தலையே வெடிக்கும் சத்தம்.. வெனிசுலா உள்ளே அமெரிக்கா பயன்படுத்திய.. சோனிக் ஆயுதம்.. உலக நாடுகள் ஷாக்

நியூயார்க்: வெனிசுலா அதிபர் நிகோலஸ் மதுரோவைக் கைப்பற்றியபோது, அமெரிக்கா சக்திவாய்ந்த Sonic ஒலி ஆயுதத்தைப் பயன்படுத்தி, வெனிசுலா படையினருக்கு மூக்கிலிருந்து ரத்தம் வடிதல் மற்றும் ரத்தம் கக்குதல் போன்ற பாதிப்புகளை ஏற்படுத்தியதாக தகவல்கள் வெளியாகியுள்ளன. இந்த அதிர்ச்சித் தகவலை, பத்திரிகைச் செயலாளர் கரோலின் லீவிட், ஊடகங்களில் பகிர்ந்திருந்தார்.

சனிக்கிழமை காலை, லீவிட் தனது 'எக்ஸ்' தளத்தில் வெனிசுலா நாட்டின் பாதுகாப்பு ஊழியருடனான நேர்காணலைப் பகிர்ந்தார். போதைப்பொருள் கடத்தல் குற்றச்சாட்டுகளின் கீழ் மதுரோவைப் பிடிக்க அமெரிக்கா வெனிசுலாவில் தாக்குதல் நடத்திய இரவு, தான் பணியில் இருந்ததாக அந்த ஊழியர் கூறினார்.

அந்த நேர்காணலில், பாதுகாப்பு ஊழியர் அமெரிக்காவின் அந்த மர்மமான ஆயுதத்தின் திகிலூட்டும் திறன்களை வெளிப்படுத்தினார். அது மிகவும் தீவிரமான ஒலி அலை என்றும், வெனிசுலாப் படைகளைச் செயலிழக்கச் செய்தது என்றும் விவரித்தார். வெனிசுலா படையினருக்கு மூக்கிலிருந்து ரத்தம் வடிதல் மற்றும் ரத்தம் கக்குதல் போன்ற பாதிப்புகளை ஏற்படுத்தியது, என்று கூறினார்.

Rebuild California அமைப்பின் துணைத் தலைவரான மைக் நெட்டர், வெள்ளிக்கிழமை அன்று 'எக்ஸ்' தளத்தில் முதன்முதலில் இந்தத் தகவலைப் பகிர்ந்தார். ஒரே நாளில் 1.5 கோடிக்கும் அதிகமான பார்வைகளைப் பெற்ற அந்தப் பதிவில், ஒலி ஆயுதத்தின் பயன்பாடு மிகவும் மோசமானது. அமெரிக்கா எதோ வலிமையான ஒலி ஆயுதம் ஒன்றை உருவாக்கி உள்ளது. அதில் எதோ தவறு உள்ளது என்று தெரிவித்தார்.

தலை வெடிக்கும் உணர்வு

பாதுகாப்பு ஊழியர் தன் அனுபவத்தைக் கூறுகையில், "திடீரென என் தலை உள்ளிருந்து வெடித்துச் சிதறுவது போல உணர்ந்தேன். எங்கள் அனைவருக்கும் மூக்கிலிருந்து ரத்தம் வரத் தொடங்கியது. சிலர் ரத்தம் கக்கினர். நகர முடியாமல் தரையில் விழுந்தோம். அந்த ஒலி ஆயுதம் அல்லது அது எதுவாக இருந்தாலும், அதன்பிறகு எங்களால் நிற்கக்கூட முடியவில்லை" எனக் குறிப்பிட்டுள்ளார்.

வெனிசுலா அதிபர் நிகோலஸ் மதுரோவை அமெரிக்கா ஜனவரி 3 அன்று கைப்பற்றியது. இந்தத் தாக்குதல் சம்பவத்தின்போது, மதுரோவைப் பிடிப்பதற்கு முன், "எங்கள் ராடார் அமைப்புகள் அனைத்தும் எந்த விளக்கமும் இல்லாமல் செயலிழந்தன" என்று பாதுகாப்பு ஊழியர் கூறியுள்ளார். அதன் பிறகு எட்டு ஹெலிகாப்டர்கள் அப்பகுதிக்கு வந்து, சுமார் 20 வீரர்கள் கீழே இறங்கினர். "இதுவரை நாங்கள் எதிர்த்துப் போராடிய எந்தப் படையினரைப் போலவும் அவர்கள் இல்லை" என்று அந்த ஊழியர் மேலும் தெரிவித்தார்.

சரிபார்க்கப்படாத இந்தத் தகவலின்படி, அந்த 20 அமெரிக்க வீரர்கள் "நூற்றுக்கணக்கானோரைக் கொன்றனர்". இந்த நடவடிக்கை ஆகஸ்ட் மாதம் முதல் திட்டமிடப்பட்டு வந்ததாக, முன்னாள் அதிபர் டொனால்ட் டிரம்ப் கூறினார்.

வெள்ளை மாளிகை அதிகாரிகள் மதுரோவையும் அவரது மனைவியையும் கைப்பற்ற கடந்த மாதம் முடிவு செய்திருந்தனர். ஆனால், தாக்குதலைத் தொடங்குவதற்கு உகந்த வானிலைக்காகக் காத்திருந்து, ஜனவரி 3 அன்று தங்கள் திட்டத்தை நிறைவேற்றினர். வெனிசுலாவில் களத்தில் இருந்த சிஐஏ உளவாளிகள், மதுரோ மற்றும் ஃப்ளோரஸ் ஆகியோரின் நடமாட்டத்தைக் கண்காணித்து வந்தனர். பாதுகாப்பைப் பெரிதும் கருதும் அந்த ஜோடி, பிடிபடுவதைத் தவிர்க்க ஒவ்வொரு இரவும் வெவ்வேறு இடங்களில் தூங்கியுள்ளது.

அமெரிக்க ராணுவத்தின் மிகவும் உயரடுக்கு பிரிவான டெல்டா ஃபோர்ஸ் வீரர்கள், இராணுவ விமானங்களின் ஆதரவுடன், ஹெலிகாப்டர்கள் மூலம் அட்லாண்டிக் கடலைக் கடந்து வெனிசுலா வான்வெளிக்குள் தாழ்வாகப் பறந்துசென்றனர். நாட்டின் எல்லைக்குள் நுழைந்ததும், அமெரிக்க விமானங்களும் டிரோன்களும் வெனிசுலாவின் விமான எதிர்ப்புத் தற்காப்பை அழித்து, மின் இணைப்புகளையும் துண்டித்தன.

சனிக்கிழமை அதிகாலை 1:01 மணிக்கு (கிழக்கு நேரம்), டெல்டா ஃபோர்ஸ் வீரர்கள் மதுரோவின் வளாகத்திற்குள் நுழைந்தனர். மதுரோ ஒரு உலோகப் பாதுகாப்பு அறைக்குள் தப்பிச் செல்ல முயன்றார், ஆனால் அவர் உள்ளே நுழைவதற்கு முன்பே பிடிக்கப்பட்டார் என்று டிரம்ப் தெரிவித்தார். மதுரோவும் அவரது மனைவி ஃப்ளோரஸும் பின்னர் ஹெலிகாப்டர் மூலம் USS இவோ ஜிமா போர்க்கப்பலுக்குக் கொண்டு செல்லப்பட்டனர். அங்கு அதிகாலை 3:29 மணிக்கு (கிழக்கு நேரம்) தரையிறங்கினர்.

இந்தக் கைப்பற்றும் நடவடிக்கையின்போது, 80 இராணுவ வீரர்களும் பொதுமக்களும் கொல்லப்பட்டதாக வெனிசுலா அதிகாரிகள் தெரிவித்தனர். அமெரிக்கப் படை வீரர் ஒருவர் பதில் தாக்குதலில் காயமடைந்தார், ஆனால் அமெரிக்க தரப்பில் உயிரிழப்புகள் எதுவும் இல்லை. அதிபர் மதுரோ நியூயார்க் நகரத்திற்குக் கொண்டு செல்லப்பட்டு, மத்திய குற்றச்சாட்டுகளின் கீழ் புரூக்ளின் சிறையில் அடைக்கப்பட்டுள்ளார்.

English summary

USA used Sonic boom type arms against Venezuela force before the attack