இனி அமெரிக்க டாலருக்கு அழிவு காலம்! அடித்து ஆடிய இந்தியா.. பிரிக்ஸ் நாடுகளை வைத்து.. மோடி ஆடும் கேம்

Updated: Wednesday, August 27, 2025, 10:39 [IST]

Subscribe to Oneindia Tamil

நியூயார்க்: BRICS நாடுகளுடனான வர்த்தகத்தை 100% இந்திய ரூபாயில் மேற்கொள்வதற்கான பணிகளை நேற்று முதல் இந்தியா தொடங்கி உள்ளதாக தகவல் வெளியாகி உள்ளது.

அமெரிக்காவின் இந்த 50% வரிவிதிப்பு, இன்று (ஆகஸ்ட் 27, 2025) இந்திய நேரப்படி காலை 9:31 மணிக்கு அமலுக்கு வருகிறது. இது ஏற்கனவே அறிவிக்கப்பட்ட 25% வரியுடன் கூடுதலாக 25% சேர்க்கப்பட்டுள்ளது. ரஷ்யாவுடன் பொருளாதாரத் தொடர்பு வைத்துள்ள நாடுகள் மீது அமெரிக்க அதிபர் டொனால்ட் டிரம்ப் மேற்கொண்டு வரும் வரிவிதிப்பு நடவடிக்கையின் உச்சமாக இது பார்க்கப்படுகிறது. இந்தியாவின் இந்த புதிய வரிவிதிப்பை, இந்தியா கடுமையாக விமர்சித்துள்ளது.

அமெரிக்காவின் 50% வரிவிதிப்பு

இப்படிப்பட்ட நிலையில் உலகளாவிய வர்த்தகத்தில் அமெரிக்க டாலரின் ஆதிக்கத்தைக் குறைக்கும் நோக்கில், இந்தியா BRICS நாடுகளுடன் முழுமையாக இந்திய ரூபாயில் வர்த்தகம் செய்யத் தொடங்கியுள்ளது. இது தொடர்பான அதிகாரப்பூர்வ சுற்றறிக்கையையும் இந்தியா வெளியிட்டுள்ளது.

இந்தியா தற்போது அமெரிக்காவுடன் பனிப்போர் சூழலில் இருக்கும் நிலையில், இத்தகைய நடவடிக்கை உலகச் சந்தைகளில் டாலரின் மேலாதிக்கத்தைக் கணிசமாகக் குறைக்கும் என பொருளாதார வல்லுநர்கள் கருத்து தெரிவிக்கின்றனர். இது அமெரிக்காவிற்கு மேலும் அழுத்தம் கொடுக்கும் செயலாகவே பார்க்கப்படுகிறது.

BRICS நாடுகளுடனான வர்த்தகம்

முன்னதாக, ரிசர்வ் வங்கி (RBI) வெளியிட்ட புதிய அறிவிப்பின்படி, வோஸ்ட்ரோ கணக்குகளைத் திறக்க வங்கிகளுக்கு முன்அனுமதி தேவையில்லை. இனி, வெளிநாட்டு ஏற்றுமதியாளர்களும் இறக்குமதியாளர்களும் இந்திய ரூபாயைப் பயன்படுத்தி சிறப்பு வோஸ்ட்ரோ கணக்குகள் மூலம் வர்த்தக செட்டில்மென்டுகளை மேற்கொள்ளலாம்.

இதன் மூலம், வெளிநாட்டு நிறுவனங்கள் இந்தியாவிலிருந்து பொருட்களை வாங்கவோ அல்லது விற்கவோ தங்கள் நாணயத்தை அமெரிக்க டாலராக மாற்ற வேண்டிய அவசியமில்லை. அவர்கள் நேரடியாக தங்கள் வோஸ்ட்ரோ கணக்கில் உள்ள இந்திய ரூபாயைப் பயன்படுத்தலாம். இது வர்த்தகச் செயல்பாடுகளை எளிதாக்குகிறது.

டாலருக்கு மாற்று

முன்னாள் அமெரிக்க அதிபர் டொனால்ட் டிரம்ப் இந்தியப் பொருட்களின் மீது 50% வரி விதித்ததற்குப் பிறகு இந்த கொள்கை அறிவிக்கப்பட்டது. இந்திய ரூபாயை வலுப்படுத்தும் இம்முயற்சி, அமெரிக்க வர்த்தகக் கொள்கைகளுக்கு பிரதமர் நரேந்திர மோடி அரசின் நேரடிப் பதிலடியாகவே பார்க்கப்படுகிறது.

BRICS நாடுகளுடன் மட்டுமல்லாமல், இந்திய ரூபாயில் நேரடியாகப் பணம் செலுத்தும் வாய்ப்பை வழங்கும் சுற்றறிக்கையை இந்தியா பல நாடுகளுக்கும் அனுப்பி உள்ளது. இது இந்தியாவின் சர்வதேச வர்த்தக நிலையில் முக்கிய பங்காற்றுவதோடு, உலகச் சந்தைகளில் டாலரின் ஆதிக்கத்தைக் குறைக்கும் என எதிர்பார்க்கப்படுகிறது.

இந்தியா பிரிக்ஸ் டாலர் - வோஸ்ட்ரோ கணக்குகள்

வோஸ்ட்ரோ கணக்குகள் மூலம் வெளிநாட்டிலிருந்து அதிக ரூபாய் வரத்து கிடைக்கும் என மத்திய வங்கி நம்புகிறது. இது உள்நாட்டு அந்நிய செலாவணி விகிதத்தை வலுப்படுத்தும். மேலும், பணமாற்றச் செலவுகளைக் குறைக்கும் என்றும், இச்செலவுகள் நேரடியாக அந்நிய செலாவணி சந்தையால் தீர்மானிக்கப்படும் என்றும் ரிசர்வ் வங்கி தெரிவித்துள்ளது.

இந்த ஏற்பாடு, உலகச் சந்தைகளில் பயன்படுத்தப்படும் 'கோர்ரெஸ்போண்டென்ட் பேங்கிங்' வழிமுறைகளைப் போன்றது என ரிசர்வ் வங்கி விளக்கியுள்ளது. இது BRICS நாடுகளுக்கு வர்த்தகத்தில் பயனளிக்கும் என்றும், டிரம்ப் காலத் தடைகளின் தாக்கத்தைத் தவிர்க்க உதவும் என்றும் எதிர்பார்க்கப்படுகிறது. இருப்பினும், இத்திட்டத்தில் இணைவதற்கு முன் 'உங்கள் வாடிக்கையாளரை அறிந்து கொள்ளுங்கள்' (KYC) விதிமுறைகள் கட்டாயம் பின்பற்றப்பட வேண்டும்.

இந்தியா ரூபாயை அமெரிக்க டாலருக்கு போட்டியாகப் பயன்படுத்தும் நிலையில், மற்ற BRICS உறுப்பு நாடுகளும் சர்வதேச வர்த்தகத்தில் தங்கள் உள்ளூர் நாணயங்களின் பயன்பாட்டை ஊக்குவிக்கத் தொடங்கியுள்ளன.