மகாராஷ்டிராவில் 'செம்ம வேட்டை'.. பாதுகாப்பு படையினர் தாக்குதலில் 12 மாவோயிஸ்டுகள் பலி!

Updated: Thursday, July 18, 2024, 9:42 [IST]

Subscribe to Oneindia Tamil

மும்பை: மகாராஷ்டிரா மாநிலம் கட்ச்ரோலி பகுதியில் பாதுகாப்புப் படையினருடனான மோதலில் 12 மாவோயிஸ்டுகள் சுட்டுப் படுகொலை செய்யப்பட்டுள்ளனர். சத்தீஸ்கர் மாநிலத்தைத் தொடர்ந்து மகாராஷ்டிராவிலும் மாவோயிஸ்டுகளுக்கு எதிரான 'வேட்டை'யை பாதுகாப்புப் படையினர் தீவிரப்படுத்தி உள்ளனர்.

மாவோயிஸ்டுகள் (நக்சல்கள், நக்சலைட்டுகள்) 10 ஆண்டுகளுக்கு முன்னர் ஒடிஷா, சத்தீஸ்கர், ஜார்க்கண்ட், ஆந்திரா, மகாராஷ்டிரா, தெலுங்கானா, பீகார், மேற்கு வங்கம் என பல மாநிலங்களில் பழங்குடி மக்களைக் கேடயமாக பயன்படுத்தி ஆதிக்கம் செலுத்தினர். தற்போது மாவோயிஸ்டுகள் மிகவும் சொற்பமான எண்ணிக்கையில்தான் நடமாடுகின்றனர்.

தற்போதைய நிலையில் சத்தீஸ்கரில் தலைதூக்கிய மாவோயிஸ்டுகள் தொடர்ச்சியாக வேட்டையாடப்பட்டு அழித்தொழிக்கப்பட்டு வருகின்றனர். சத்தீஸ்கரில் மட்டும் கடந்த 7 மாதங்களில் 138 மாவோயிஸ்டுகள் அழிக்கப்பட்டனர். சத்தீஸ்கரில் மாவோயிஸ்டுகளுக்கு சவாலாக இருப்பது பஸ்தார் பிராந்திய பாதுகாப்புப் படைதான். பஸ்தார் மண்டல ஐஜியாக இருப்பவர் தமிழரான சுந்தரராஜ். இவரது தலைமையின் கீழ் மாவோயிஸ்டுகள் அழிக்கப்பட்டு வருகின்றனர்.

இந்த நிலையில் மகாராஷ்டிரா மாநிலம் கட்ச்ரோலி பகுதியில் மாவோயிஸ்டுகளைத் தேடும் நடவடிக்கையில் பாதுகாப்புப் படையினர் ஈடுபட்டிருந்தனர். அப்போது வனப்பகுதியில் பதுங்கி இருந்த மாவோயிஸ்டுகள், பாதுகாப்புப் படையினர் மீது திடீரெனத் தாக்குதல் நடத்தினர். இதற்கு பாதுகாப்புப் படையினர் தரப்பிலிருந்து கடுமையான பதிலடி தரப்பட்டது.

கட்ச்ரோலியில் பாதுகாப்புப் படையினருக்கும் மாவோயிஸ்டுகளுக்கும் இடையே சுமார் 6 மணிநேரத்துக்கும் மேலாக கடும் துப்பாக்கிச் சண்டை நடைபெற்றது. இந்த மோதலில் 12 மாவோயிஸ்டுகள் சுட்டு வீழ்த்தப்பட்டனர். இவர்களில் மாவோயிஸ்டுகளின் முக்கிய தளபதி மட்டும் அடையாளம் காணப்பட்டுள்ளார். எஞ்சிய 11 பேர் குறித்த அடையாளங்கள் வெளியாகவில்லை.

சுட்டு வீழ்த்தப்பட்ட மாவோயிஸ்டுகளிடம் இருந்து அதிநவீன துப்பாக்கிகள் பறிமுதல் செய்யப்பட்டன. 3 ஏகே 47 ரக துப்பாக்கிகள், எறிகுழல்கள் உள்ளிட்ட 12 அதிநவீன ஆயுதங்கள் மாவோயிஸ்டுகளிடமிருந்து கைப்பற்றப்பட்டன. பாதுகாப்புப் படையினர் தரப்பில் சிலர் படுகாயமடைந்துள்ளனர். படுகாயமடைந்த வீரர்களுக்கு தீவிர சிகிச்சை அளிக்கப்பட்டு வருகிறது.