மும்பையில் 5 டோல்கேட்களில் இனி கட்டணமே கிடையாது.. வாகன ஓட்டிகளுக்கு மெகா ஆஃபர் கொடுத்த மகாராஷ்டிரா
மும்பை: மும்பையின் நுழைவு பகுதிகளில் உள்ள 5 சுங்க சாவடிகளில் இலகு ரக வாகனங்களுக்கு கட்டணம் கிடையாது என்று மகாராஷ்டிரா முதல்வர் ஏக்நாத் ஷிண்டே அறிவித்துள்ளார். விரைவில் சட்டமன்ற தேர்தல் நடைபெற உள்ள நிலையில், இன்று நடைபெற்ற கேபினட் கூட்டத்தில் இந்த முடிவு எடுக்கப்பட்டுள்ளது.
மகாராஷ்டிரா மாநிலத்தில் விரைவில் சட்டமன்ற தேர்தல் நடைபெற உள்ளது. வாக்குப்பதிவு நடைபெறும் தேதியை தேர்தல் ஆணையம் எப்போது வேண்டுமானாலும் அறிவிக்கலாம் என்று எதிர்பார்க்கப்படுகிறது. தேர்தல் விரைவில் நடைபெற உள்ள நிலையில், பல கவர்ச்சிகர திட்டங்களை தற்போதே மகாராஷ்டிரா அரசு அறிவித்து வருகிறது.
அந்த வகையில் தற்போது, மும்பை நகருக்குள் உள் நுழையும் சாலைகளில் அமைந்து இருக்கும் அனைத்து இலகு ரக வாகனங்களுக்கும் சுங்க கட்டணம் செலுத்துவதில் இருந்து விலக்கு அளிக்கப்படுவதாக மகாராஷ்டிரா அரசு அறிவித்துள்ளது. மும்பையில் இன்று நடைபெற்ற கேபினட் கூடத்தில் இதற்கான அறிவிப்பு வெளியாகியுள்ளது. சுங்க கட்டணம் விலக்கு அளிக்கபடும் 5 சுங்கச்சாவடிகளிலும் மகாராஷ்டிரா மாநில போக்குவரத்து கழகத்தால் (MSRDC) நிர்வகிக்கப்படுகிறது.
இந்த சுங்கச் சாவடிகளில் கட்டணம் வசூலிக்கும் பணி தனியார் நிறுவனத்திற்கு ஒப்பந்தம் விடப்பட்டு இருந்தது. இந்த ஒப்பந்தம் 2026 வரை உள்ள நிலையில், மகாராஷ்டிரா அரசு மேற்கூறிய அறிவிப்பை வெளியிட்டுள்ளது. இந்த சுங்கச் சாவடிகள் மும்பையின் முல்லுண்டு, தஷியார் மற்றும் மன்குர்த் ஆகிய இடங்களில் உள்ளன. 288 தொகுதிகளை கொண்ட மகாராஷ்டிரா சட்டமன்றத்தின் பதவிக்காலம் இந்த ஆண்டுடன் நிறைவு பெறுகிறது.
எனவே அதற்குள் அங்கு தேர்தல் நடத்த வேண்டியது அவசியம் என்பதால் எப்போது வெண்டுமானாலும் தேர்தல் அறிவிப்பு வெளியிடப்படும் என எதிர்பார்க்கப்படுகிறது. மகாராஷ்டிராவில் தற்போது சிவசேனா ( ஷிண்டே), பாஜக, அஜித்பவாரின் தேசியவாத காங்கிரஸ் ஆகியவை கூட்டணி ஆட்சி நடைபெற்றது. வரும் தேர்தலிலும் இந்தக் கட்சிகள் கூட்டணி அமைத்து போட்டியிட ஆயத்தமாகி வருகின்றன.
மறுபக்கம் உத்தவ் தாக்கரேவின் சிவசேனா , சரத்பவாரின் தேசியவாத காங்கிரஸ், காங்கிரஸ் ஆகிய கட்சிகள் கூட்டணி அமைத்து போட்டியிடுகின்றன. பாஜக கூட்டணியை வீழ்த்தி ஆட்சியை பிடிக்க எதிர்க்கட்சிகளின் மகா விகாஸ் கூட்டணியும், ஆட்சியை தக்க வைக்க பாஜகவும் வியூகம் வகுத்து வருகின்றன.
Click it and Unblock the Notifications
Sign in with Google