர்த்தக வளாகத்தில் உள்ள நகை கடைகள், செல்போன் கடைகள், விலை உயர்ந்த 'ரேடோ' வாட்ச் கடைகள், லேப் டாப் கடைகளில் இருந்த ஏராளமான பொருட்கள் கேட்பாரற்றுக் கிடந்துள்ளது.

அதனைத் தங்களுக்குச் சாதகமாகப் பயன் படுத்திக் கொண்ட ராணுவத்தினர் கல்லாவில் இருந்த பணம் உட்பட விலையுயர்ந்த பொருட்கள் பலவற்றை கொள்ளையடித்து இருப்பதாக சந்தேகிக்கப் படுகிறது.

அதேபோல், தாக்குதலில் பலியானவர்களின் உடலையும் சோதித்து அவர்களிடம் இருந்த விலையுயர்ந்த பொருட்களையும் ராணுவ வீரர்கள் அபகரித்துச் சென்றதாக சம்பவ இடத்தில் இருந்தவர்கள் குற்றச்சாட்டுத் தெரிவித்துள்ளனர்.

இதேபோன்று, கடந்த ஆகஸ்ட் மாதம் நைரோபி விமான நிலையத்தில் ஏற்பட்ட தீவிபத்தின் போதும் பாதுகாப்பு பணியில் ஈடுபட்ட ராணுவ வீரர்கள் அங்கிருந்த பொருட்களைத் திருடியது கண்காணிப்பு கேமராவில் பதிவாகியுள்ளதாக செய்திகள் வெளிவந்தது குறிப்பிடத்தக்கது.

English summary

Jewelry cases smashed. Mobile phones ripped from displays. Cash registers emptied. Alcohol stocks plundered. For the second time in two months, poorly paid Kenyan security forces that moved in to control an emergency are being accused of robbing the very property they were supposed to protect. First the troops were accused of looting during a huge fire in August at Nairobi’s main airport.