மாலத்தீவில் இன்று அதிபர் தேர்தல்.. முடிவுகளை உற்று நோக்கும் இந்தியா, சீனா! காரணம் இதுதான்
மாலத்தீவு: இந்திய பெருங்கடலில் இருக்கும் மாலத்தீவில் இன்று அதிபர் தேர்தல் நடைபெறுகிறது. இந்த தேர்தல் முடிவுகளை இந்தியாவும், சீனாவும் உற்று நோக்கி வருகின்றன.
ஏற்கெனவே இலங்கையில் சீனாவின் கை ஓங்கி வருகிறது. இப்படி இருக்கையில் மாலத்தீவிலும் தற்போதைய அதிபர் இப்ராஹிம் முகமது சோலிஹ் தோல்வியுற்றால் இந்திய பெருங்கடலில் இந்தியாவின் ஆதிக்கம் சரிவை காணும். எனவே வகையில் புவிசார் அரசியலில் மாலத்தீவு இந்தியாவுக்கு முக்கியமானதாக இருக்கிறது. மாலத்தீவுக்கும் இந்தியாவுக்கும் இடையேயான உறவை பலப்படுத்த, ஏராளமான அளவில் இந்தியா இங்கு முதலீடு செய்திருக்கிறது. ஆனால் சமீப காலமாக இந்தியாவுக்கு எதிரான முழக்கங்கள் இங்கு அதிகரித்துள்ளன.
இச்சூழலில்தான் மாலத்தீவில் கடந்த 9ம் தேதியன்று அதிபர் தேர்தல் நடைபெற்றது. 5.21 லட்சம் பேர் வசிக்கும் இந்த தீவில் மொத்தம் 2,25,486 வாக்காளர்கள் வாக்களித்தனர். இதில் தற்போதைய அதிபர் இப்ராஹிம் முகமது சோலிஹ் 39.05% வாக்குகளை பெற்றார். இவர் இந்தியா ஆதரவு நிலைப்பாட்டை கொண்டவராவார். பொருளாதாரம் மற்றும் ராணுவத் துறைகளில் இந்தியாவுக்கு முக்கியத்துவம் அளித்து செயல்பட்டு வருகிறார்.
ஆனால் இவருக்கு எதிராக களத்தில் இருக்கும் மாலத்தீவு முன்னேற்றக் கட்சியின் வேட்பாளர் முய்ஜு 46.05% வாக்குகளை பெற்றார். இருப்பினும் யாரும் 50 சதவிகித வாக்குகளை பெறவில்லை என்பதால் இன்று மறு தேர்தல் நடைபெறுகிறது. முய்ஜு சீனா ஆதரவை கொண்டிருக்கிறார். வளர்ச்சிக்கும், பொருளாதார நிலைத்தன்மைக்கும் சீனாவின் ஆதரவு அவசியம் என்று இவர் கருதுகிறார். இப்படி இருக்கையில் இன்று நடைபெறும் தேர்தலில் யார் அதிகம் வாக்குகளை பெறுகிறார்களோ அவர்களே வெற்றி பெற்றவர்களாக அறிவிக்கப்படுவார்கள்.
சர்வதேச அளவில் தற்போது சீனா மிகப்பெரிய பொருளாதார நாடாக வளர்ந்திருக்கிறது. அமெரிக்காவின் செல்வாக்கு வேகமாக சரிந்து வருகிறது. எனவே அமெரிக்கா, ஐரோப்பிய நாடுகளுடன் கைகோர்த்திருக்கிறது. இது உலக நாடுகளை அமெரிக்கா ஆதரவு, சீன ஆதரவு என இரண்டாக பிரித்திருக்கிறது. இதேதான் தற்போது மாலத்தீவிலும் எதிரொலித்திருக்கிறது. மேற்குறிப்பிட்டபடி இன்று நடைபெறும் தேர்தல் இந்திய பெருங்கடலில் இந்தியாவின் ஆதிக்கத்தை மேலும் விரிவாக்குமா? அல்லது தற்போது நிலையிலேயே நீடிக்கும் என்பதற்கு பதிலை கொடுக்கும் என்று சர்வதேச அரசியல் விமர்சகர்கள் கூறியுள்ளனர்.
Click it and Unblock the Notifications
Sign in with Google