6 மாதங்களில் எய்ம்ஸ் கட்டடப் பணிகள்.. விரைவில் வரைபடம் தயாரிப்பு.. அமைச்சர் மா.சுப்பிரமணியன்

Published: Tuesday, July 26, 2022, 20:28 [IST]

Subscribe to Oneindia Tamil

மதுரை: எய்ம்ஸ் மருத்துவமனைக்கான கட்டுமான பணிகள் 6 அல்லது 7 மாதங்களில் தொடங்கிவிடும் என்று சுகாதாரத்துறை அமைச்சர் மா.சுப்பிரமணியன் தெரிவித்துள்ளார்.

மா.சுப்பிரமணியன் பேட்டி

பின்னர் செய்தியாளர்களை சந்தித்து அமைச்சர் மா.சுப்பிரமணியன் கூறுகையில், தமிழகத்தில் தொடங்கப்பட்ட இன்னுயிர் காப்போம் திட்டத்தை இந்தியா முழுவதும் அமல்படுத்த மத்திய அரசு தமிழக சுகாதார துறையிடம் விவரங்களை சேகரித்துள்ளது. இன்னுயிர் காப்போம் திட்டத்தில் தமிழக அளவில் மதுரை ராஜாஜி அரசு மருத்துவமனை முதலிடத்தில் உள்ளது

இன்னுயிர் காப்போம் திட்டம்

தமிழகம் முழுவதும் இன்னுயிர் காப்போம் திட்டத்தின் மூலம் 96,807 பேர் சிகிச்சை பெற்றுள்ளனர். மதுரை அரசு மருத்துவமனையில் மட்டும் இதுவரை 3185 பேருக்கு சிகிச்சை அளிக்கப்பட்டுள்ளது. இன்னுயிர் காப்போம் திட்டத்திற்கு இதுவரை ரூ.87.34 கோடி செலவிடப்பட்டுள்ளது. மதுரை அரசு மருத்துவமனையில் ரூ. 1 கோடி ரூபாய் மதிப்பீட்டில் கட்டண படுக்கை மையம் அமைக்கபட உள்ளது. தமிழகத்தில் நாள்தோறும் 61 ஆயிரம் பேருக்கு தடுப்பூசி செலுத்தப்பட்டு வந்த நிலையில், தற்போது நாள்தோறும் லட்சக்கணக்கான மக்களுக்கு தடுப்பூசி செலுத்தப்பட்டு வருகிறது.

மதுரையில் குறைவு

தமிழகத்தில் இதுவரை முதல் தவணை தடுப்பூசி 95.95 சதவிகிதமும், இரண்டாம் தவணை தடுப்பூசி 88.52 சதவிகிதமும் செலுத்தப்பட்டுள்ளது. மதுரை மாவட்டத்தில் முதல் தவணை 86.20 சதவிகிதம் பேருக்கும், இரண்டாம் தவணை 75.02 சதவிகிதம் பேருக்கும் செலுத்தப்பட்டுள்ளது. தடுப்பூசி செலுத்தி கொள்வதில் மதுரை பின் தங்கிய நிலையில் உள்ளது. இதனால் தடுப்பூசி செலுத்திக் கொள்ள தீவிர நடவடிக்கைகள் மேற்கொள்ளப்பட்டு வருகிறது.

எய்ம்ஸ் எப்போது?

இதனைத்தொடர்ந்து வரும் ஆகஸ்ட் 7ம் தேதி 50 ஆயிரம் இடங்களில் தடுப்பூசி முகாம் நடைபெற உள்ளது. மதுரை எய்ம்ஸ் கட்டிட வடிமைப்பிற்கான டெண்டர் விடுவதற்கான பணிகள் நடைபெற்று வருகிறது. விரைவில் வரைபடம் தயாரித்து எய்ம்ஸ் அமையவுள்ள இடத்தில் காட்சிப்படுத்தப்பட உள்ளது. எய்ம்ஸ் கட்டுமான பணிகள் 6 அல்லது 7 மாதங்களில் தொடங்கிவிடும் என்று தெரிவித்தார்.

Published On July 26, 2022