இனி ஹார்முஸ் முழுக்க ஈரானுக்கு தான்.. டிரம்பே சொல்லிட்டாராம்.. குத்தாட்டம் போடும் ஈரான் மக்கள்.. ஏன்?

Updated: Monday, June 15, 2026, 19:15 [IST]

Subscribe to Oneindia Tamil

அமெரிக்காவும் ஈரானும் இடையே எட்டப்பட்ட அமைதி ஒப்பந்தத்தின்படி, ஹார்முஸ் ஜலசந்தியை ஈரான் நாட்டின் முழு உரிமைக்கு நிரந்தரமாக ஒப்படைக்க ஒப்புக்கொள்ளப்பட்டுள்ளதாக ஈரான் தரப்பு தெரிவித்துள்ளது.

இதன் மூலம், அனைத்து வணிகக் கப்பல்களிடமும் ஈரான் "சேவை கட்டணம்" வசூலிக்கும் உரிமையைப் பெறும் என்று கூறப்படுகிறது. இந்த அறிவிப்பு, அமெரிக்க அதிபர் டொனால்ட் டிரம்பின் முந்தைய கூற்றுக்கு முரணாக உள்ளது. இதனால் அமைதி ஒப்பந்தத்தில் அடுத்தடுத்து குழப்பம் வெடித்து வருகிறது, இது உண்மையாகும் பட்சத்தில் டிரம்ப் எப்படி மொத்தமாக மாறினார் என்ற கேள்வியும் எழுந்துள்ளது.

ஹார்முஸ் ஜலசந்தியை ஈரான் கைப்பற்றியதா?

ஈரான் ஊடகங்களின் தகவலின்படி, அமெரிக்கா ஹார்முஸ் ஜலசந்தியை ஈரானின் முழு கட்டுப்பாட்டுக்குள் ஒப்படைக்க ஒப்புக்கொண்டுள்ளது. இதன் பிறகு, ஈரான் அங்கு செல்லும் அனைத்து வணிகக் கப்பல்களிடமும் கட்டணம் வசூலிக்கும். இந்த ஏற்பாடு, 60 நாட்கள் இலவச காலத்திற்குப் பிறகு அமலுக்கு வரும் என்று தெரிவிக்கப்பட்டுள்ளது. ஜூன் 19ஆம் தேதி சுவிட்சர்லாந்தின் ஜெனீவாவில் நடைபெறவுள்ள கையெழுத்து விழாவுக்குப் பிறகு, ஹார்முஸ் ஜலசந்தி திறக்கப்படும் என்று எதிர்பார்க்கப்படுகிறது.

சேவை கட்டணம் வசூல்

ஹார்முஸ் ஜலசந்தி வழியாக ஆண்டுக்கு சுமார் 30,000 கப்பல்களும், 7.6 பில்லியன் பேரல் எண்ணெயும் செல்கிறது. இந்த வர்த்தகத்தின் மீது ஈரான் கட்டணம் வசூலித்தால், ஆண்டுக்கு 10 பில்லியன் டாலருக்கும் அதிகமான வருவாய் கிடைக்கும் என்று மதிப்பிடப்படுகிறது. இது தவிர, ஈரானுக்கு 300 பில்லியன் டாலர் மறுசீரமைப்பு நிதியும் வழங்கப்படவுள்ளது. இந்த இரட்டை நன்மை, ஈரானுக்கு பெரிய பொருளாதார ஆதரவாக அமையும் என்று பார்க்கப்படுகிறது.

டிரம்பின் கருத்துக்கு முரண்பாடு

அமெரிக்க அதிபர் டொனால்ட் டிரம்ப், ஹார்முஸ் ஜலசந்தி "கட்டணமில்லாமல்" திறக்கப்படும் என்று முன்னர் அறிவித்திருந்தார். ஆனால், ஈரான் தரப்பின் புதிய அறிவிப்பு இந்தக் கூற்றுக்கு நேர்மாறாக உள்ளது. ஈரான் கட்டணம் வசூலிக்கும் உரிமையைப் பெறுவது, ஒப்பந்தத்தின் முக்கிய அம்சங்களில் ஒன்றாக மாறியுள்ளது. இது இரு நாடுகளுக்கும் இடையிலான ஒப்பந்த விவரங்களில் உள்ள முரண்பாடுகளை வெளிப்படுத்தியுள்ளது.

கையெழுத்து விழா தயாரிப்பு

அமெரிக்க துணை அதிபர் ஜே.டி. வான்ஸ், ஜெனீவாவில் நடைபெறவுள்ள அமைதி ஒப்பந்த கையெழுத்து விழாவின் திட்டங்கள் இறுதி செய்யப்பட்டு வருவதாகத் தெரிவித்துள்ளார். அவர் தானே கலந்து கொள்ள எதிர்பார்ப்பதாகவும், தேவைப்பட்டால் அதிபர் டிரம்ப் கலந்து கொள்ளலாம் என்றும் கூறியுள்ளார். இந்த ஒப்பந்தம் ஒரு முக்கிய சாதனை என்றும், ஈரான் ஒருபோதும் அணு ஆயுதம் பெறாது என்றும் அவர் நம்பிக்கை தெரிவித்துள்ளார். இருப்பினும், ஒப்பந்தத்தை செயல்படுத்துவதற்கு இன்னும் கணிசமான பணிகள் மீதமுள்ளதாக அவர் குறிப்பிட்டுள்ளார்.

இந்த அமைதி ஒப்பந்தம் மத்திய கிழக்கு பகுதியில் நிலையான அமைதியை ஏற்படுத்தும் என்று சிலர் நம்பினாலும், ஹார்முஸ் ஜலசந்தி தொடர்பான புதிய ஏற்பாடுகள் உலகளாவிய எண்ணெய் வர்த்தகத்தில் பெரிய மாற்றங்களை ஏற்படுத்தக்கூடும் என்று எதிர்பார்க்கப்படுகிறது. இந்த ஒப்பந்தத்தின் முழு விவரங்களும் கையெழுத்து விழாவுக்குப் பிறகு தெளிவாகத் தெரியும் என்று தெரிவிக்கப்பட்டுள்ளது.