ரெடியான பீகார்.. சட்டசபை தேர்தல் எப்போது? இந்தியாவின் தலைமை தேர்தல் ஆணையர் சொன்ன தகவல்

பாட்னா: பீகார் சட்டசபை தேர்தல் நவம்பர் 22ம் தேதிக்குள் நடத்தப்படும் என்று இந்திய தேர்தல் ஆணையத்தின் தலைமை தேர்தல் ஆணையர் ஞானேஷ் குமார் அறிவித்துள்ளார்.

பீகாரில் பாஜக மற்றும் ஐக்கிய ஜனதாதளம் கட்சியின் கூட்டணி ஆட்சி நடக்கிறது. ஐக்கிய ஜனதாதளம் கட்சியின் தலைவர் நிதிஷ் குமார் முதல்வராக செயல்பட்டு வருகிறார். இந்நிலையில் தான் பீகாரில் விரைவில் சட்டசபை தேர்தல் நடைபெற உள்ளது.

இதையடுத்து இந்திய தேர்தல் ஆணையத்தை சேர்ந்தவர்கள் பீகாரில் ஆய்வு மேற்கொண்டனர். இந்த ஆய்வை தொடர்ந்து பீகார் தலைநகர் பாட்னாவில் இன்று இந்திய தேர்தல் ஆணையத்தின் தலைமை தேர்தல் ஆணையர் ஞானேஷ் குமார் பத்திரிகையாளர்களை சந்தித்தார். அப்போது அவர் கூறியதாவது:

பீகாரில் மொத்தம் 243 சட்டசபை தொகதிகள் உள்ளன. இதில் 2 தொகுதிகள் எஸ்டி பிரிவை சேர்ந்தவர்களுக்கானது. 38 தொகுதிகள் எஸ்சி பிரிவை சேர்ந்தவர்களுக்கானது. பீகார் சட்டசபையின் பதவிக்காலம் நவம்பர் 22ம் தேதி முடிவுக்கு வர உள்ளது. அதற்கு முன்பாக சட்டசபை தேர்தல் நடத்தப்படும்.

தேர்தல் ஆணையம் சார்பில் பூத் லெவல் ஆபிசர்களுக்கு முதல் முறையாக பயிற்சி வழங்கப்பட்டுள்ளது. சிறப்பு வாக்காளர் பட்டியல் திருத்தம் ஜூன் 24ம் தேதி தொடங்கியது. அதன்பிறகு குறித்த காலத்தில் வெற்றிகரமாக முடிக்கப்பட்டது. வாக்காளர்களுக்கு வாழ்த்து தெரிவிக்கிறோம். சிறப்பு வாக்காளர் பட்டியல் திருத்தத்துக்கு ஒத்துழைப்பு கொடுத்ததற்கு நன்றியை தெரிவித்து கொள்கிறோம். சாத் பண்டிகை கொண்டாடுவது போல் ஜனநாயக திருவிழாவான சட்டசபை தேர்தலையும் கொண்டாட வேண்டும்'' என்று கூறினார்.

பீகாரில் 243 சட்டசபை தொகுதிகள் உள்ளன. மெஜாரிட்டிக்கு மொத்தம் 122 தொகுதிகளில் வெற்றி பெற வேண்டும்.தற்போது பாஜக கூட்டணிக்கு 131 எம்எல்ஏக்கள் உள்ளனர். இதில் பாஜகவுக்கு 80 எம்எல்ஏக்கள், ஐக்கிய ஜனதாதளம் கட்சிக்கு 45 தொகுதிகள், ஹிந்துஸ்தானி அவாமி மோர்ச்சா (செக்குலர்) கட்சிக்கு 4 எம்எல்ஏக்கள், 2 சுயேச்சை எம்எல்ஏக்கள் என்று மொத்தம் 131 எம்எல்ஏக்கள் உள்ளனர்.

எதிர்க்கட்சியான தேஜஸ்வி யாதவின் ஆர்ஜேடி கட்சிக்கு 77 எம்எல்ஏக்கள், காங்கிரஸ் கட்சிக்கு 19 எம்எல்ஏக்கள், சிபிஐ (எம்எல்) கட்சிக்கு 11 எம்எல்ஏக்கள், சிபிஐ (எம்), சிபிஐ கட்சிக்கு தலா 2 எம்எல்ஏக்கள் உள்ளனர் என்பது குறிப்பிடத்தக்கது.

English summary

Chief Election commission Gyanesh Kumar says, ‛‛Bihar Legislative Assembly ends on November 22, 2025, and elections will be held before that time. state has 243 constituencies, including 38 for Scheduled Castes (SCs) and two for Scheduled Tribes (STs)''.