மகாராஷ்டிராவில் உச்சகட்ட குழப்பம்- அடுத்தது என்ன? ஜனாதிபதி ஆட்சி? பட்னாவிஸ் தலைமையில் பாஜக அரசு?

மும்பை: மகாராஷ்டிராவில் உச்சகட்ட அரசியல் குழப்பம் உருவாகி உள்ள நிலையில் அடுத்ததாக ஜனாதிபதி ஆட்சியை அமல்படுத்த பாஜக வலியுறுத்தக் கூடும்; அதேநேரத்தில் தேவேந்திர பட்னாவிஸ் தலைமையில் பாஜக புதிய அரசு அமைக்கும் நடவடிக்கைகளை தீவிரப்படுத்தும் என கூறப்படுகிறது.

மகாராஷ்டிராவில் சிவசேனா- தேசியவாத காங்கிரஸ்- காங்கிரஸ் கூட்டணி ஆட்சி நடைபெற்று வருகிறது. ஆளும் சிவசேனா கட்சியில் முதல்வர் உத்தவ் தாக்கரேவுக்கு எதிராக அமைச்சர் ஏக்நாத் ஷிண்டே தலைமையில் எம்.எல்.ஏக்கள் போர்க்கொடி தூக்கி உள்ளனர். தற்போதைய நிலையில் ஏக்நாத் ஷிண்டேவுடன் 13 எம்.எல்.ஏக்கள் கை கோர்த்திருப்பது உறுதியாகி உள்ளது. மேலும் பல எம்.எல்.ஏக்கள் ஏக்நாத் ஷிண்டே பக்கம் சாயக் கூடும் எனவும் தகவல்கள் தெரிவிக்கின்றன.

முதல்வர் உத்தவ் தாக்கரேவுக்கு எதிரான சிவசேனா மற்றும் ஆதரவு தந்த சிறிய கட்சி, சுயேட்சை எம்.எல்.ஏக்கள் மொத்தம் 26 பேர் பாஜக ஆளும் குஜராத்தின் சூரத் நகரில் ரிசார்ட் ஒன்றில் தங்க வைக்கப்பட்டுள்ளனர். கலகக் குரல் எழுப்பியுள்ள ஏக்நாத் ஷிண்டே, தேசியவாத காங்கிரஸ்-காங்கிரஸ் கூட்டணியை முறித்துக் கொண்டு பாஜகவுடன் இணைந்து ஆட்சி அமைக்க வேண்டும் என்கிற நிபந்தனையை முன்வைக்க வாய்ப்பிருக்கிறது என்பது அரசியல் பார்வையாளர்கள் கருத்து.

மகாராஷ்டிரா சட்டசபையில் பாஜக- 106; சிவசேனா 55; தேசியவாத காங்கிரஸ்-51; காங்கிரஸ் 44; இதர கட்சிகள், சுயேட்சைகள்- 29. இம்மாநிலத்தில் பெரும்பான்மைக்கு தேவை மொத்தம் 145 எம்.எல்.ஏக்கள். சிவசேனா தரப்பில் இருந்து 13, இதர கட்சிகள், சுயேட்சைகள் 13 என மொத்தம் 26 பேர் இப்போது பாஜக ஆதரவு நிலையில் உள்ளனர். பாஜகவுக்கு மேலும் 10 முதல் 15 எம்.எல்.ஏக்கள் தேவைப்படுகிறது. இன்னொரு பக்கம் ஏக்நாத் ஷிண்டே, கட்சி தாவல் தடை சட்டத்தின் கீழ் தகுதி நீக்கம் செய்யப்படுவதைத் தவிர்க்க தமது பக்கம் 37 சிவசேனா எம்.எல்.ஏக்களை இழுக்க வேண்டும்.

இப்படியான நிலையில் மகாராஷ்டிராவில் உடனடியாக ஜனாதிபதி ஆட்சியை அமல்படுத்த வேண்டும் என்கிற கோரிக்கையை பாஜக வலியுறுத்துவதில் தீவிரமாக உள்ளது. இது தொடர்பாக கருத்து தெரிவித்த பாஜக எம்.எல்.ஏ. சிவேந்திரராஜி போஷ்லே, மகாராஷ்டிராவில் பட்னாவிஸ் தலைமையிலான பாஜக அரசு விரைவில் அமையும் என நம்பிக்கை தெரிவித்துள்ளார்.

English summary

Sources said that BJP likely to push for President Rule in Maharashtra due to the Political Crisis.