திடீர் திருப்பம்! ரஷ்ய அதிபரை பேச்சுவார்த்தைக்கு அழைத்த உக்ரைன் அதிபர் ஜெலன்ஸ்கி.. சமாதான முயற்சியா?

Updated: Friday, February 25, 2022, 19:54 [IST]

Subscribe to Oneindia Tamil

கீவ்: உக்ரைன் மீதான ரஷ்யாவின் போர் 2ஆவது நாளாகத் தொடும் நிலையில், திடீர் திருப்பமாக ரஷ்ய அதிபர் புதினை உக்ரைன் அதிபர் ஜெலன்ஸ்கி பேச்சுவார்த்தைக்கு அழைத்துள்ளார்.

உக்ரைன் நாட்டின் மீது ரஷ்யா நேற்றைய தினம் ராணுவ நடவடிக்கையைத் தொடங்கியது. முதலில் வான்வழித் தாக்குதலையும் அதைத் தொடர்ந்து பீரங்கி உள்ளிட்ட ஆயுதங்கள் மூலமும் ரஷ்யா தனது தாக்குதலை நடத்தியது.

போரின் முதல் நாள் வெற்றிகரமாக இருந்ததாகக் குறிப்பிட்ட ரஷ்ய பாதுகாப்புத் துறை அமைச்சகம், முதல் நாளில் மட்டும் சுமார் 60க்கும் மேற்பட்ட ராணுவ தளங்களை அழித்ததாகத் தகவல் அறிவித்தது.

உக்ரைன் போர்

இந்நிலையில், இன்றைய தினம் போர் 2ஆவது நாளாகத் தொடர்கிறது. உக்ரைன் நாட்டின் பல்வேறு பகுதிகளிலும் ரஷ்யா தொடர்ந்து தாக்குதலை நடத்தி வருகிறது. உக்ரைனில் கைப்பற்றிய இடங்களில் உள்ள அரசு கட்டிடங்களில் ரஷ்யா தனது நாட்டுக் கொடியைப் பரக்கவிட்டுள்ளது. இதனிடையே உக்ரைன் தலைநகர் கீவ் நகரின் கிழக்குப் பகுதியில் இருந்து ரஷ்யா தாக்குதல் நடத்தி வருவதாகச் செய்தி வெளியாகி உள்ளது.

தலைநகர் கீவ்

உக்ரைன் தலைநகரைக் கைப்பற்றிவிட்டால், கிட்டதட்ட நாடே கட்டுப்பாட்டில் வந்ததைப் போலத் தான் என்பதால் விரைவாகத் தலைநகர் கீவ் நகரை நோக்கி ரஷ்ய ராணுவம் முன்னேறி வருகிறது. ரஷ்யாவின் இந்த ராணுவ நடவடிக்கைக்கு உலகின் பல்வேறு நாடுகளும் மிகக் கடுமையான எதிர்ப்பு தெரிவித்துள்ளன. மேலும், சீனா தொடங்கி உலகின் பல்வேறு நாடுகளும் உக்ரைன் உடன் ரஷ்யா பேச்சுவார்த்தை நடத்த வேண்டும் என வலியுறுத்தி இருந்தன.

பேச்சுவார்த்தைக்கு அழைப்பு

இதனிடையே உக்ரைன் ராணுவம் போரிடுவதை நிறுத்திய உடன் பேச்சுவார்த்தை நடத்தத் தயாராக உள்ளதாக ரஷ்ய வெளியுறவு அமைச்சர் செர்ஜி லாவ்ரோவ் அறிவித்து இருந்தார். உக்ரைன் நாட்டில் போர் தொடரும் நிலையில், ரஷ்ய அதிபர் புதினை உக்ரைன் அதிபர் ஜெலன்ஸ்கி பேச்சுவார்த்தைக்கு அழைத்துள்ளார். உக்ரைன் நாட்டில் 2ஆவது நாளாக இன்றும் போர் தொடரும் நிலையில், இந்த நடவடிக்கை முக்கியமானதாகப் பார்க்கப்படுகிறது.

அதிபர் வேதனை

முன்னதாக, ரஷ்யாவுக்கு எதிரான போரில் உக்ரைன் தனித்து விடப்பட்டதாக வேதனை தெரிவித்த உக்ரைன் அதிபர் ஜெலன்ஸ்கி, என்ன நடந்தாலும் தலைநகர் கீவ்-ஐ விட்டு வெளியேற மாட்டேன் எனத் திட்டவட்டமாகத் தெரிவித்திருந்தார். மேலும், ரஷ்யாவை எதிர்த்துப் போராட, போரில் அனுபவம் கொண்ட ஐரோப்பியர்களுக்கு உக்ரைன் அதிபர் ஜெலன்ஸ்கி அழைப்பு விடுத்திருந்தது குறிப்பிடத்தக்கது.