ஓமிக்ரான் கொரோனா வைரஸை அப்படி எல்லாம் சாதாரணமாக நினைக்காதீங்க... உலக சுகாதார அமைப்பு வார்னிங்

Updated: Friday, January 7, 2022, 9:32 [IST]

Subscribe to Oneindia Tamil

ஜெனிவா: ஓமிக்ரான் எனும் உருமாறிய கொரோனா வைரஸ் மிகவும் ஆபத்தானது; ஓமிக்ரான் வைரஸை லேசானதாக நினைத்துவிடக் கூடாது என்று உலக சுகாதார அமைப்பு எச்சரித்துள்ளது.

உலக நாடுகளில் கொரோனா பரவல் மிக மிக அதிகமாக உள்ளது. டெல்டா வகை கொரோனா வைரஸைப் போல ஓமிக்ரான் எனும் உருமாறிய கொரோனா வைரஸ் பாதிப்புகள் அதிகமாக உள்ளது.

அமெரிக்கா, இங்கிலாந்து, பிரான்ஸ், இத்தாலி உள்ளிட்ட நாடுகளில் ஒருநாள் கொரோனா பாதிப்பு பல லட்சங்களை தாண்டியதாக பதிவாகி இருக்கிறது. அமெரிக்காவில் கொரோனா பாதிப்பு 100% அதிகரித்துள்ளது.

இந்தியாவிலும் அதிக பாதிப்பு

இந்தியாவிலும் ஒருநாள் கொரோனா வைரஸ் பாதிப்பு கிடுகிடுவென அதிகரித்து 1 லட்சத்தை கடந்துள்ளது. இந்தியாவில் ஓமிக்ரான் பாதிப்பும் அதிகரித்து வருகிறது. இந்தியாவில் மகாராஷ்டிரா மாநிலத்தில்தான் மிக அதிகமான கொரோனா வைரஸ் பாதிப்புகள் உறுதி செய்யப்பட்டுள்ளன. இதனால் இந்தியாவில் பல மாநிலங்களில் கொரோனா கால கட்டுப்பாடுகள், இரவு நேர ஊரடங்குகள் அமல்படுத்தப்பட்டிருக்கின்றன. இன்னொரு பக்கம் உலக நாடுகள் அனைத்தும் கொரோனா தடுப்பூசிகள், பூஸ்டர் தடுப்பூசிகள் போடுவதில் முன்னைவிட அதிகமாக முனைப்பு காட்டியும் வருகின்றன.

ஓமிக்ரான் பாதிப்பு

அதேநேரத்தில் ஓமிக்ரான் கொரோனா வைரஸ் குறித்து பல்வேறு கருத்துகள் முன்வைக்கப்பட்டு வருகின்றன. முந்தைய உருமாறிய கொரோனா வைரஸ்களை விட ஓமிக்ரான் வைரஸால் ஏற்படும் பாதிப்பு குறைவானது எனவும் கூறப்பட்டு வருகிறது.

உலக சுகாதார நிறுவனம் எச்சரிக்கை

ஆனால் உலக சுகாதார அமைப்பின் தலைவர் டெட்ரோஸ் அதானோம் இதனை நிராகரித்துள்ளார். இது தொடர்பாக டெட்ரோஸ் அதானோம் கூறியதாவது: டெல்டா வகை கொரோனா வைரஸை விட ஓமிக்ரான் வைரஸ் பாதிப்பு குறைவு என தோன்றலாம். கொரோனா தடுப்பூசி போட்டுக் கொண்டவர்களுக்கு அதிக பாதிப்பை ஏற்படுத்தாது என்கின்றனர். ஆனால் ஓமிக்ரான் வைரஸை அவ்வளவு எளிதாக பார்க்கக் கூடாது.

ஓமிக்ரான் பாதிப்பால் உயிரிழப்பு

இதர உருமாறிய கொரோனா வைரஸ் ஏற்படுத்திய அதே பாதிப்புகளையே ஓமிக்ரான் வைரஸும் உருவாக்குகிறது. ஓமிக்ரான் வைரஸ் பாதிப்பால் பொதுமக்கள் மருத்துவமனைகளில் அனுமதிக்கப்படுகின்றனர். ஓமிக்ரான் வைரஸ் பாதிப்பால் உயிரிழப்புகளும் ஏற்படுகின்றன. சுனாமி போல தாக்கும் ஓமிக்ரான் உள்ளிட்ட புதிய கொரோனா வைரஸ் பாதிப்புகள் உலக நாடுகளின் சுகாதார கட்டமைப்புகளில் கடுமையான பாதிப்பை ஓமிக்ரான் வைரஸும் ஏற்படுத்துகிறது. இவ்வாறு டெட்ரோஸ் அதானோம் தெரிவித்தார்.